Lalohekwarahi a tauna oi laloa neganai, reana inai oi piksaia, ia gari dainai gau ta ia karaia diba lasi, daba ai bedi dekenai ia hekure sibona, o hanaihanai iena lalohekwarahi gaudia ia herevalaia.

 Taunimanima haida idia lalohekwarahi neganai, edia kara be unai bamona. To tahua gaukara amo haida idia davaria, tatau edia lalohekwarahi be dala idauna ai idia hahedinaraia. Ripoti ta ia gwau, tatau be “edia lalohekwarahi hanaia totona, alkahol bona drag idia gaukaralaia, edia inuinu kekero karana ese edia lalohekwarahi ena bada ia hahedinaraia. Bona nega momo idia badu haraga.”

 Momokani, tatau ibounai edia kara be idauidau. Herevana dahaka, to lalohekwarahi karana be inai “nega aukadia [ai] do idia vara” noho hekwakwanai badana ta. (2 Timoteo 3:1) Bema oi lalohekwarahi momo, Baibel ese oi ia durua diba, a?

 Ita lalohekwarahi neganai, Baibel lalonai idia noho sisiba namodia ese ita ia durua diba. Dala toi be inai:

1.  1. “Kerukeru totona umui lalohekwarahi lasi, badina kerukeru danu be mai ena lalohekwarahi gaudia. Hari dina sibona ena lalohekwarahi gaudia umui laloa.”​—Mataio 6:34.

    Unai ena anina: Vaira negana totona, dahaka do ia vara (o ia vara lasi) gauna totona ita laloa momo karana ita dadaraia be aonega karana. Nega momo, ita lalohekwarahi kava. Nega haida ita lalohekwarahilaia gaudia be ita laloa lasi dalana ai gau namodia idia havaraia.

    Inai oi tohoa: Guna ia vara gauna ta oi laloa, unai negai oi mamia gau dikana ta do ia vara, to gau ta ia vara lasi. Bena hari ena lalohekwarahi gaudia ida oi hahegeregerea, bona oi itaia bema unai be hekwakwanai badana momokani eiava lasi.

2.  2. “Auri ese auri ma ta ia segea bamona, tau ta ese ena turana ia segea.”​—Aonega Herevadia 27:17.

    Unai ena anina: Bema haida edia heduru ita abia dae, ita do idia durua iseda lalohekwarahi ita hanaia totona. Edia mauri ai idia vara ekspiriens amo ita dekenai heduru dala namodia do idia gwauraia. Reana ita do idia durua iseda hekwakwanai be dala idauna ai ita laloa totona.

    Inai oi tohoa: Sisiba ia henia tura namona ta oi laloa, oi davaria hekwakwanai be guna ia dekenai ia vara danu. Ia oi nanadaia dahaka ia karaia bona dahaka ia karaia lasi.

3.  3. “Emui lalohekwarahi ibounai be ia dekenai umui negea lao, badina ia be umui ia laloa bada.”​—1 Petero 5:7.

    Unai ena anina: Dirava ese hisihisi idia mamia taudia ia laloa bada. Ita ia hadibaia ita laloa gaudia be guriguri amo ia dekenai do ita gwauraia hedinarai.

    Inai oi tohoa: Oi dekenai lalohekwarahi idia havaraia gaudia be lista ai oi torea. Bena guriguri amo Dirava dekenai emu hekwakwanai ta ta oi herevalaia bona ia oi noia oi ia durua oi haheaukalaia totona.

 Baibel ese lalohekwarahi ita haheaukalaia dalana ia herevalaia sibona lasi. To ia gwauhamata, hari ita lalohekwarahilaia gaudia be kahirakahira do idia ore vaitani. Edena dala ai unai do ia vara?

 Dirava ena Basileia ese lalohekwarahi ia havaraia gaudia do ia haorea. (Apokalupo 21:4) Momokani, unai Basileia ena lohia henunai, ita lalohekwarahilaia gaudia do ita laloaboio bona gau ta ese ita do ia hahisia lasi.​—Isaia 65:17.

 “Maino ia henia Diravana” ia ura vaira negana ai oi dekenai unai do ia vara. (Roma 16:20) Ia gwau: “Lau diba umui totona dahaka do lau karaia, . . . umui dekenai maino do lau henia, bona dika do lau henia lasi, unai amo vaira nega ai noho namo do umui davaria.”​—Ieremia 29:11.