1. Dahaka dainai aneru oi dibaia be namo?

TA OI dibaia matamaia neganai, nega momo ena ruma bese danu oi dibaia be namo. Unai hegeregerena, Iehova Dirava ita dibaia neganai, namona be ena aneru, ena ruma bese taudia unai, ita dibaia. Baibel ese aneru ia gwauraia “Dirava ena natuna haida.” (Genese 6:2) Unai dainai, Dirava ena palani lalonai edia gaukara be dahaka? Histori lalonai taunimanima ese idia karaia gaudia idia durua, a? Emu mauri dekenai aneru ese oi idia durua eiava hahisia? Bema oibe, edena dala ai?

2. Aneru be edena bamona idia vara bona hida idia noho?

² Baibel ese aneru be nega handred momo ia herevalaia. Aneru dekenai diba ma haida ita abia totona, sivarai haida mani ita itaia. Aneru be edena bamona idia vara? Kolose 1:16 ia gwau: “Ia [Iesu Keriso] dekena amo Dirava ese gau ibounai ia karaia, guba dekenai bona tanobada dekenai.” Unai dainai Iehova Dirava ese ena vara guna Natuna amo aneru ta ta ia karaia. Aneru hida idia noho? Baibel ia gwau Dirava ese aneru handred milioni momo ia karaia, bona idia ibounai edia goada be bada.​—Salamo 103:20. *

3. Iobu 38:​4-7 ese aneru be edena bamona ia gwauraia?

 ³ Baibel ia gwau Dirava ese tanobada ia karaia neganai, “guba ena aneru ibounai, be mai moale danu idia boiboi.” (Iobu 38:​4-7) Unai dainai Dirava ese taunimanima bona tanobada ia do karaia lasi neganai, aneru be idia noho vadaeni. Baibel ese ia hahedinaraia danu aneru be mai edia hemami, badina ia gwau “mai moale danu idia boiboi.” Mani oi laloa, “guba ena aneru ibounai” be idia moale hebou. Unai nega ai, aneru ibounai be mai lalotamona ida ruma bese ta bamona Iehova Dirava idia hesiai henia.

4. Baibel ese edena bamona ia hahedinaraia, Dirava idia badinaia aneru ese taunimanima edia kara idia laloa bada?

⁴ Dirava ese tau bona hahine ginigunadia ia karaia negana amo, Dirava idia badinaia lauma taudia ese ia bada ia lao noho tanobada besena bona Dirava ena ura hagugurua karana idia laloa bada. (Aonega Herevadia 8:​30, 31; 1 Petero 1:​11, 12) To nega ia hanaia lalonai, aneru idia itaia taunimanima momo ese edia lalokau Havaraia Tauna idia hesiai henia lasi, bona unai ese edia lalona ia hahisia. To, tau ta be Iehova dekenai ia giroa lou neganai, “aneru be . . . idia moale.” (Luka 15:10) Aneru ese Dirava idia hesiai henia taudia edia namo idia laloa bada, unai dainai Iehova ese aneru ia gaukaralaia momo, tanobada ai idia noho abidadama taudia idia hagoadaia bona gimaia totona. (Heberu 1:​7, 14) Haheitalai haida mani ita itaia.

5. Baibel lalonai edena haheitalai haida ese idia hahedinaraia aneru ese taunimanima idia durua?

⁵ Hanua dikadia rua Sodoma bona Gomora idia hadikaia neganai, aneru rua ese kara maoromaoro tauna Lota bona ena natuna kekeni rua idia durua unai gabu idia rakatania totona. (Genese 19:​15, 16) Lagani handred haida murinai, peroveta tauna Daniela be laiona ena guri lalonai idia negea diho, to dika ta ia davaria lasi, bona ia gwau: “Dirava ese iena aneru ia siaia mai, laiona edia uduna ia koua.” (Daniela  6:22) Aposetolo edia negai, aneru ta ese aposetolo Petero be dibura ruma amo ia ruhaia. (Kara 12:​6-11) Danu, tanobada dekenai Iesu ese ena haroro gaukara ia hamatamaia neganai, aneru ese ia idia durua. (Mareko 1:13) Bona Iesu ia do mase lasi neganai, aneru ta be ia dekenai ia hedinarai bona ‘ia hagoadaia.’ (Luka 22:43) Unai mai anina bada negadia ai, aneru edia heduru ese Iesu ena lalona idia hagoadaia momokani!

