“Tatau ese edia hahine do idia lalokau henidia be namo, sibodia edia tauanina idia lalokau henia hegeregerena. Ena hahine ia lalokau henia tauna ese sibona ia lalokau henia, badina tau ta ese sibona ena tauanina ia inai henia lasi, to ia ubua bona ia laloa bada.”​—EFESO 5:28, 29.

Tau be ruma bese ena kwarana. (Efeso 5:23) Tau namona ena kara be iena ruma bese do ia biagua auka lasi. Iena hahine ia laloa bada, hemami bona tauanina dalanai ia durua bona naria. Ia gaukara goada ena hahine ia hamoalea totona, to ia doria lasi iena ura sibona ia badinaia totona. (Filipi 2:4) Iena hahine ida ia herevahereva namonamo bona hahine ia hereva neganai ia kamonai. Tau be do ia “badu dikadika” lasi bona hahine do ia dadabaia lasi eiava ena hemami do ia hadikaia lasi.​—Kolose 3:19.

“Hahine danu ese iena tau do ia matauraia bada be namo.”​—EFESO 5:33.

Hahine be tau ese ia karaia abia hidi ia matauraia bona ia durua neganai, ruma bese lalonai maino ia havaraia. Iena tau be kerere ia karaia neganai, do ia gwauraia dika lasi, to ia manau bona ia hemataurai. (1 Petero 3:4) Bema hahine ia ura ena tau dekenai hekwakwanai ta ia herevalaia, namona be nega maorona ia abia hidi bona mai hemataurai ida ia hereva henia.​—Hadibaia Tauna 3:7.

“Tau ese . . . ena hahine danu do ia hakapua, bona idia be tauanina tamona ai do idia lao.”​—GENESE 2:24.

Tau bona hahine idia headava neganai, edia huanai hetura kara goadana idia havaraia. Unai dainai do idia gaukara goada, idia herevahereva namonamo bona kara namodia do idia hahedinaraia, unai amo edia headava do ia goada noho. Danu edia adavana korikori ida do idia noho, bona tau eiava hahine ma ta ida do idia mahuta hebou lasi. Heudahanai karana ese headava lalonai tau o hahine ia hahisia bada diba. Unai ese edia badinaia karana ia hadikaia bona ruma bese ia hapararaia.​—Heberu 13:4.

“Natuna maragina dekenai dala maorona oi hadibaia, ia buruka neganai unai dala do ia rakatania lasi.”​—AONEGA HEREVADIA 22:6, futnout.

Dirava ese tama sina dekenai natudia hadibaia ena maduna ia henia. Idia ese natudia dekenai kara namodia do idia hadibaia, bona edia kara amo haheitalai namona do idia hahedinaraia  danu. (Deuteronomi 6:6, 7) Bema natuna be kerere ta ia karaia, aonega tama sina be do ia badu haraga lasi. Bona idia “kamonai haraga, to do idia hereva haraga lasi, bona do idia badu haraga lasi.” (Iamesi 1:19) Bema tama sina idia itaia natuna be matahakani ia abia be namo, mai lalokau ida unai idia karaia, to mai badu ida lasi.

“Natudia e, emui tama sina do umui kamonai henia,  . . . emui tamana bona sinana umui matauraia.”​—EFESO 6:1, 2.

Natudia ese tama sina idia kamonai henia bona mai hemataurai ida idia kara henidia be namo. Bema natudia ese edia tama sina idia matauraia, ruma bese lalonai maino bona lalotamona do ia noho. Natudia badadia ese edia tama sina idia naria namonamo karana amo hemataurai idia hahedinaraia. Hegeregere edia ruma do idia hanamoa eiava moni dalanai heduru idia henia.​—1 Timoteo 5:3, 4.