“Unai dainai, kerukeru totona umui lalohekwarahi lasi, badina kerukeru danu be mai ena lalohekwarahi. Dina ta ena metau be unai dina sibona ena.”​—MATAIO 6:34.

Anina: Dina ta ta ena lalohekwarahi be mauri ai idia vara gaudia. To namo lasi hari dina ena lalohekwarahi be kerukeru ena ida oi haboua. Dina ta ena lalohekwarahi sibona oi laloa be namo.

• Laloa momo karana ese lalohekwarahi ia havaraia diba. Inai oi tohoa: Ginigunana, namona be oi diba lalohekwarahi haida be do idia vara. Oi haidaua diba lasi gaudia dainai oi laloa momo karana ese lalohekwarahi ia habadaia. Iharuana, namona be ita laloparara, nega momo ita laloa momo gaudia be idia vara lasi.

“Atai amo ia mai aonegana ia abia tauna . . . be . . . ia laloa maoromaoro.”​—IAMESI 3:17.

Anina: Namo lasi oi laloa oi be gau ibounai oi karaia goevagoeva tauna. Namona be oi bona ma haida totona taravatu aukadia atoa karana oi dadaraia.

• Namona be oi manau, dala maorodia badinaia bona oi bona ma haida emui goada ena hetoana oi diba. Unai oi karaia neganai, oi bona ma haida do umui lalohekwarahi momo lasi bona unai ese namo do ia havaraia. Danu, oi moale be namo. Ena be gau haida idia kerere, to bema oi kiri, emu lalohekwarahi ia hamaragia bona do oi moale.

“Ia badu haraga lasi tauna, be mai ena lalona kehoa.”​—AONEGA HEREVADIA 17:27.

Anina: Bema oi badu haraga, lalohadai kereredia ese lalohadai maorona ia hakererea diba.

• Oi dekenai lalohekwarahi ia havaraia gaudia bona edena bamona do oi kara, oi diba be namo. Hegeregere, oi lalohekwarahi neganai, emu lalohadai, hemami bona kara oi diba be namo, eiava pepa dekenai oi torea diba. Bema oi dekenai lalohekwarahi idia havaraia gaudia oi lalopararalaia, hanaia daladia do oi diba namonamo. Danu, dala haida oi laloa lalohekwarahi ia havaraia gaudia oi haorea totona. Bema unai ia gaukara lasi, dala namodia ma haida oi tahua, hegeregere emu gaukara do oi karaia namonamo dalana ta oi tahua, eiava emu nega oi haria namonamo.

• Oi itaia gaudia hegeregerena, emu lalohadai oi haidaua be namo. Oi dekenai ia vara lalohekwarahi be reana ma ta dekenai do ia vara lasi. Badina ta ta ena lalohadai be idauidau. Mani inai dala toi oi laloa:

  1. Namo lasi ta dekenai lalohadai kererena oi abia haraga. Hegeregere, laini ai oi gini bena ta be oi ia hanaia bona vairana dekenai ia gini. Bema oi laloa inai tauna ia karaia karana be kerere, reana do oi badu. To, namona be oi abia dae unai ia karaia be mai ena badina. Reana emu lalohadai be maoro!

  2. Gau ta ia vara neganai, ena namo oi laloa. Doketa ta itaia totona eiava airport ai oi naria daudau karana oi haheaukalaia diba, badina unai nega oi gaukaralaia diba duahiduahi haida oi karaia eiava emu gaukara ena email oi sekea totona.

  3. Do ia vara gauna oi lalohadailaia. Sibona oi nanadaia, ‘Inai hekwakwanai be kerukeru eiava vaira wiki ai, do ia bada, a?’ Nega kwadogi lalonai idia vara hekwakwanai eiava hekwakwanai maragidia bona badadia edia idau oi lalopararalaia.

“Namona be gau ibounai do umui karaia namonamo bona dala maorona ai do umui karaia.”​—1 KORINTO 14:40.

Anina: Emu mauri ai gau ibounai be dala maorona dekenai oi karaia namonamo.

• Iseda mauri ai, nega haida ita ura dala maorona dekenai gaudia ita karaia namonamo. Gaudia oi karaia namonamo lasi karana bona lalohekwarahi ia havaraia diba gauna ta be, gaukara ta oi haorea haraga lasi karana (procrastination), bona unai ese oi haorea lasi gaukaradia do ia habadaia. Mani inai dala rua oi tohoa.

  1. Sediual namona ta karaia, bona oi badinaia.

  2. Gaukara ta oi haorea haraga lasi karana (procrastinate) ena badina oi tahua bona hamaoromaoroa be namo.

“To sedira aniani sisina sibona mai laga-ani danu ena namo ese hekwarahi bada, bona lai lulua kava kara ena namo ia hereaia noho.”​—HADIBAIA TAUNA 4:6.

Anina: Idia gaukara momo taudia be sibodia edia “hekwarahi bada” ena namo do idia moalelaia lasi. Reana idia be nega eiava goada be lasi.

