Ia Abia Dae Gaudia be Ena Klas Turadia ida Ia Herevalaia

OI URA emu klas turadia oi durua Baibel amo oi dibaia gaudia idia lalopararalaia namonamo totona, a? Magdalena, ena mauri lagani be 18 kekenina, be Poland ena haisikuli ta dekenai ia sikuli, ia be Iehova ena Witnes kekenina ta dainai, nega momo ena sikuli turadia dekenai ia abia dae gaudia ia herevalaia. Unai dainai, nega momo sikuli turadia idia henanadai, ‘Iehova ena Witnes tauna ta ai oi lao ena anina be dahaka?’ bona ‘Iesu Keriso oi abidadama henia, a?’ Edena bamona ena klas turadia ia durua? Magdalena be Iehova ena hakaua dalana totona ia guriguri bona unai hegeregerena ia kara.​​—⁠Iamesi 1:⁠5.

Dina ta, Magdalena ese ia abia dae gaudia ia matauraia tisa hahinena ta ia nanadaia, bema vidio ladana Jehovah’s Witnesses​​—⁠The Organization Behind the Name * be klas taudia dekenai ia hahedinaraia diba. Tisa ia lalotamona. Bena Magdalena ese ena klas turadia ia hamaoroa: “Egu turana ta do lau boiria mai bona klas taudia dekenai miniti 90 program ta do ai hahedinaraia. Iehova ena Witnes taudia do ai herevalaia bona vidio ta do ai hahedinaraia. Umui ura umui mai, a?” Ibounai idia gwau, oibe. Magdalena bona Wojciech, haroro gaukara ia manadalaia ful-taim hesiai tauna ta, be dala idia hegaegaelaia matamaia.

Edia palani be, Iehova Ena Witnes Taudia​​—⁠Idia be Daidia? Dahaka Idia Abia Dae?* buklet amo hamatamaia herevana be miniti 20 lalonai do idia gwauraia, bena henanadai bona haere amo idia karaia. Unai murinai sikuli ena laiberi dekenai vidio do idia hahedinaraia. Danu, klas ena stiuden ta ta dekenai harihari gauna ta do idia henia. Unai be envelop badana ta, bona ia lalonai be buklet haida, Memero Kekeni Edia Henanadai​—⁠Haere Maorodia* bukana, pepapepa bona magasin haida idia udaia.

Unai dina ai, ena klas turadia 14, tisa, bona laiberi ai idia noho stiuden ma foa dekenai unai vidio idia hahedinaraia. Matamanai, Wojciech ese Poland ena ane bona buka torea taudia haida edia buka lalonai Dirava ena ladana, Iehova, idia gaukaralaia karana ia herevalaia. Bona ia hahedinaraia danu Katolik edia buka gunadia haida lalonai Dirava ena ladana ia noho. Iehova ena Witnes taudia ese hari idia karaia gaukarana ia herevalaia neganai, brens opesi idauidau bona Assembly Hall haida edia laulau ia hahedinaraia danu.

Unai murinai, kamonai taudia ida idia herevahereva matamaia. Magdalena bona Wojciech be Baibel idia gaukaralaia henanadai idia haerelaia totona. Unai ese kamonai taudia edia lalona ia hamarerea bona idia abia dae momokani Iehova ena Witnes taudia be sibona edia lalohadai idia harorolaia lasi. Stiuden taudia edia henanadai haida be dahaka, bona Magdalena bona Wojciech ese edena dala amo idia haerelaia?

Henanadai: Baibel be hereva aukadia bona laulau herevadia amo ia honu, bona ena anina be dala idauidau ai idia gwauraia diba. Edena dala ai Baibel ena taravatu ita badinaia diba?

