UNAI BE HAHENAMO BADANA! Iseda havaraia tauna ia gwauhamata inai tanobada ai mauri hanaihanai do ita abia. To, taunimanima momo be unai hereva idia abia dae lasi. Idia gwau: ‘Taunimanima ibounai be do idia mase. Bona unai be mauri ena kahana ta.’ Taunimanima haida idia laloa mauri hanaihanai do ita abia diba to inai tanobada ai lasi. Idia laloa ita mase neganai, guba dekenai ita lao bona unuseniai mauri hanaihanai ita abia. To oi be dahaka oi laloa?

Unai henanadai oi do haerelaia lasi lalonai, Baibel ese henunai idia noho henanadai toi ia haerelaia dalana mani oi laloa: Dirava be Adamu ia havaraia neganai, dahaka ese ia hahedinaraia Adamu be ia noho daudau diba? Dirava ena ura inai tanobada bona taunimanima totona be dahaka? Dahaka dainai taunimanima idia mase?

Tanobada ai idia noho mauri gaudia ibounai be Dirava ese ia havaraia, to taunimanima ia havaraia dalana be idau. Edena dala ai? Baibel ese ia hahedinaraia Dirava ese taunimanima be ena “toana” bona “laulau” hegeregerena ia karaia. (Genese 1:26, 27) Unai ena anina be dahaka? Anina be taunimanima be Dirava ena kara namodia, hegeregere, lalokau bona hahemaoro dalana idia hahedinaraia diba.

Danu, Dirava ese taunimanima dekenai namo bona dika edia idau dibaia karana ia hadibaia bona ia idia tura henia diba. Unai dainai ita ese guba bona tanobada edia hairai, hegeregere, havaraia gaudia bona miusiki ita moalelaia diba. Havaraia gaudia ibounai amo, taunimanima sibona be Dirava idia tomadiho henia diba. Unai bamona kara ese ia hahedinaraia taunimanima be tanobada ai idia noho havaraia gaudia amo idia idau.

Mani oi laloa: Dirava be taunimanima dekenai unai bamona gau namodia ia henia, to unai ese ia hahedinaraia taunimanima be do idia mauri daudau, a? Oibe, Dirava ese taunimanima dekenai diba bona aonega ia henia unai amo inai tanobada ai mauri hanaihanai idia abia diba.

Taunimanima haida idia laloa, Dirava be ia ura lasi taunimanima be tanobada ai mauri hanaihanai idia abia. Bona idia gwau, taunimanima be tanobada ai do idia noho daudau lasi, badina idia laloa tanobada be hahetoho abia gabuna, bona bema idia kwalimu, guba dekenai do idia lao bona Dirava ida do idia noho ela bona hanaihanai. Bema taunimanima edia lalohadai be momokani, vadaeni do ita gwau Dirava be kara dika bona dagedage ena badina, a? Unai bamona lalohadai ese Dirava ena kara ia gwauraia dika. Badina Baibel ese Dirava ena kara  be inai bamona ia gwauraia. Baibel ia gwau: “Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.”​—Deuteronomi 32:4.

Baibel ese Dirava ena ura ginigunana be inai bamona ia gwauraia: “Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.” (Salamo 115:16) Oibe, Dirava ese tanobada ia karaia be taunimanima ese do idia noholaia hanaihanai totona, bona Ia ese tanobada ai gau namodia momo ia karaia unai amo taunimanima ese edia mauri idia moalelaia diba.​—Genese 2:8, 9.

“Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.”​—Salamo 115:1

Baibel ese Dirava ena ura taunimanima totona ia hahedinaraia goevagoeva. Iehova ese tau bona hahine ginigunadia ia oda henidia ‘bese do idia havaraia, do idia momo herea. Tanobada ena gabu ibounai dekenai do idia noho, bona unai tano do idia biagua . . . bona mauri gaudia, tanobada dekenai idia marere gaudia ibounai do idia biagua.’ (Genese 1:28) Unai be hahenamo badana, ani? Dirava ese idia dekenai maduna ia henia paradaiso idia naria bona tanobada ena gabu ibounai idia biagua totona. Dirava ese Adamu bona Heva bona edia natudia dekenai ia henia hahenamo be inai tanobada ai mauri hanaihanai do idia abia to guba ai lasi.

Dahaka dainai ita mase? Baibel ese ia hahedinaraia Dirava ena natuna ta, gabeai idia gwauraia Satani Diabolo, be Eden umana ai Dirava ena palani ia hadikaia. Edena dala ai?

Satani ese iseda tama sina ginigunadia, Adamu bona Heva ia koidia bena Dirava idia gwau-edeede henia. Satani ia gwau Dirava ese idia dekenai gau namona ta ia hunia​—inai be namo bona dika edia idau dibaia karana​—⁠unai dainai Satani idia badinaia bona Dirava idia gwau-edeede henia. Unai dainai dahaka ia vara? Dirava ese idia ia hadibaia hegeregerena idia mase. Idia ese tanobada Paradaisona ai mauri hanaihanai ena hahenamo idia haboioa.​—Genese 2:17; 3:1-6; 5:5.

Adamu bona Heva edia gwau-edeede karana dainai taunimanima idia buruka bona idia mase. Dirava ena Hereva ia gwau: “Tau tamona [Adamu] dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Ita mase badina iseda tama sina ginigunadia amo kara dika bona mase ita abia, to unai be Dirava ena ‘palani’ lasi.

Eden umana ai ia vara gwau-edeede karana ese Dirava ena ura tanobada bona taunimanima totona ia haidaua lasi. Dirava ena lalokau bona hahemaoro goeva karana dainai, kara dika bona mase amo ita ia ruhaia. Aposetolo Paulo ia gwau: “Badina kara dika ena davana be mase, to Dirava ese Keriso Iesu iseda Lohiabada amo ia henia harihari gauna be mauri hanaihanai.” (Roma 6:23) Dirava ese ita ia lalokau dainai, “ena natuna korikorina [Iesu Keriso] ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iesu be ena mauri davalaia boubouna amo sibona ia henia unai amo Adamu ese ia haboioa gauna ia hoia lou. a

Kahirakahira, Dirava ena gwauhamata tanobada paradaiso totona do ia guguru. Inai hahenamo oi abia diba, bema Iesu ena sisiba oi badinaia. Ia gwau: “Geiti maragina dekenai umui vareai, badina mase ia lao henia dalana be bada bona lababa herea, bona taunimanima momo be unai dala dekenai idia raka.” (Mataio 7:13, 14) Momokani, emu vaira nega maurina oi moalelaia diba bema emu mauri ai abia hidi maorodia oi karaia. Dahaka do oi karaia?