Maoro Bona Kerere: Baibel Ena Hakaua Dalana Ita Trast Henia Diba

PLAY

Bema sibona eiava ma haida edia lalohadai hegeregerena abia hidi ita karaia, ita diba lasi unai ese namo do ia havaraia o lasi. Baibel ese unai ena badina ia gwauraia, bona gau ma haida danu ia herevalaia. Baibel ai, ita trast henia diba hakaua herevadia idia noho, unai ese ita ia durua ita moale totona.

DIRAVA ENA HAKAUA HEREVADIA ITA ABIA BE NAMO

Baibel ai, Iehova a Dirava ia gwau, ia ura taunimanima ese ena hakaua herevadia do idia tahua, idia ese sibona edia hakaua dalana do idia abia hidi lasi. (Ieremia 10:23) Unai dainai, Dirava ese idia totona Baibel ai ena hakaua herevadia ia atoa. Ia ese ita taunimanima ia lalokau henia bona ia ura lasi ita karaia abia hidi kereredia ese iseda mauri ai lalometau bona hisihisi ia havaraia. (Deuteronomi 5:29; 1 Ioane 4:8) Danu, ia be iseda Havaraia Tauna bona ia be mai ena aonega bona diba, unai dainai ita dekenai sisiba namodia ia henia. (Salamo 100:3; 104:24) To, Dirava ese ita ia doria lasi iena taravatu ita badinaia totona.

Iehova ese tau bona hahine ginigunana, Adamu bona Heva dekenai gau ibounai ia henia idia moale totona. (Genese 1:28, 29; 2:8, 15) Danu, ia ese auka lasi hakaua herevadia ia henia bona ia ura unai do idia badinaia. To, ura kwalimu ia henia, unai amo idia ese iena taravatu do idia badinaia eiava lasi ena abia hidi do idia karaia. (Genese 2:9, 16, 17) To, Adamu bona Heva be sibona edia dala idia abia hidi, bona idia ese Dirava ena taravatu idia dadaraia. (Genese 3:6) Dahaka ia vara? Taunimanima ese idia karaia abia hidi maoro bona kerere dekenai be idia ia hamoalea, a? Lasi. Histori ese ia hahedinaraia Dirava ena taravatu dadaraia karana ese maino bona moale ia havaraia lasi.—Hadibaia Tauna 8:9.

Baibel lalonai hakaua herevadia idia noho abia hidi maorodia ita karaia totona, ena be iseda noho dalana be idauidau. (2 Timoteo 3:16, 17; maua ladana “ Buka Ta Taunimanima Ibounai Totona” itaia.) Baibel ese ita ia durua dalana itaia.

Baibel idia gwauraia “Dirava ena hereva” ena badina oi dibaia. —1 Tesalonika 2:13. Jw.org ai, inai vidio Daika ese Baibel Ia Havaraia? oi itaia.

HAIDA ESE BAIBEL IDIA DADARAIA ENA BADINA

Taunimanima haida idia gwau Baibel be hakaua hereva namodia ia henia lasi. Do idia gwauraia badina haida be inai.

Idia Gwau: “Baibel be sibona ia hakoikoia.”

Momokani Gauna: Reana matamanai do oi laloa Baibel ena siri haida be Baibel ena kahana ma haida ida idia hegeregere lasi. To bema edena dala ai bona edena nega ai sivarai idia torea oi dibaia neganai, do oi itaia Baibel ena hereva ibounai be momokani.

Haheitalai haida ita itaia totona, jw.org ai atikol ladana “Baibel Lalonai Idia Noho Herevadia be Koikoi, A?” duahia.

Idia Gwau: “Sibona idia gwauraia Baibel ena hereva idia badinaia taudia be kara dika idia karaia, unai dainai haida idia laloa reana Baibel be hakaua hereva maorodia lasi.”

