TANOBADA BE DO IA NAMO LOU
Hodahoda
HODAHODA be mai anina bada, to hahodi sibona totona lasi. Hodahoda ese dina ena siahu dikana (radiation) amo tanobada ia gimaia. Bema hodahoda be lasi, tanobada ibounai be do ia keru momokani.
Hodahoda Dekenai Dahaka Ia Vara?
Hodahoda dikana ese tanobada ai mauri gaudia ia hamasea diba. World Health Organization ia gwau, tanobada ai taunimanima 1 pesen sibona ese hodahoda goevana idia hahodia.
Hodahoda dikana dainai taunimanima be edia baragi dekenai kensa gorere bona kudou gorere idia abia danu. Lagani ta ta ai, hodahoda dikana dainai taunimanima 7,000,000 be idia do buruka lasi neganai idia mase.
Tanobada be Sibona Ia Hagoevaia Diba
Dirava ese tanobada ia karaia neganai, tanobada be mauri gaudia ibounai totona hodahoda goevana ia halasia diba. To unai ia vara totona, namona be taunimanima ese hodahoda idia hadikaia gaudia do idia karaia lasi. Mani inai haheitalai haida ita laloa.
-
Momo idia diba uda badadia ese hodahoda amo carbon dioxide idia kokia. To momo idia diba lasi gauna be, davara ena kone kahanai idia tubu magoro audia be gaukara badana idia karaia danu. Magoro ese hodahoda amo carbon dioxide ia kokia karana be nega 5 amo uda badadia ese idia karaia gaukara ia hereaia.
-
Vanegai saiens taudia ese tahua gaukara ta amo idia davaria, davara ai ia tubu ava badana ta ladana kelp be atmosfia amo carbon dioxide ia kokia bona ia guria. Kelp ena raurau be baege maragina bamona bona hodahoda amo ia honu dainai, gabu daudau dekenai ia hure lao diba. Bena unuseniai ia pou bona carbon dioxide amo ia honu kelp be davara ena dobu momokani gabunai ia mutu diho, bona lagani handred momo lalonai unuseniai ia noho.
-
Iseda atmosfia be miro gaudia amo sibona ia hagoevaia diba karana be COVID-19 lockdown lalonai ita itaia. Lagani 2020 ai, faktori bona motuka idia gaukaralaia momo lasi dainai, idia halasia kwalahu dikana ia ore bona hodahoda be ia goeva haraga. Lagani “2020 World Air Quality Report” ese ia hahedinaraia, tano ibounai amo 80 pesen idia gwau lockdown idia hamatamaia neganai, hodahoda be ia goeva.
Taunimanima be Dahaka Idia Karaia?
Basikele idia gaukaralaia neganai, hodahoda hamiroa karana do ia hamaragia
Gavamani ese bisinesi taudia idia hadibaia hodahoda hamiroa gaudia idia hamaragia totona. Danu, saiens taudia be hodahoda ia hamiroa gaudia koua totona tahua gaukara idia karaia. Hegeregere, idia davaria gauna ta be ita itaia diba lasi mauri gaudia maragidia (microbes) idia gaukaralaia gesi dikadia idia haidaua bona gau namodia ai idia halaoa. Danu, diba bada taudia ese taunimanima idia hamaoroa namona be idia raka eiava basikele do idia gaukaralaia, bona edia ruma ai kwalahu dikadia idia halasia gaudia do idia gaukaralaia lasi.
Gavamani taudia haida be hodahoda dikana hamaragia totona, taunimanima dekenai stove matamata idia henia, to momo be unai gaudia idia do abia lasi
To, lagani 2022 ai orea haida hegeregere, World Health Organization bona World Bank edia ripoti amo idia hahedinaraia gau ma haida ita karaia be namo.
Unai ripoti ia gwau lagani 2020 ai, tanobada ibounai ai taunimanima 33 pesen bamona be idia nanadu neganai hodahoda ia hadikaia gaudia idia gaukaralaia. Danu gabu momo ai, taunimanima momo be idia hegeregere lasi stove matamata eiava kwalahu dikana ia havaraia lasi gaudia idia hoia totona.
Baibel Ena Hereva be Dahaka?
“Iehova be Dirava momokanina bona guba ia Havaraia Tauna, . . . tanobada bona tubutubu gaudia ia havaraia Diravana, tanobada ai idia noho taudia dekenai laga bona mauri siahuna ia henia.”—ISAIA 42:5.
Dirava ena siahu be ia noho hanaihanai bona taunimanima ia lalokau henia dainai, ia ese ita hahodia hodahoda ia havaraia bona hodahoda ia hagoevaia loulou daladia ia atoa danu. Unai dainai, ita diba momokani hodahoda idia hadikaia gaudia ibounai do ia kokia vaitani. Atikol ladana “Dirava Ia Gwauhamata Tanobada Do Ia Namo Lou” itaia.
