Guriguri Karana Idia Herevalaia
“Hekwarahi lalonai lau guriguri neganai, lau mamia Dirava be lau badinai ia noho, egu imana ia dogoatao bona ia hakaua.”—MARÍA.
“Egu hahine ese lagani 13 lalonai kensa gorere ia haheaukalaia bena ia mase. Dina ibounai Dirava lau guriguri henia bona lau mamia, egu lalohisihisi lalonai lau ia kamonai henia. Lalomaino lau abia.”—RAÚL.
“Guriguri be Dirava ese taunimanima dekanai ia henia harihari gauna hereadaena.”—ARNE.
Maria, Raul, Arne, bona taunimanima momo, idia laloa guriguri be harihari gauna hereadaena ta. Idia laloa guriguri amo, Dirava idia hereva henia, idia taniku henia bona ena heduru idia noia diba. Idia ese Baibel ena hereva Dirava guriguri henia karana dekenai be mai edia kudouna ibounai ida idia abiadae. Baibel ia gwau: “Dirava dekenai inai ita diba momokani, herevana dahaka ita gurigurilaia, bema unai be iena ura hegeregerena ia ese ita do ia kamonai henia.”—1 Ioane 5:14.
To, taunimanima momo ese Baibel ena hereva guriguri karana dekenai idia abia dae be auka. Steve ese guriguri ia laloa dalana ia herevalaia, ia gwau: “Egu mauri lagani be 17 neganai, aksiden rua lalonai egu turadia toi idia mase. Ta be motuka aksiden lalonai ia mase bona rua be davara dekenai idia maloa mase.” Steve be dahaka ia karaia? “Dirava lau guriguri henia, lau ura idia vara gaudia ena badina lau diba totona. To haere ta lau abia lasi. Unai dainai sibona lau nanadaia ‘Dahaka dainai lau guriguri?’” Taunimanima momo idia laloa edia guriguri ena haere idia abia lasi dainai, guriguri be anina lasi.
Danu badina ma haida dainai taunimanima idia laloa guriguri be anina lasi. Haida idia gwau, Dirava be gau ibounai ia diba dainai, iseda dabu gaudia bona iseda hekwakwanai ia diba vadaeni. Unai dainai ia ita hamaoroa be anina lasi.
Ma haida idia laloa, guna idia karaia kerere dainai Dirava ese edia guriguri ia kamonai henia lasi. Jenny ia gwau: “Egu hekwakwanai be lau laloa egu mauri be anina lasi. Kara dikadia momo lau karaia dainai, lau laloa Dirava ese lau do ia kamonai henia lasi.”
Guriguri be edena bamona oi laloa? Bema guriguri dekenai oi daradara, namona be oi moale, badina Baibel ese henanadai edia haere ia henia diba. Baibel ese guriguri ia herevalaia dalana ita abidadama henia; * unai ese oi do ia durua inai henanadai haida edia haere oi davaria totona:
-
Dirava ese iseda guriguri ia kamonai henia, a?
-
Dahaka dainai guriguri haida ia haerelaia lasi?
-
Edena bamona do oi guriguri bona oi do ia kamonai henia?
-
Edena bamona guriguri ese oi do ia durua?
^ par. 9 Dirava ena hesiai taudia momo edia guriguri, bona Iesu Keriso ena guriguri danu be Baibel lalonai idia torea. Heberu Toretoredia, idia gwauraia Taravatu Gunana lalonai guriguri ibounai 150 mai kahana idia noho.
Reana Inai Danu Oi Ura
MATAMATA TAUDIA EDIA HENANADAI
Dahaka Dainai Lau Guriguri be Namo?
Guriguri be egu hemami do ia hanamoa sibona, eiava ia ese lau do ia durua momokani?