Haere: Haida idia gwau Baibel be vaiolin bamona badina tiuni idauidau ai oi gadaralaia diba. To, mani oi laloa: Bema oi ura toretore tauna  ta ese ia torea herevadia edia anina oi diba, ia do oi nanadaia, ani? Tanobada ai buka torea taudia momo be idia mase vadaeni, to Baibel ia Torea Tauna, Iehova Dirava be ia mauri noho. (Roma 1:​20; 1 Korinto 8:​5, 6) Siri ma ta ena badina siridia ese unai hereva ena anina maorona ia hahedinaraia diba. Bona danu, nega momo Baibel ena siri haida ese gau tamona idia herevalaia, unai dainai unai siri idauidau ita hahegeregerea karana ese ita do ia durua. Unai amo Dirava ese iseda lalohadai ia hakaua, hegeregere ia sibona ese ita dekenai unai siri ia gwauraia hedinarai. Unai ita karaia neganai, iena ura Baibel lalonai do ita diba bona unai ura do ita badinaia, ani?

Henanadai: Keristani taudia bona Iehova ena Witnes taudia edia idau be dahaka?

Haere: Ai be Keristani taudia! To Iehova ena Witnes taudia idia gwau sibona lasi idia be Keristani taudia, idia hekwarahi idia abia dae gaudia bona Dirava ese edia namo totona ia hadibaia gaudia idia badinaia. (Isaia 48:​17, 18) Edia hadibaia hereva ibounai be Baibel amo dainai, idia diba hereva momokani be idia dekenai ia noho.​​—⁠Mataio 7:​13, 14, 21-​23.

Henanadai: Dahaka dainai umui diba lasi taudia dekenai umui lao bona umui hereva henidia? Unai ena anina be ma haida umui doria umui abia dae gaudia idia badinaia totona, a?

Haere: Bema ta be dala dekenai oi ia hereva henia mai ena manau ida, bona ia ura oiemu lalohadai gau ta dekenai ia dibaia, oi laloa unai be kerere, a? (Ieremia 5:1; Sepanaia 2:​2, 3) (Wojciech bona Magdalena ese haheitalai ta idia karaia. Idia karaia dalana be idia raka hanai taudia idia nanadaia bema Dirava ese vanegai Poland dekenai ia vara abata lalonai dika idia davaria taudia ia laloa eiava lasi.) Ta ena lalohadai ai kamonai murinai, Baibel ena lalohadai ai hahedinaraia. Bema ta ia ura lasi hereva, ai bamahuta henia bona ma ta dekenai ai lao. (Mataio 10:​11-​14) Unai be ma haida ai doria ai ida idia herevahereva totona, a? Eiava taunimanima idia herevahereva lasi be namo, a?

Henanadai: Dahaka dainai holide dinadia umui moalelaia lasi?

Haere: Ai be Baibel ese ia gwauraia hebouna​—⁠Iesu Keriso ena mase ena Memorial​—⁠sibona ai hahelagaia. (1 Korinto 11:​23-​26) Holide dinadia totona, ensaiklopidia bona buka ma haida amo edia hamatamaia daladia oi tahua diba. Bema unai bamona oi karaia, do oi diba dahaka dainai ai be unai bamona dinadia ai moalelaia lasi.​​—⁠2 Korinto 6:​14-​18.

Henanadai momo idia henia bona idia haerelaidia. Unai herevahereva karana be nega bada ia abia dainai vidio idia hahedinaraia lasi.

Stiuden taudia be edena bamona idia kara? Magdalena ia gwau: “Lau hoa badina nega momo ma haida dekenai kavakava karadia idia karaia bona idia hevaseha henia stiuden taudia ese anina bada henanadai idia henidia. Ena be idia gwau Dirava be ia noho lasi, to unai herevahereva lalonai Dirava abidadama henia karana idia hahedinaraia!” Idia kamonai taudia ibounai ese mai moale ida unai harihari gaudia idia abia dae​​—⁠buka ibounai 35, buklet 63, bona magasin 34 idia hariharilaia.

Unai sikuli projek ese anina namona ia havaraia! Unai projek dainai, Magdalena ena klas turadia be Iehova ena Witnes taudia idia dibaia namonamo sibona lasi, to matamata taudia momo ia hagoadaia mauri ena anina idia laloa totona. Namona be dala oi karaia emu klas turadia oi durua toho oi abia dae gaudia idia dibaia totona, ani?

[Footnote]

[Picture on page 31]

Magdalena bona Wojciech be unai herevahereva totona idia hegaegae