1. Edena dala ai iseda lalokau Tamana Iehova, ita tohotohoa diba?

IEHOVA be ita ia lalokau henia bada. (Ioa. 3:16) Unai dainai ita ura iseda lalokau Tamana ita tohotohoa. Ta ta iseda hemami ita laloa, iseda tadikaka ita lalokau henia bona ta ta ita hebogahisi henia. To, “gau badana be iseda abidadama tamona tadikaka bona taihu dekenai, kara namo ita hahedinaraia.” (1 Pet. 3:8; Gal. 6:10) Iseda tadikaka taihu ese hekwakwanai badadia idia davaria neganai, ita ura idia ita durua.

2. Inai stadi atikol ai dahaka do ita herevalaia?

² Iehova ena hesiai gaukara idia ura karaia taudia ibounai be hekwakwanai do idia davaria. (Mar. 10:29, 30) Inai nega dokona ia kahirakahira noho lalonai, reana hahetoho momo do ita davaria. Edena dala ai ta ta ita hagoadaia diba? Baibel ese ia sivarailaia taudia hegeregere, Lota, Iobu bona Naomi edia haheitalai ese ita do ia durua daladia mani ita herevalaia. Danu hari inai negai, iseda tadikaka taihu ese idia davaria hekwakwanai haida bona idia hanaia daladia do ita herevalaia.

3. Petero Iharuana 2:7, 8 ena hereva bamona, Lota be dahaka abia hidi kererena ia karaia?

³ Lota be abia hidi kererena ia karaia, badina ia be Sodoma ai matabodaga karadia idia karaia taudia huanai ia noho. (2 Petero 2:7, 8 duahia.) Unai gabu be bisinesi idia karaia gabuna, to Lota be unuseniai ia noho dainai hekwakwanai momo ia davaria. (Gen. 13:8-13; 14:12) Iena adavana be unai gabu ai idia noho taudia haida ia lalokau henia bada dainai Iehova ena hereva ia badinaia lasi. To, Dirava ese unai gabu ai lahi bona salipa ia siaia diho neganai, Lota ena adavana ia mase. Bona Lota ena natuna  kekeni rua mani oi laloa. Edia maoheni tatau rua danu be Sodoma dekenai idia mase. Lota be iena ruma bona kohu ia haboioa bona danu ia lalometau bada badina iena adavana be ia mase. (Gen. 19:12-14, 17, 26) Unai hekwakwanai badadia idia vara neganai, Iehova ese Lota ia rakatania, a? Lasi.

4. Edena dala ai Iehova ese Lota dekenai haheauka karana ia hahedinaraia? (Rau 1 ai ia noho laulau itaia.)

⁴ Ena be Lota be Sodoma ai ia noho, to Iehova be mai ena hebogahisi ida ena aneru ia siaidia ia bona ena ruma bese ia hamauria totona. To Lota be unai aneru rua edia hereva ia kamonai to ia badinaia “haraga lasi.” Unai dainai aneru ese iena imana ia dogoatao bona ia durua ia bona ena ruma bese be hanua murimurina ai idia heau lao totona. (Gen. 19:15, 16) Aneru ese ia hamaoroa ororo dekenai ia heau lao. Lota be Iehova ena hereva ia kamonai, to ia noinoi Sodoma badinai ia noho hanua ta dekenai ia heau lao totona. (Gen. 19:17-20) Iehova be mai haheauka ida iena noinoi ia abia dae bona Lota ia koua lasi unai hanua dekenai ia lao totona. Ena be Lota be unai hanua dekenai ia noho to gabeai ia gari dainai ororo gabuna dekenai ia lao​—unai be matamanai Iehova ese ia hamaoroa do ia lao henia gabuna. (Gen. 19:30) Unai ese Iehova ena haheauka karana ia hahedinaraia! Edena dala ai ia ita tohotohoa diba?

5-6. Tesalonika Ginigunana 5:14 ena hereva bamona, edena dala ai Dirava ita tohotohoa diba?

⁵ Lota bamona, reana tadikaka eiava taihu ta be abia hidi kererena ta ia karaia bona hekwakwanai momo ia davaria. Bema kongrigeisen ai unai ia vara, dahaka do oi karaia? Reana oi ura unai tadikaka eiava taihu dekenai do oi gwau: ‘Oi karaia abia hidi kererena dainai ena dika oi davaria.’ Bona reana unai be maoro. (Gal. 6:7) Eiava dala ma ta ita tohoa diba. Iehova ese Lota ia durua dalana ita tohotohoa be namo. Edena dala ai?

