Namona be ita abidadama, unai amo Iehova do ita hamoalea. To, Baibel ia gwau “abidadama be taunimanima ibounai ese idia abia gauna lasi.” (2 Tes. 3:2) Aposetolo Paulo ese unai hereva be ia idia dagedage henia “kara dika taudia” totona ia gwauraia. To ia gwauraia abidadama karana be haida dekenai ia momokani danu. Taunimanima haida be idia ura lasi abia dae, Dirava be gau ibounai ia havaraia. (Roma 1:20) Haida be reana idia gwau gau ta eiava siahu tauna ta idia abidadama henia. To unai bamona abidadama karana be hegeregere lasi, Iehova idia hamoalea totona.

Namona be ita abia dae momokani, Iehova be ia noho bona ia dekenai edia abidadama ia goada taudia edia davana ia henia. (Heb. 11:6) Abidadama be lauma helaga ena huahua ta. Bona guriguri amo Iehova idia noia taudia dekenai, lauma helaga ia henia. (Luka 11:9, 10, 13) Unai lauma helaga ita abia dalana ta be Dirava ena Hereva ita duahia. Bona ita duahia gauna ita laloa bena ita gaukara goada ita dibaia gauna ita badinaia totona. Unai amo, Iehova ena lauma helaga ese iseda mauri dalana do ia hakaua, bona Iehova ia moalelaia dalanai ia do ita abidadama henia.