6. (a) Hari inai negai, edena dala ai aneru ese Dirava ena taunimanima idia gimaia? (b) Edena henanadai do ita herevalaia?

⁶ Hari inai negai, Dirava ena taunimanima tanobada dekenai ese edia matana korikori amo aneru idia itaia lasi. To Dirava ena aneru goadadia ese lauma dalanai idia gimadia. Baibel ia gwau: “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.” (Salamo 34:7) Dahaka dainai unai hereva ese ita idia hagoadaia be namo? Badina lauma taudia dikadia idia noho bona idia ura ita idia hadikaia! Idia be daidia? Idia be edeseni amo idia mai? Edena dala ai ita idia hadikaia toho? Unai henanadai edia haere ita diba totona, taunimanima ginigunadia dekenai ia vara gauna mani ita laloa.

7. Satani ese taunimanima hida ia veria Dirava idia rakatania totona?

⁷ Inai buka ena Karoa 3 dekenai ita dibaia bamona, aneru ta ia ura taunimanima ia lohiaia dainai, Dirava ia dadaraia. Gabeai unai aneru idia gwauraia Satani Diabolo. (Apokalupo 12:9) Heva ia koia bena lagani 1,600 murinai, Satani ese kahirakahira taunimanima ibounai ia veria Dirava idia rakatania totona, to haida sibona ese Dirava idia badinaia, hegeregere Abela, Enoka bona Noa.​—Heberu 11:​4, 5, 7.

8. (a) Aneru haida be edena dala ai demoni ai idia lao? (b) Demoni be Noa ena negai ia vara Abata amo idia roho mauri totona, dahaka idia karaia?

⁸ Noa ena negai, aneru ma haida ese Iehova idia gwau-edeede henia. Dirava ena guba ruma besena idia rakatania, tanobada dekenai idia mai bona taunimanima hegeregerena  idia noho. Dahaka dainai? Genese 6:2 ia gwau: “Dirava ena natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia.” To, Iehova Dirava be unai aneru ese idia karaia karana bona taunimanima edia kara gageva ia ura henia lasi. Unai dainai tanobada ibounai dekenai abata ia havaraia bona kara dika taudia ibounai ia hadikaia ore, to ena kamonai hesiai taudia sibona ia hamauria. (Genese 7:​17, 23) To unai gwau-edeede aneru, eiava demoni, ese edia tanobada tauanina idia rakatania bona lauma taudia bamona guba dekenai idia giroa. Idia ese Diabolo, “lauma dikadia edia lohia” idia durua dainai, idia be iena kahana dekenai idia lao.​—Mataio 9:34.

9. (a) Demoni be guba dekenai idia giroa neganai, idia dekenai dahaka ia vara? (b) Murina paragraf dekenai dahaka do ita herevalaia?

 ⁹ Unai gwau-edeede anerudia be guba dekenai idia giroa neganai, Dirava ese idia bona edia lohia tauna Satani, ia dadaraia. (2 Petero 2:4) Ena be hari taunimanima bamona idia hedinarai diba lasi, to taunimanima idia do veria noho kara dikadia idia karaia totona. Momokani, unai demoni edia heduru dainai, Satani ese “tanobada taudia ibounai ia koia noho.” (Apokalupo 12:9; 1 Ioane 5:19) Edena dala ai? Nega momo, demoni ese dala idauidau idia gaukaralaia taunimanima idia koia totona. (2 Korinto 2:11) Mani unai dala haida ita itaia.

10. Demoni ese edena dala ai taunimanima idia koia?

¹⁰ Taunimanima koia totona, demoni ese meamea karadia idauidau idia gaukaralaia. Meamea karadia amo ta ese demoni ia hereva henia eiava meamea tauna ta ena amo unai ia karaia diba. Baibel ese meamea karadia ia gwauraia dika bona ita ia sisiba henia unai kara lalonai do ita vareai lasi. (Galatia 5:​19-21) Meamea karadia be haoda taudia ese idia gaukaralaia guma bamona. Haoda taudia ese guma idauidau idia gaukaralaia gwarume idauidau idia veria totona. Unai hegeregerena, lauma dikadia ese meamea karadia idauidau idia gaukaralaia taunimanima idauidau edia lalona idia veria totona.