⁶ Iehova be aneru ia siaia sibona lasi, to Lota ia hadibaia bona durua Sodoma ena dika amo ia heau mauri totona. Unai hegeregerena, bema ita diba iseda tadikaka eiava taihu be abia hidi kererena ia karaia, namona be ia ita hadibaia iena abia hidi ese hekwakwanai ia havaraia diba. To, namona be ia oi durua danu. Ena be unai tadikaka eiava taihu ese Baibel ena sisiba herevadia ia badinaia haraga lasi, to namona be oi haheauka. Aneru rua edia haheitalai oi tohotohoa. Ita hesiku haraga lasi, to dala idauidau oi tahua ia oi durua totona. (1 Ioa. 3:18) Reana laulau dalana ai iena imana do oi dogoatao bamona, bona ia oi durua ia abia sisiba namona ia badinaia totona.​—1 Tesalonika 5:14 duahia.

7. Edena dala ai Iehova ese Lota ia kara henia dalana ita tohotohoa diba?

⁷ Reana Iehova be Lota ena kerere ia laloa momo diba. To, unai bamona ia karaia lasi, badina iena lauma helaga ena heduru amo aposetolo Petero be ena revareva ai Lota ia gwauraia kara maoromaoro tauna. Ita moale badina Iehova be iseda dika ia gwauatao! (Sal. 130:3) Iehova ese Lota ia kara henia dalana ita tohotohoa diba, a? Bema iseda tadikaka eiava taihu edia kara namodia sibona ita laloa, edia kara do ita haheaukalaia. Bona reana iseda heduru do idia abia dae.

8. Ta ita hebogahisi henia dainai, edena bamona do ita kara?

⁸ Iobu be Lota bamona lasi, badina ia be abia hidi kererena ia karaia lasi to hahetoho momo ia davaria. Hegeregere, iena kohu ia haboioa, taunimanima ese ia idia gwauraia dika, bona ena tauanina dekenai toto momo idia vara. Ia bona ena adavana ese idia davaria hahetoho badana be, edia natudia ibounai idia mase. Bona iena tura koikoidia toi ese ia idia samania koikoi. Dahaka badina ta dainai Iobu idia  hagoadaia koikoi taudia toi be hebogahisi idia hahedinaraia lasi? Iobu dekenai idia vara gaudia edia badina idia lalopararalaia lasi. Unai dainai, Iobu dekenai lalohadai kereredia idia abia bona Iobu idia gwauraia dika. Unai tura koikoidia edia kara ita tohotohoa lasi totona, dahaka ita karaia be namo? Namona be ita laloatao Iehova sibona be ta dekenai ia vara hekwakwanai ia diba namonamo. Hekwakwanai ia davaria tauna ia hereva neganai, ita kamonai namonamo. Unai sibona lasi to namona be ena hemami oi lalopararalaia danu. Unai oi karaia neganai, emu tadikaka eiava taihu dekenai hebogahisi karana oi hahedinaraia diba.

9. Ta ita hebogahisi henia dainai, dahaka do ita karaia lasi bona dahaka dainai?

⁹ Hebogahisi karana ese ita ia durua dainai ma haida edia hekwakwanai be ma haida dekenai ita maumauraia lasi. Maumau tauna ese kongrigeisen tadikaka taihu edia ladana ia hadikaia diba. (Aon. 20:19; Roma 14:19) Ia be hebogahisi lasi tauna, bona ia gwauraia herevadia ese lalohekwarahi taudia edia hisihisi ia habadaia sibona. (Aon. 12:18; Efe. 4:31, 32) Bema ta ena kara namodia sibona ita laloa bona ia durua daladia ita tahua, unai ese ia do ia durua bada ena hekwakwanai ia haheaukalaia totona!

10. Iobu 6:2, 3 ai idia noho herevadia ese ita dekenai dahaka ia hadibaia?

¹⁰ Iobu 6:2, 3 duahia. Iobu be ia badu dainai nega haida ia hereva kava. Gabeai, ia laloparara ia gwauraia hereva haida be kerere. (Iobu 42:6) Iobu bamona, hekwakwanai badadia ia haheaukalaia tauna be nega haida ia badu dainai ia hereva kava diba, to gabeai ia laloparara unai be kerere. Edena dala ai unai tauna ita durua diba? Oi badu haraga lasi to ia dekenai hebogahisi karana oi hahedinaraia. Namona be oi laloatao, Iehova ia ura lasi hari inai negai ita  abia hekwakwanai ita lalohekwarahilaia. Unai dainai, ita laloparara dahaka dainai Iehova ia hesiai henia tauna ta be ia lalohekwarahi bada bona ia badu neganai nega haida ia hereva kava. Bema unai tauna be ita eiava Iehova ia gwauraia kerere, namo lasi ia gwauraia herevadia dainai ita badu haraga eiava ia ita hahemaoro henia.​—Aon. 19:11.

