Dahaka Dainai Oi Dekenai Eden Ena Sivarai Be Mai Anina Bada

IBA bada taudia ese Eden ena sivarai idia abia dae lasi ena badina ta be, idia gwau Baibel ena kahana haida ese unai sivarai ia durua lasi. Hegeregere, Tomadiho ia Stadilaia Profesa Paul Morris ese inai hereva ia torea: “Eden ena sivarai be Baibel ena kahana haida ese idia hahedinaraia lasi.” Unai hereva be reana “diba bada taudia”ese idia abia dae, to hereva momokani be edia lalohadai amo ia idau.

Baibel ai Eden uma, Adamu, Heva, bona gaigai ia herevalaia referens momo idia noho. * Diba bada taudia haida edia kerere be maragi bema ita hahegeregerea tomadiho gunalaia taudia edia kerere badadia amo. Tomadiho gunalaia taudia idia ura Genese ai ia noho Eden uma ena sivarai idia hakoikoia dainai toana be Baibel ibounai idia ura hakoikoia danu. Edena dala ai?

Eden dekenai idia vara gaudia bema ita lalopararalaia, unai ese ita do ia durua Baibel ena kahana ibounai ita lalopararalaia diba. Hegeregere, Dirava ena Hereva ese ita ia durua taunimanima ese idia gwauraia henanadai badadia edia haere ita davaria totona. Baibel ai inai henanadai edia haere ita tahua neganai, nega momo Eden uma dekenai idia vara gaudia amo edia haere ita abia. Haheitalai haida mani ita laloa.

● Dahaka dainai ita buruka bona ita mase? Bema Adamu bona Heva be Iehova idia kamonai henia noho idia mauri hanaihanai diba. Bema idia gwau-edeede do idia mase. Bena unai ia vara idia gwau-edeede dinana ai idia mase. (Genese 2:​16, 17; 3:​19) Mauri goevadaena idia haboioa bona edia natudia dekenai kara dika idia henia hanai. Unai dainai Baibel ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai ia hanaia lao, badina idia ibounai be idia kara dika vadaeni.”—Roma 5:​12.

● Dahaka dainai Dirava ese kara dika ia koua lasi? Eden umana ai, Satani ia gwau Dirava be koikoi tauna bona taunimanima dekenai gau namodia ia hunia (Genese 3:​3-5) Bona danu Iehova ena lohia dalana maorona ia hepapahuahulaia. Adamu bona Heva be Satani idia badinaia; anina be Iehova ena lohia dalana idia dadaraia, bona idia hahedinaraia taunimanima be sibodia abia hidi idia karaia diba dahaka be namo bona dika. Iehova be kara maoromaoro bona aonega Diravana dainai, ia diba unai hepapahuahu hamaoromaoroa dalana be tamona sibona—nega ia henia, taunimanima be sibodia do idia lohia totona. Unai dainai kara dika be ia bada bona Satani ese taunimanima ia gunalaia noho, unai ese ia hahedinaraia taunimanima be idia hegeregere lasi sibodia idia lohiaia totona. Dirava ese idia ia lohiaia be namo.—Ieremia 10:23.

● Dirava ena ura tanobada totona be dahaka? Eden umana ai tanobada ena hairai do ia noho totona Iehova ese hakaua herevadia ia henia. Adamu bona Heva ia hamaoroa natudia do idia havaraia bona tanobada idia hahonua bona “biagua,” unai dala amo tanobada ibounai idia hahairaia. (Genese 1:​28) Unai dainai, Dirava ena ura be tanobada be paradaiso ai ia lao bona goevadae taudia Adamu, Heva bona edia natudia ese do idia noholaia. Baibel ena hereva momo ese idia hahedinaraia Dirava ia ura unai ia hagugurua.

