OI LALOA KOHU O MONI MOMO ESE MAURI NAMONA BONA MOALE IA HAVARAIA, A? Unai lalohadai dainai, taunimanima milioni momo be hora momo lalonai idia gaukara moni momo idia abia totona. To oi laloa moni bona kohu ese moale korikorina ia mailaia, a? Unai sivarai ese dahaka ia hahedinaraia?

Magasin ta ladana Journal of Happiness Studies, ia gwau, bema iseda mauri durua gaudia ita abia vadaeni, to moni momo ita ura tahua noho unai ese iseda moale o mauri do ia durua lasi. Moni be hekwakwanai ia havaraia lasi. To magasin ladana Monitor on Psychology ia gwau, “moni momo tahua karana ese hekwakwanai bona lalohisihisi ia havaraia.” Unai hereva be lagani 2,000 gunanai Baibel lalonai idia noho sisiba herevana bamona. Baibel ia gwau: “Moni ura henia bada karana be dika idauidau ibounai edia ramuna, bona unai idia ura henia bada dainai, haida ese abidadama idia rakatania bona hisihisi momo amo idia sibodia idia gwadaia.” (1 Timoteo 6:9, 10) Unai hisihisi haida be dahaka?

LALOHEKWARAHI BONA MAHUTA NAMONAMO LASI. “Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.”​—⁠Hadibaia Tauna 5:12.

MONI O KOHU TAHUA MOMO KARANA ESE LALOHISIHISI IA HAVARAIA. Idia moale lasi badina moni tahua urana ia goada bona idia ura kohu momo idia abia. Baibel ia gwau: “Moni ia ura henia noho tauna ese moni do ia abia, to unai moni ena bada be hegeregere lasi ia dekenai.” (Hadibaia Tauna 5:10) Danu, kohu momo ia ura henia bada tauna be mai anina bada gaudia, hegeregere famili bona turadia ida hebamo o Dirava tomadiho henia karadia ia reaia diba.

MONI IA ORE NEGANAI, LALOHISIHISI BONA BADU IA HAVARAIA. “Kohu momo abia totona do oi hekwarahi bada lasi. Bema oi be aonega, unai bamona do oi karaia lasi, Badina kohu momo be do idia ore haraga diba, ugava manu ese ena hanina ia abia isi, bona ia roho lao haraga bamona.”​—⁠Aonega Herevadia 23:4, 5.

DABUA BONA RUMA BE HEGEREGERE. “Ita be tanobada dekenai gau ta ita abia mai lasi, bona gau ta danu do ita abia lao lasi. Unai dainai, bema ita be mai iseda aniani, dabua bona noho gabuna, unai be hegeregere.” (1 Timoteo 6:7, 8) Kohu bona moni momo lasi taudia be idia maumau diba lasi bona edia laloa dalana ese idia ia gimaia idia mama lasi totona. Idia davaria gaudia be hegeregere dainai, idia lalohekwarahi bona lalometau lasi.

HARIHARIBADA KARANA. “Henia kara ena moale be bada, to abia kara ena moale be maragi.” (Kara 20:35) Ma haida dekenai edia kohu o moni idia hariharilaia taudia be idia moale badina idia ura ma haida idia hamoalea, ena be unai ese edia nega bona goada ia haorea. Unai kara idia hahedinaraia dainai hahenamo momo idia abia, hegeregere, ma haida ese idia lalokau henidia, idia matauraidia bona tura korikori ai idia halaodia!​—⁠Luka 6:38.

MA HAIDA LALOA BADA. “Raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.” (Aonega Herevadia 15:17) Unai siri ena anina be dahaka? Mai lalokau ida ma haida kara henia karana ese kohu momo tahua karana ia hereaia. Bona gabeai do ita herevalaia karana, lalokau be mai anina bada.

South America ai, hahine ta ladana, Sabina ese Baibel ai mai anina bada hakaua herevadia ia dibaia. Ena adavana ese ia rakatania dainai, ia hekwarahi bada mauri durua gaudia ia abia ia bona ena natudia kekeni rua totona. Ia be moni gaukara rua ia karaia bona dina ta ta ai 4 oklok dabai ia toreisi. Herevana ena sediual be mai ena hekwarahi, to Sabina be Baibel stadi ia abia dae. Dahaka namo ia abia?

Ena pei be ia idau lasi. To ena mauri dalana ia haidaua! Hegeregere, Baibel amo Dirava ia dibaia dainai ia moale. (Mataio 5:3) Keristani tadikaka taihu huanai tura korikoridia ia davaria. Bona Baibel amo ia dibaia gaudia be mai moale ida ma haida ia durudia.

Baibel ia gwau, “tau ta ese ia karaia kara namodia ese idia hamomokania, ia be aonega tauna.” (Mataio 11:19) Bema ta be ia laloa ia dekenai idia noho gaudia be hegeregere bona hariharibada karana ia hahedinaraia bona danu ma haida edia namo ia tahua guna, unai ese ia hahedinaraia ia be aonega tauna!