11. Elda taudia be sisiba idia henia neganai, edena dala ai Elihu ena haheitalai idia tohotohoa diba?

¹¹ Nega haida hekwakwanai badana ta ia haheaukalaia tauna ese heduru ia abia totona, sisiba eiava matahakani ia abia be namo. (Gal. 6:1) Edena dala ai elda taudia ese unai do idia karaia? Elihu ena haheitalai idia tohotohoa be namo. Elihu be Iobu ia hebogahisi henia bona ena hereva ia kamonai namonamo. (Iobu 33:6, 7) Elihu be Iobu ena hekwakwanai ia lalopararalaia neganai, Iobu ia sisiba henia. Ta be ena hekwakwanai ia herevalaia neganai, elda taudia ese ena hereva idia kamonai namonamo bona unai tauna ena hekwakwanai idia lalopararalaia toho. Bena sisiba idia henia karana amo ia idia durua diba.

12. Naomi be ena adavana bona iena natuna memero idia mase murinai, ena hemami be edena bamona?

¹² Naomi be Iehova ia lalokau henia bada hahinena. To iena adavana bona iena natuna memero idia mase murinai, ia ura iena ladana ia haidaua bona inai ladana “Mara” ia gaukaralaia, ena anina be “Auka.” (Ruta 1:3, 5, 20, 21) Naomi ena ravana hahine Ruta, be iena lalohekwarahi negadia ai ia ida ia noho. Ruta be Naomi dekenai heduru ia henia sibona lasi, to ena hereva amo Naomi ia hagoadaia danu. Ruta be mai lalokau ida ia gwauraia herevadia ese Naomi ia durua bona hagoadaia.​—Ruta 1:16, 17.

13. Bema iseda tadikaka eiava taihu ta ena adavana ia mase, dahaka dainai idia ita durua be namo?

¹³ Bema kongrigeisen ai iseda tadikaka eiava taihu ta ena adavana ia mase, ia ita durua be namo. Headava tau bona hahine idia noho hebou karana be, au rua idia tubu hebou bamona. Lagani momo murinai, unai au rua edia ramuna idia mogea hebou dainai, bema au ta be unai au ma ta badina amo idia kokia, ia badinai idia hadoa au be ia mase diba. Unai hegeregerena, bema headava tau eiava hahine ta ena adavana ia mase, nega daudau lalonai do ia lalohisihisi bada. Ena tau ia mase taihu, Paula ia gwau: “Egu mauri ia idau momokani, lau mamia ta ese lau ia durua lasi. Egu tura namona ia mase. Ia mauri neganai, hanaihanai ia dekenai gau ibounai lau herevalaia. Egu moale negadiai bona hekwakwanai idia vara negadiai lau ia durua bada. Egu hekwakwanai lau herevalaia neganai, hanaihanai ia kamonai. To ia mase neganai lau lalohisihisi bada.”

14-15. Bema iseda tadikaka eiava taihu ta ena adavana ia mase, edena dala ai idia ita hagoadaia diba?

¹⁴ Bema iseda tadikaka eiava taihu ta ena adavana ia mase, edena dala ai idia ita hagoadaia diba? Oi karaia diba gauna ginigunana be ia oi hereva henia, ena be oi diba lasi dahaka gaudia do oi gwauraia. Ataiai ita herevalaia taihu Paula, ia gwau: “Bema ta ia mase, taunimanima idia lalohekwarahi dahaka hereva do idia gwauraia. Reana do idia laloa momo badina idia gwauraia herevadia ese unai tauna ia habadua diba. To, bema oi ura ta oi hagoadaia, to hereva ta oi gwauraia lasi unai ese ta do ia durua lasi.” Ia lalohisihisi tauna ia laloa lasi ita be mai aonega ida ia do ita hereva henia. Paula ia gwau: “Lau moale bema egu turadia idia gwau, ‘Oi dekenai ia vara gauna dainai ai sori.’”

