•  Dahaka dainai oiemu aniani be mai anina bada?

•  Aniani gimaia daladia foa

•  Helt ia durua aniani daladia toi

•  Momo ese idia gwauraia lalohadai kereredia

 Emu helt be aniani ese ia durua eiava hadikaia diba. Bema aniani dekenai oi naria namonamo bona aniani maorodia oi ania, emu helt ia durua diba. To bema, aniani be dala maorona ai ita hegaegaelaia lasi eiava aniani maorodia ita ania lasi, iseda helt ia hadikaia diba. Hegeregere, motuka be Fuel maorona ia abia lasi neganai, hekwakwanai ia vara diba. Ena dika do oi itaia haraga lasi, to do ia hedinarai.​—Galatia 6:7.

 World Health Organization (WHO) ia gwau, “tanobada ibounai lalonai, tano ta ta dekenai taunimanima be malnutrition eiava aniani maorodia idia abia lasi dainai idia gorere.” Unai hereva ese aniani momo dainai tauanina ia bada karana ia herevalaia danu. Hanaihanai aniani maorodia abia lasi karana ese kudou gorere, stroke, suga gorere, o kensa gorerena ia havaraia diba. Lagani 2017 ai, stadi ta ese ia hahedinaraia, aniani namonamo lasi karana dainai taunimanima 11 milioni bamona idia mase. WHO ena ripoti ia gwau, idia dika vadaeni aniani dainai dina ta ta ai taunimanima tausen mai kahana idia mase, bona taunimanima milioni momo edia helt ia hadikaia.

 Baibel ena hakaua herevadia ese ita ia durua diba, unai amo ita laloparara aniani gimaia bona aniani maorodia ania karana be mai anina bada. Baibel ese ita ia hadibaia Dirava be “mauri ena badina.” (Salamo 36:9) Ita bona iseda famili eda helt ita naria karana amo ita hahedinaraia mauri be harihari gauna. Unai oi karaia diba dalana be inai.

 1. Aniani hegaegaelaia karana gimaia.

 Dahaka dainai? Jems dikadia a be aniani bona ranu idia hamiroa bona unai ese gorere ia havaraia diba.

 Helt ena diba bada taudia idia gwau:

•   Aniani oi do hegaegaelaia lasi neganai, emu imana be sopu bona ranu amo oi huria guna. b Sekeni 20 bamona imana oi huria. Imana edia murina kahana, imana kwakikwaki edia huanai bona imana koukou danu be sopu amo oi huria namonamo. Bena ranu amo imana oi huria lou bona imana hakaukaua.

•   Aniani utua ena chopping board, disi, bona aniani totona do oi gaukaralaia gaudia ma haida danu be sopu bona ranu amo oi huridia be namo. To danu, chopping board tamona oi gaukaralaia lasi maeda aniani bona do oi nadua aniani totona.

•   Frut bona uma aniani ibounai oi huridia. Bema emu noho gabuna ai, uma gabu ai idia tubu aniani dairia totona ranu mirona idia gaukaralaia, unai uma aniani oi disinfect danu be namo.

 2. Aniani kasiri bona maeda aniani atoa hebou lasi.

 Dahaka dainai? Aniani kasiri o maeda lasi gaudia hegeregere vamu, bona ena ranu o jems ese aniani ma haida do ia hamiroa o hadikaia.

 Helt ena diba bada taudia idia gwau:

•   Maketi bona sitoa ai oi hoia aniani oi hapararaia, hegeregere vamu be nadua vadaeni aniani ida oi atoa hebou lasi.

•   Vamu kasiri oi utua murinai, emu imana, kaia bona cutting board oi huria guna, bena aniani ma haida utua totona oi gaukaralaia diba.

 3. Namona be aniani idia maeda namonamo

 Dahaka dainai? Bema aniani idia maeda namonamo bona ia siahu, jems dikadia do idia mase.

 Helt ena diba bada taudia idia gwau:

•   Aniani oi nadua ela bona ia siahu momokani. Danu vamu do ia maeda namonamo totona, namona be 70 digri Selsies (160°F) 30 sekeni bamona lalonai oi nadua be namo.

•   Vasiahu bona stew idia boila be namo.

•   Bahu aniani oi hasiahua lou ela bona ia siahu momokani.

 4. Aniani be temperature maorona ai oi atoa.

 Dahaka dainai? Bema aniani atoa gabuna ena temperature be 5 bona 60 digri Selsies (40–140°F) huanai, bona miniti 20 sibona lalonai murimuri ai ia noho, bakteria ena namba be nega rua do ia habadaia diba. Bona, bema vamu kasiri be temperature maorona ai oi atoa lasi, bakteria haida ese toxins ia havaraia diba, herevana vamu oi nadua, to unai toxins be idia do noho.

 Helt ena diba bada taudia idia gwau:

•   Aniani ia siahu momokani o keru be namo, to ia siahu sisina be namo lasi, unai ese jems habadaia karana do ia koua.

•   Namo lasi aniani be hora rua mai kahana bamona murimuri ai do ia noho, eiava bema temperature be 32 digris Selsies ia hanaia, aniani be hora ta mai kahana do ia noho lasi.

•   Ena be aniani oi nadua vadaeni, to ia siahu noho be namo ela bona oi ania.

 1. Dina ta ta ai frut bona uma aniani idauidau ania.

 Frut bona uma aniani be mai ena vitamin, mineral, bona gau namodia ma haida helt durua totona. WHO ia gwau frut bona uma aniani ena kahana idauidau faiv be dina ta ta ai oi abia be namo. To poteto bona maniota be starchy roots dainai idia be unai aniani ena kahana faiv lasi.

 2. Digara bona oela gaudia ania momo lasi

 WHO ia gwau sitoa ai idia hoihoilaia nadua vadaeni aniani, bona beik aniani hoia momo lasi, unai gaudia edia digara ese emu helt do ia hadikaia. Bema hegeregere nanadu totona unsaturated vegetable oela oi gaukaralaia. c Unai bamona oela be namo, ia be digara bada oela bamona lasi.

 3. Damena bona suga ania momo lasi

 WHO ia gwau dina ta ta ai taunimanima badadia ese damena sisina sibona do idia ania, unai be ti sipunu maragina tamona ena henunai. WHO ia gwau, dina ta ta ai free suga d 60 mililita (o ti sipunu 12) sibona do oi abia. Sitoa ai idia hoihoilaia aniani bona inuinu gaudia momo lalonai suga idia atoa. Hegeregere, 10 ti sipunu suga be 355-mililita loliwota ta lalonai idia udaia. Loliwota lalonai kalori momo idia noho, to unai be helti lasi.

 Baibel ia gwau: “Aonega tauna ese dika ia itaia bona ia raka siri, to diba bada lasi tauna be ia lao noho bona dika ia davaria.” (Aonega Herevadia 22:3) Bema mai aonega ida emu aniani dalana oi gimaia bona senisi oi karaia, unai ese do ia hahedinaraia mauri ia henia Diravana bona emu helt oi laloa bada.

 Lalohadai Kerere: “Nega daudau helti lasi aniani lau ania dainai, ena be lau ania gaudia lau senisia to unai ese lau do ia durua lasi.”

 Momokani Gauna: Tahua gaukara idia karaia taudia idia davaria, tauanina durua aniani maorodia oi ania karana ese oi dekenai namo bada do ia havaraia, emu helt do ia durua bona do oi mase haraga lasi.