Momokani Gaudia: Baibel ena hakaua herevadia idia badinaia lasi taudia edia kara dika dainai, namo lasi Baibel ita gwauraia dika. Baibel ia peroveta taunimanima momo, tomadiho gunalaia taudia danu, be idia gwau Baibel ena hakaua herevadia idia badinaia, to edia kara amo unai idia hahedinaraia lasi. Danu Baibel ia gwau, unai dainai ena hakaua herevadia be “do idia gwauraia dika.”—2 Petero 2:1, 2.

Tomadiho gunalaia taudia ese Baibel ena hahediba herevadia idia badinaia lasi ena haheitalai ta be jw.org ai, inai atikol ladana “Tomadiho be Bisinesi Badana Ta, A?” duahia.

Idia Gwau: “Baibel ena hereva idia badinaia taudia be haida idia matauraia lasi.”

Momokani Gaudia: Baibel ese ita ia hagoadaia mai hemataurai ida haida ita kara henia totona. Baibel ia gwau namo lasi. . .

ta ia laloa ia ese ma haida ia hereaia. —Filipi 2:3.
haida ese idia abia dae gaudia dainai idia ita matauraia lasi.—1 Petero 2:17.
ta ita doria iseda lalohadai ia abia dae totona.—Mataio 10:14.

Baibel ia hahedinaraia hanaihanai Dirava ese taunimanima be maka tamona ai ia kara henia bona ia ura ita danu be unai bamona ita karaia.—Roma 9:14.

Diba ma haida abia totona jw.org ai, inai atikol ladana “Ta Ena Kara Haheaukalaia—Baibel ese Ia Durua Diba” duahia.

BAIBEL ESE DIRAVA ENA HAKAUA DALANA IA HAHEDINARAIA

Baibel lalonai Iehova ese taunimanima ia kara henia sivarai momokanidia idia noho. Unai ese ita ia durua Dirava ena lalohadai maoro bona kerere dekenai ita diba totona. (Salamo 19:7, 11) Ita dibaia hakaua hereva momokanidia ese ita idia durua abia hidi maorodia ita karaia totona.

Hegeregere, Aonega Herevadia 13:20 ena sisiba oi laloa, ia gwau: “Aonega taudia ida ia raka tauna be do ia aonega, to kavakava taudia ia bamoa tauna be dika do ia davaria.” Unai hakaua herevana be mai anina bada idaunegai bona hari inai negai danu. Baibel be hakaua hereva namodia amo ia honu.—Maua ladana “ Baibel Ena Aonega Herevadia” itaia.

To do oi gwau, ‘Edena bamona do lau diba bema Baibel ena hakaua herevadia be hari mai anina bada?’ Rau 10 ena atikol ese ekspiriens haida do ia herevalaia.

a Iehova be Dirava ena ladana korikorina.—Salamo 83:18.

BAIBEL ENA SISIBA BE HARI ITA BADINAIA DIBA

Ena be Baibel be lagani 2,000 gunanai idia torea haorea, to hari inai negai danu ia be mai anina bada. Badina hari taunimanima idia ura idia moale bona mauri namona idia abia. (Hadibaia Tauna 1:9) Baibel ena hakaua herevadia ese ita idia durua unai ita hagugurua totona.

Kara Momokani

“Ai ura mai momokani ida gau ibounai ai karaia.”—Heberu 13:18.
“Namo lasi henaoa tauna ia henaohenao lou, to namona be ia gaukara goada.”—Efeso 4:28.

Hetura Karana

“Namo lasi ta be sibona ena namo ia tahua, to namona be ma ta ena namo ia tahua.” —1 Korinto 10:24.
“Ta ta emui kara do umui haheaukalaia noho bona mai kudouna ibounai ida do umui gwauatao heheni.”—Kolose 3:13.

Abia Hidi Karaia Dalana

“Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.” —Aonega Herevadia 14:15.
“Aonega tauna ese dika ia itaia bona ia raka siri, to diba bada lasi tauna be ia lao noho bona dika ia davaria.”—Aonega Herevadia 22:3.

GIMA KOHORONA