¹⁵ Lagani momo gunana ai ena hahine ia mase tadikaka ta, William ia gwau: “Ma haida ese egu hahine ena kara namodia idia herevalaia neganai, lau moale badina unai ese ia hahedinaraia idia be egu hahine idia lalokau henia  bona idia matauraia. Unai bamona kara bona hereva ese lau ia durua bada. Idia gwauraia herevadia ese lau ia hagoadaia, badina egu hahine lau lalokau henia bada bona ia be egu mauri ena kahana ta bamona.” Vabu ta ladana, Bianca ia gwau: “Haida be lau ida idia guriguri bona Baibel ena siri ta eiava rua idia duahia neganai, unai ese lau ia hagoadaia bada. Egu tau idia herevalaia bona lau ese ena sivarai haida lau gwauraia neganai idia kamonai, unai ese lau ia durua.”

16. (a) Ta ena lalokau tauna ta ia mase neganai, dahaka ita karaia noho be namo? (b) Iamesi 1:27 ena hereva bamona, iseda maduna be dahaka?

¹⁶ Ruta ese ena ravana hahine Naomi ia durua bona hagoadaia hegeregerena, iseda tadikaka eiava taihu ta ena adavana ia mase neganai idia ita durua bona hagoadaia noho be namo. Paragraf 13 ai ita herevalaia taihu, Paula ia gwau: “Egu tau ia mase murinai, momo ese lau idia durua bona hagoadaia. To dina haida idia ore murinai, idia be edia dina ta ta mauri ai idia karaia gaukaradia idia karaia. To lau mamia egu mauri ia idau. Bema haida ese hua haida eiava lagani haida lalonai ia lalohisihisi tauna idia durua bona hagoadaia, ia dekenai unai be heduru bada gauna.” Momokani, ma haida be hua haida murinai edia mauri lalonai idia vara gaudia idia laloa momo lasi. To ma haida be edia lalokau tauna ta ida idia karaia gauna ta idia karaia neganai, unai idia laloa neganai idia lalohisihisi bada. Taunimanima ta ta ese mase idia lalohisihisilaia daladia be idauidau. Namona be ita laloatao, bema iseda tadikaka eiava taihu ta ena adavana ia mase, Iehova be ita dekenai maduna bona hahenamo ia henia idia ita durua bona hagoadaia totona.​—Iamesi 1:27 duahia.

17. Dahaka dainai edia adavana ese idia rakatania tau eiava hahine ita hagoadaia be namo?

 ¹⁷ Bema headava tau eiava hahine ta be ena adavana ese ia rakatania, do ia lalohisihisi bada. Ena tau ese ia rakatania hahine, Joyce ia gwau: “Egu tau ese lau ia divos karana lau laloa neganai, lau mamia egu tau ia mase bamona. Bema ia be aksiden eiava gorere dainai ia mase, unai ena hemami be idau. To, egu tau be ena lalona ia hadaia lau ia rakatania totona. Unai dainai lau lalohisihisi bada.”

18. Bema headava tau eiava hahine ta ena adavana ia mase eiava ena adavana ese ia rakatania, dahaka ita karaia diba idia ita durua totona?

¹⁸ Bema ta be ena adavana ese ia rakatania eiava ena adavana ia mase, namona be idia dekenai hebogahisi kara maragidia ita hahedinaraia, unai amo do idia diba idia ita lalokau henia bada. Bona idia be iseda tura namodia ai ita halaoa diba. (Aon. 17:17) Edena dala ai oi hahedinaraia idia dekenai oi be tura namona ta? Reana idia oi boiria diba umui aniani hebou totona. Bona nega oi atoa idia ida moale karana ta oi karaia eiava haroro gaukara ai idia ida oi gaukara hebou totona. Bona dala ma ta be, emu ruma bese tomadiho totona idia oi boiria diba. Bema unai bamona oi karaia, Iehova do oi hamoalea, badina ia be “lalohisihisi taudia kahirakahira ia noho” bona “vabu taudia danu ia gimaia noho.”​—⁠Sal. 34:18; 68:5.

19. Petero Ginigunana 3:8 ena hereva bamona, emu lalona oi hadaia dahaka oi karaia totona?

¹⁹ Kahirakahira, Dirava ena Basileia be tanobada do ia lohiaia, bona unai nega ai iseda “kerere gunadia” do ita laloaboio momokani. Ita moale badina ita be “kara gunadia” do ita laloa lou lasi bona “laloaboio momokani,” unai nega ita naria noho. (Isa. 65:16, 17) Unai nega ita naria noho lalonai, namona be iseda hereva bona kara amo ta ta ita durua bona ita hahedinaraia ita be iseda tadikaka taihu ita lalokau henia bada.​—1 Petero 3:8 duahia.