● Dahaka dainai Iesu Keriso be tanobada dekenai ia mai? Eden umana ai ia vara gwau-edeede dainai Adamu, Heva bona edia natudia do idia mase, to Dirava be mai lalokau ida helaro ia henia. Tanobada dekenai iena Natuna ia siaia, Baibel ia gwau mauri davana ia henia totona. (Mataio 20:28) Unai ena anina be dahaka? Anina be Iesu “Adamu ginigabena” ese Adamu ia hagugurua lasi gaudia be ia ese do ia hagugurua. Iesu be ena tanobada mauri ia gaukaralaia namonamo, Iehova ia kamonai henia bona badinaia. Bena iena mauri ia bouboulaia, eiava mauri davana ia henia, unai dala amo Iehova ese abidadama taudia edia kara dika ia gwauatao bona mauri namona, guna Adamu bona Heva ese Eden dekenai idia moalelaia maurina do idia abia. (1 Korinto 15:22, 45; Ioane 3:​16) Iesu ia gwauhamata, Iehova be ena ura do ia hamomokania, tanobada be Eden bamona paradaisona ai do ia halaoa. *

Dirava be ena ura ia gwauraia hedinarai goevagoeva, bona ena lalohadai be tomadiho gunalaia taudia amo ia idau. Ena ura be gau korikorina. Eden umana be tanobada ai ia noho gabu korikorina hegeregerena, animal bona taunimanima danu be idia noho momokani, unai dainai Dirava ena gwauhamata vaira nega totona be do ia guguru momokani. Unai be emu vaira nega ena hahenamo, a? Abia hidi be oi sibona. Dirava ia ura taunimanima ibounai ese vaira nega namona idia abia, ena be haida be edia mauri lalonai abia hidi kereredia idia karaia, idia danu be unai hahenamo do idia abia diba.—1 Timoteo 2:​3, 4.

Iesu be kahirakahira ia mase neganai, kara dika tauna ta ia hereva henia. Unai tau be alaala tauna; ia diba ia mase be maoro. To Iesu ia noia, ia dekenai lalogoada bona helaro ia henia totona. Iesu ena haere be dahaka? “Oi be lau ida Paradaiso ai do ita noho.” (Luka 23:43) Bema Iesu ia ura unai kara dika tauna ia itaia—ia toreisi lou bona Eden bamona paradaisona ai ia noho hanaihanai—oi laloa Iesu ia ura unai hahenamo oi abia danu, a? Oibe! Unai be ena Tamana ena ura danu! Bema oi ura unai hahenamo oi abia, namona be oi gaukara goada Eden umana ia karaia Diravana oi dibaia totona.

[Futnout]

[Maua/​Foto]

PEROVETO HEREVANA

“Lau ese oi [gaigai] bona hahine huanai inai heheni karana do lau havaraia bona emu natuna bona hahine ena natuna huanai danu. Ia ese emu kwarana do ia moia patapata bona oi ese iena aena geduna do oi haberoa.”​—Genese 3:15.

Unai be Baibel ena peroveta hereva ginigunana, Dirava ese Eden ai unai hereva ia gwauraia. Peroveta herevana ai, hahine, bona ena natudia, gaigai, bona ena natudia ese daidia idia laulaulaia? Edena dala ai idia huanai “inai heheni” karana ia noho?

GAIGAI

Diabolo bona Satani.—Apokalupo 12:9.

HAHINE

Iehova ena guba oreana. (Galatia 4:​26, 27) Isaia ese unai “hahine,” ia herevalaia ia gwau, ia ese vaira negai bese matamatana [natuna] do ia havaraia.—Isaia 54:1; 66:8.

GAIGAI ENA NATUDIA

Satani ena ura idia karaia taudia.—Ioane 8:44.

HAHINE ENA NATUNA

Ginigunana be Iesu Keriso. Ia be Iehova ena guba orea amo. Danu “natuna” ena kahana be Iesu ena horoa tadikaka, idia be ia ida guba ai do idia lohia. Unai horoa Keristani taudia be bese matamatana, “Dirava ena Israela.”—Galatia 3:16, 29; 6:16; Genese 22:18.

AENA GEDUNA IA HABEROA

Unai ese Mesia ia hahisia to unai hisihisi be hanaihanai gauna lasi. Satani ese Iesu hamasea dala ia karaia. To Iesu ia toreisi lou.

KWARANA IA MOIA PATAPATA

Unai be Satani ena mase dinana. Iesu ese Satani do ia haorea momokani. Unai ia do karaia lasi negani Iesu ese guna Eden ai Satani ia hamatamaia dika ibounai do ia hamaoromaoroa.—1 Ioane 3:8; Apokalupo 20:10.

Baibel ena hereva badana oi lalopararalaia totona, Iehova ena Witnes Taudia ese idia printaia buklet The Bible—What Is Its Message? Oi itaia.

[Foto]

Adamu bona Heva edia kara dika dainai idia vara hekwakwanai idauidau idia lalohekwarahilaia