• Gaukara bona moni dekenai lalohadai maorona oi abia. Moni momo abia karana ese ia hahedinaraia lasi do oi moale bada eiava lalohekwarahi do ia hamaragia. To, Hadibaia Tauna 5:12 ia gwau: “Kohu momo tauna ena gau momo dainai ia laloa hekwarahi, bona ia mahuta namonamo lasi.” Namona be oi dekenai ia noho moni sisina oi gaukaralaia namonamo.

• Nega oi atoa oi laga-ani totona. Bema oi karaia gaudia oi moalelaia, lalohekwarahi oi hamaragia diba. To, moale karadia haida hegeregere, TV itaia karana ese oi do ia durua lasi.

• Nega maorona ai fon bona kompiuta bamona gaudia oi gaukaralaia namonamo. Email, teks meseij, eiava social media idauidau oi sekea loulou karana oi dadaraia be namo. Namo lasi gaukara lasi negadiai emu email oi sekea, to bema ia be mai anina bada, vadaeni oi sekea diba.

“Tauanina treinia karana be mai ena namo”​—1 TIMOTEO 4:8.

Anina: Eksasais hanaihanai karana ese helt ia hanamoa.

• Tauanina ia durua karadia oi hagoadaia. Gaukara idauidau oi karaia karana ese emu hemami do ia hanamoa bona lalohekwarahi do ia hamaragia. Aniani maorodia oi ania, to namo lasi aniani oi reaia. Namona be nega korikori ai oi mahuta.

• Lalohekwarahi hamaragia totona, namo lasi gau dikadia haida ita abia hegeregere, kuku eiava drag ania karana bona alkahol inua karana. Badina gabeai, inai gaudia ese lalohekwarahi do idia habadaia, emu helt do ia hadikaia bona hekwarahi amo oi abia monina be do ia ore.

• Bema emu lalohekwarahi ia bada ia lao, emu doketa oi itaia be namo. Oi hemarai lasi medikol heduru abia totona.

“Mai anina bada gaudia do umui diba.”​—FILIPI 1:10.

Anina: Mai anina bada gaudia atoa guna karana oi laloa namonamo.

• Emu lista dekenai mai anina bada gaudia oi atoa guna. Unai ese oi do ia durua mai anina bada gaukaradia do oi laloa bona do oi diba edena gaukara be gabeai do oi karaia, edena do oi haria eiava do oi kokia.

• Wiki ta lalonai emu nega oi gaukaralaia dalana oi torea diho. Bena emu nega oi gaukaralaia namonamo daladia oi tahua. Bema emu nega oi gaukaralaia namonamo, do oi lalohekwarahi momo lasi.

• Nega oi atoa oi laga-ani totona. Ena be nega kwadogi sibona oi laga-ani, to unai ese oi dekenai goada do ia henia bona emu lalohekwarahi do ia hamaragia.

“Laloa metau ese oiemu moale do ia koua, to hereva namodia ese oi idia hamoalea diba.”​—AONEGA HEREVADIA 12:25.

Anina: Ma haida be mai hebogahisi ida idia hereva neganai, emu hemami do ia namo.

• Ia laloparara tauna ida emu hekwakwanai oi herevalaia. Tura namona ta ese dala idauna ta ai oi do ia durua diba eiava oi laloaboio heduru dalana ta be oi do ia hadibaia. Emu lalometau oi gwauraia karana ese emu hemami do ia hanamoa.

• Heduru oi noia. Ta dekenai gaukara oi henia eiava oi haria diba, a?

• Bema oi ida ia gaukara tauna be oi dekenai lalohekwarahi ia henia, namona be hanamoa daladia oi tahua. Hegeregere, dala maorona ai unai tauna dekenai emu hemami ia hadikaia dalana oi gwauraia diba, a? (Aonega Herevadia 17:27) Bema unai ia gaukara lasi, unai tauna do oi bamoa momo lasi, a?

“Dirava dibaia totona idia hitolo taudia be idia moale, badina guba Basileia be idia edia.”​—MATAIO 5:3.

Anina: Ita be taunimanima sibona dainai, aniani, dabua bona ruma ita abia sibona lasi, to Dirava ita dibaia danu be namo. Unai dainai ita moale totona, namona be Dirava dibaia karana ita laloa bada bona ita badinaia.

• Guriguri ese oi ia durua diba. Dirava ia ura ‘emu lalohekwarahi ibounai be ia dekenai oi negea, badina ia be oi ia laloa bada.’ (1 Petero 5:7) Guriguri bona emu abidadama ia hagoadaia gaudia oi laloa karana ese lalomaino ia havaraia diba.​—Filipi 4:6, 7.

• Abidadama hagoadaia gaudia oi duahia karana amo Dirava kahirakahira do oi lao. Inai magasin ai idia noho hakaua herevadia be Baibel amo, idia ese oi do ia hagoadaia Dirava oi dibaia totona. Danu unai ese “aonega bona laloa kehoa” do ia habadaia. (Aonega Herevadia 3:21) Namona be nega oi atoa Baibel oi duahia totona. Reana Aonega Herevadia bukana ai oi hamatamaia diba.