Iesu ena aposetolo taudia be Galilea ai idia haroro noho lalonai, idia dekenai Iesu ia hahedinaraia tauna be dibura ruma ai ia noho. Ioane Bapatiso be lagani rua vadaeni, unuseniai ia noho.

Ioane be taunimanima vairanai ia gwau King Heroda Antipa ese ena kakana Filipo ena adavana Herodia ia abia be kerere. Heroda ese ena adavana ginigunana ia divosia Herodia ia adavaia totona. Bona ia gwau ia ese Mose Ena Taravatu ia badinaia, to ia ese headava ena taravatu ia makohia bona ia heudahanai. Ioane ena sisiba aukana dainai, Heroda ese Ioane be dibura ruma ai ia atoa, reana Herodia ese ia doria dainai unai ia karaia.

Heroda ia diba lasi Ioane dekenai dahaka do ia karaia, badina taunimanima idia “abia dae Ioane be peroveta tauna ta.” (Mataio 14:5) To Herodia be ia lalorua lasi. Ia be “Ioane ia badu henia” noho, bona ena mase dalana ia tahua goadagoada. (Mareko 6:19) Vadaeni Ioane hamasea dalana ia davaria.

Lagani 32 C.E. ena Paseka Ariana be kahirakahira neganai, Heroda be ena vara dina moalelaia totona aria ta ia hegaegaelaia. Unai aria dekenai hanua lohiadia, tuari biagudia, bona Galilea ena dagi bada taudia idia mai. Aria lalonai Salome, Herodia bona ena adavana gunana Filipo edia natuna kekeni, be idia haboua taudia vairanai ia mavaru. Tatau ibounai be ena mavaru idia moalelaia.

Heroda be Salome dekenai ia moale bada dainai, ia gwau: “Oiemu ura gauna be lau oi hamaoroa, bona oi dekenai do lau henia.” Kekeni dekenai ia gwauhamata: “Lau dekenai oi noia gauna be oi do lau henia, egu basileia ena kahana danu.” Kekeni ia do haere lasi lalonai, ena sinana dekenai ia lao bona ia gwau: “Dahaka do lau noia?”​—Mareko 6:22-24.

Herodia ena ura hagugurua negana be inai! Maoromaoro ia gwau: “Ioane Bapatiso ena kwarana.” Karaharaga, Salome be ia giroa lou bona Heroda ia hamaoroa: “Lau ura harihari mereki palakana ta latanai Ioane Bapatiso ena kwarana be lau dekenai oi henia.”​—Mareko 6:24, 25.   

Heroda ia lalohisihisi bada, to ena turadia ese ena gwauhamata Salome dekenai idia kamonai vadaeni. Bema ia hagugurua lasi, do ia hemarai, unai dainai ena be kerere lasi tauna do ia hamasea, to ia karaia. Vadaeni tuari tauna ta ia oda henia, Ioane ena kwarana do ia utua oho. Nega sisina murinai, tuari tauna be mereki palakana latanai Ioane ena kwarana ia mailaia. Salome ia henia bena ena sinana dekenai ia abia lao.

Ioane ena hahediba taudia ese unai sivarai idia kamonai neganai, idia lao ena tauanina idia abia bona idia guria. Bena idia lao Iesu idia hadibaia.

Gabeai, Heroda ia kamonai Iesu ese gorere taudia ia hanamoa bona lauma dikadia ia lulua neganai, ia gari bada. Ia laloa reana unai gaudia ia karaia tauna—Iesu—be Ioane Bapatiso, “mase amo ia toreisi lou” vadaeni. (Luka 9:7) Unai dainai Heroda Antipa ia ura dikadika Iesu ia itaia. Iesu ena haroro herevana kamonai totona lasi, to ia ura hamomokania bema Iesu be Ioane Bapatiso eiava lasi.