11. Meamea karadia haida be dahaka, bona dahaka dainai ita dadaraia be namo?

¹¹ Demoni ese meamea karadia idauidau idia gaukaralaia. Idia haida be inai: haida ese au ena kopina, ena raurau haida, buatau, eiava tarot kasi idia gaukaralaia. Eiava henanadai haida edia haere idia abia totona bodi ta dekenai ABC bona Oibe bona Lasi idia torea. Haida idia laloa nihi amo edia mauri dekenai do idia vara gaudia do idia dibaia. Ena be momo idia laloa unai ibounai ese idia do ia hadikaia lasi, to Baibel ese ia hahedinaraia vaira negana idia herevalaia taudia be lauma  dikadia ida idia gaukara hebou. Hegeregere, Kara 16:​16-18 ia gwau kekeni ta ese “meamea lauma” ia abia bona “meamea kara” ia karaia. To demoni ese ia idia rakatania neganai, ia be siahu lasi unai ia karaia totona.

12. Dahaka dainai mase taudia ida herevahereva karana ese ta ia hadikaia diba?

¹² Lauma dikadia ese taunimanima idia koia dalana ma ta be taunimanima idia hagoadaia mase taudia ida idia herevahereva totona. Lalokau tauna ta ia mase dainai idia taitai taudia, be nega momo mase taudia dekenai ia vara gauna dainai idia abia lalohadai kererena ese ia koidia. Babalau tauna ese mase tauna amo ia kamonai herevana be oi dekenai do ia gwauraia eiava mase tauna ena gadona hegeregerena do ia hereva. Unai dainai, taunimanima momo idia laloa mase taudia be idia mauri noho bona idia ida herevahereva karana ese idia ia durua edia lalohisihisi idia haheaukalaia totona. To, unai be momokani lasi, unai bamona kara ese ta ia hahisia diba. Dahaka dainai? Badina demoni ese mase tauna ena  gadona idia tohotohoa bona babalau tauna idia hereva henia. (1 Samuela 28:​3-19) Karoa 6 dekenai ita dibaia bamona, mase taudia be idia mauri noho lasi. (Salamo 115:17) Unai dainai, ‘mase taudia edia lauma ia nanadaia, bona idia danu ia herevahereva’ tauna be lauma dikadia ese idia koia bona Dirava ena ura ia dadaraia noho. (Deuteronomi 18:​10, 11; Isaia 8:19) Unai dainai, demoni ese idia gaukaralaia koikoi gaudia dikadia ita dadaraia be namo.

13. Guna lauma dikadia dekenai idia gari taudia be edena bamona?

¹³ Lauma dikadia ese taunimanima idia koia sibona lasi, to idia hagaridia danu. Hari inai negai, Satani bona ena demoni idia diba edia “nega be ia kwadogi sibona” bona Dirava ese do ia hadikadia ore dainai, edia koikoi karadia idia habadaia momokani. (Apokalupo 12:​12, 17) To, guna lauma dikadia dekenai idia gari taudia tausen momo be hari idia gari lasi. Edia gari be edena bamona ia ore? Meamea karadia ia karaia noho tauna be dahaka ia karaia diba?

14. Aposetolo edia negai idia noho Efeso Keristani taudia bamona, edena dala ai lauma dikadia amo ita raka siri diba?

¹⁴ Lauma dikadia dadaraia bona edia siahu amo ita raka siri dalana be Baibel ese ita dekenai ia hadibaia. Efeso Keristani taudia edia kara mani ita laloa. Idia haida be Keristani taudia ai idia do lao lasi neganai, meamea karadia idia karaia. Edia lalona idia hadaia meamea karadia do idia rakatania neganai, dahaka idia karaia? Baibel ia gwau: “Meamea taudia momo ese edia buka idia mailaia, idia haboua, bona idia gabua taunimanima ibounai edia vairanai.” (Kara 19:19) Unai Keristani taudia ese edia buka idia gabua karana amo, haheitalai namona idia hahedinaraia lauma dikadia idia ura dadaraia taudia dekenai. Iehova idia ura hesiai henia taudia ese meamea gaudia ibounai, hegeregere buka, magasin, muvi, laulau, miusiki bona sibodia idia gimaia totona, ageva bona ma gau haida idia negea danu be namo.​—1 Korinto 10:21.

