Baibel Ena Lalohadai

Headava Lalonai Kwara Dagina Ena Anina be Dahaka?

TANO momo ai, wedin negana ai, tau bona hahine be headava ena gwauhamata idia karaia bona hahine ia gwau ena adavana do ia kamonai henia. To inai lalohadai tatau be hahine edia kwarana, be hahine momo ese idia ura henia lasi. Mani Baibel ena hahediba herevana ita laloa. Do oi davaria Baibel ena hahediba hereva be mai ena namo.

Dirava ese Ia Atoa Kwara Dagina

Efeso 5:22-24 ai Baibel ese kwara dagina ia herevalaia: “Hahine be edia tatau henunai idia noho be namo, Lohiabada henunai idia noho hegeregerena, badina tau be ena hahine ena kwarana, Keriso be kongrigeisen ena kwarana hegeregerena, . . . Oibe, kongrigeisen be Keriso henunai ia noho hegeregerena, hahine danu be gau ibounai dekenai edia tatau henunai idia noho be namo.” “Tau be ena hahine ena kwarana” dainai, tau ese famili do ia hakaua, bona ena adavana ese ena hakaua dalana do ia badinaia bona tau ena kwara dagina do ia matauraia.​—Efeso 5:33.

Tau ena kwara dagina ena siahu be Dirava bona Keriso henunai. Bona iena hahine do ia doria lasi Dirava ena Taravatu ia utua o Baibel amo ia hadibaia lalomamina ia dadaraia totona. To, Dirava ese tau dekenai famili totona disisen do ia karaia ena maduna ia henia.​—Roma 7:2; 1  Korinto 11:3.

Baibel ese tau ia hadibaia ena kwara dagina ia gaukaralaia neganai, ena adavana ena namo do ia atoa guna. Efeso 5:25 ia gwau: “Tatau e, emui hahine do umui lalokau henidia noho, Keriso ese kongrigeisen ia lalokau henia bona ia dainai sibona ia henia hegeregerena.” Keriso ena lalokau karana ia tohotohoa tauna ese sibona ena namo laloa bada karana ia dadaraia.

Danu, Baibel ese tatau ia hadibaia, “mai aonega ida” edia adavadia do idia kara henidia. (1 Petero 3:7) Anina be hahine edia tauanina bona hemami be, tatau edia amo ia idau idia dibaia sibona be hegeregere lasi. To ia ese hahine ena ura gaudia ia lalopararalaia be namo.

“Ia be Emu Turana”

Hahine be iena tau ena kwara dagina henunai ia noho dainai, iena lalohadai do ia gwauraia lasi, a? Mani Sara ita laloa, Baibel ia gwau, iena adavana Aberahamo kamonai henia karana dekenai ia be haheitalai namona. (1 Petero 3:5, 6) Sara be hanaihanai gau ibounai dekenai, Aberahamo ia kamonai henia. Hegeregere, edia ruma namona idia rakatania bona gabu idauidau dekenai idia loaloa bona palai rumadia ai idia noho, bona nega ta ai, nega kwadogina lalonai aniani ia hegaegaelaia. (Genese 12:5-9; 18:6) To hekwakwanai badana ia vara neganai, Sara ese Aberahamo dekenai ena ura ia gwauraia loulou ena be Aberahamo be unai ia ura lasi karaia. Unai nega ai Sara ia ura Aberahamo be ena hahine ma ta, Hagara bona natuna mero ginigunana Isamaela, be ruma amo do ia lulua. Dirava ese Sara ia sisiba henia lasi, to Aberahamo ia hamaoroa “ia oi kamonai henia.” Unai nega lalonai, Sara be Aberahamo ese Hagara bona Isamaela do ia lulua totona ia naria, ia sibona ese unai ia karaia lasi.​—Genese 21:8-14.

Sara ena haheitalai ese ia hahedinaraia hahine be ena tau ese do ia biagua auka lasi, to ia be iena tau ena “turana” dainai, headava lalonai hahine be mai ena maduna namona. (Malaki 2:14) Hahine be iena turana dainai, famili lalonai disisen idia karaia hebou, ruma bese naria bona moni gaukaralaia dalana dekenai hahine be lalohadai namodia ia gwauraia diba. To tau be ruma bese ena kwarana dainai, disisen ginigabena be ia ese do ia karaia.​—Aonega Herevadia 31:10-31; 1 Timoteo 5:14.

Headava Ia Havaraia Tauna Matauraia

Iehova Dirava ese tau bona hahine ia havaraia, bona ia ese headava amo idia ia hatamonaia. (Genese 2:18-24) Dirava ese tau bona hahine dekenai maduna idauidau ia henia, unai amo edia mauri do idia moalelaia.​—Deuteronomi 24:5; Aonega Herevadia 5:18.

Iehova ese headava ginigunana ia hamatamaia, unai dainai ia be mai ena maoro headava ena taravatu ia atoa totona. Headava tau bona hahine be edia maduna ta ta idia hagugurua, bona Dirava ese ia atoa kwara dagina ena taravatu idia badinaia neganai, iena lalonamo bona heduru do idia abia.

INAI HENANADAI OI LALOA, A?

◼ Daika be ena kwara dagina ia gaukaralaia namonamo?—Efeso 5:25.

◼ Dirava ese tatau edia kwara dagina ia biagua, a?—1 Korinto 11:3.

◼ Dahaka dainai Dirava ese headava ia havaraia, bona kwara dagina ena taravatu ia atoa?—Aonega Herevadia 5:18.

[Rau 28 ena laulau]

Tatau ese Keriso ena kwara dagina ena haheitalai idia badinaia neganai, headava lalonai moale do ia noho bona gau ibounai do idia karaia namonamo