15. Lauma dikadia ita dadaraia totona, dahaka ita karaia be namo?

 ¹⁵ Efeso Keristani taudia ese edia buka idia gabua bona lagani haida idia hanaia murinai, aposetolo Paulo ese idia ia tore henia: “Iseda tuari be taunimanima danu lasi. Iseda tuari be lauma dikadia danu.” (Efeso 6:12) Demoni be idia hesiku lasi. Idia ura taunimanima momo idia veria. Unai dainai, unai Keristani taudia ese dahaka idia karaia be namo? Paulo ia gwau: “Nega ibounai abidadama, emui kesi bamona, do umui abia loaloa. Abidadama dekena amo, Satani ena diba bona peva, lahi gaudia, be do umui habodoa diba.” (Efeso 6:16) Iseda abidadama ena kesi ia goada neganai, lauma dikadia ita dadaraia diba.​—Mataio 17:20.

16. Edena dala ai iseda abidadama ita hagoadaia diba?

¹⁶ Vadaeni, edena dala ai iseda abidadama ita hagoadaia diba? Baibel stadilaia karana amo. Ruma ta ena haba ia goada totona, ena badina ia goada be namo. Unai hegeregerena, iseda abidadama ena badina, Baibel amo ita abia diba maoromaorona unai, ia goada be namo. Bema nega ibounai Baibel ita duahia bona stadilaia, iseda abidadama be do ia goada. Haba goadana bamona, abidadama goadana ese lauma dikadia amo ita ia gimaia diba.​—1 Ioane 5:5.

17. Lauma dikadia ita dadaraia totona, dahaka ita karaia be namo?

¹⁷ Efeso Keristani taudia be dahaka gau ma ta idia karaia be namo? Ta ese idia ia gimaia be namo badina idia noho hanuana be demoni karadia idauidau amo ia honu. Unai dainai Paulo ese idia ia hamaoroa: “Nega ibounai Lauma Helaga ena siahu dekena amo guriguri bona noinoi do umui gwauraia.” (Efeso 6:18) Ita danu be demoni ena kara idauidau amo ia honu tanobadana ai ita noho, unai dainai lauma dikadia ita dadaraia totona, gau badana be mai momokani ida Iehova ita noia ita ia gimaia totona. Momokani, namona be iseda guriguri lalonai Iehova ena ladana ita gaukaralaia. “Iehova ena ladana be kohoro aukana. Kara maoromaoro tauna be ia lalonai ia heau vareai bena ia ese ia hamauria.” (Aonega Herevadia 18:​10, BHğ) Unai dainai, namona be Dirava dekenai  ita guriguri noho ‘Satani ena imana dekena amo ita do ia hamauria’ totona. (Mataio 6:13) Iehova ese unai bamona guriguri do ia haerelaia.​—Salamo 145:19.

18, 19. (a) Dahaka dainai ita diba momokani lauma dikadia ita halusia diba? (b) Karoa gabena ese edena henanadai do ia haerelaia?

¹⁸ Bema Diabolo ita tuari henia bona Dirava ena ura ita karaia bona Ia kahirakahira ita lao, lauma dikadia garina do ita gari lasi, ena be idia ese ita idia hadikaia diba. (Iamesi 4:​7, 8) Lauma dikadia edia siahu be mai ena hetoana. Noa ena nega ai Dirava ese ia panisidia, bona vaira nega ai edia hahemaoro ginigabena do idia abia. (Iuda 6) Laloatao, Iehova ena aneru goadadia ese ita idia gimaia danu. (2 King Taudia 6:​15-17) Unai aneru idia ura lauma dikadia dadaraia karana dekenai ita kwalimu dainai, ita idia hagoadaia noho. Unai dainai namona be Iehova bona ena ruma bese, ia idia badinaia lauma taudia unai, kahirakahira ita noho. Danu, meamea karadia idauidau ita dadaraia bona nega ibounai Dirava ena Hereva amo idia mai sisiba ita badinaia. (1 Petero 5:​6, 7; 2 Petero 2:9) Unai dala amo lauma dikadia do ita halusidia.

¹⁹ To, dahaka dainai Dirava ese lauma dikadia bona taunimanima idia hahisia bada kara dikadia ia haorea haraga lasi? Unai henanadai be karoa gabena ese do ia haerelaia.