Emui Lalona Ibounai ida Lohiabada Ena Gaukara Karaia

“Gaukara goada. Gaukara lalonai do umui lahedo lasi. Lohiabada ena gaukara do umui karaia, mai emui lalona ibounai.”​​—⁠ROMA 12:⁠11.

1. Dahaka dainai Israela taudia ese animal bona boubou gaudia ma haida idia bouboulaia?

 IEHOVA ena hesiai taudia be Ia idia lalokau henia bona ena ura idia karaia totona boubou gaudia idia henia neganai, Iehova be mai moale ida ia abia dae. Idaunega Israela ai, Iehova be animal bona boubou gaudia ma haida ia abia dae. Mose ena Taravatu hegeregerena, Iehova dekenai edia tanikiu karana idia hahedinaraia eiava edia kara dika Ia gwauatao totona, unai boubou gaudia idia henia. To, hari Keristani kongrigeisen lalonai, Iehova ia gwau lasi unai bamona animal o gau ma haida do ita bouboulaia. To, aposetolo Paulo be Roma Keristani taudia ia tore henidia neganai, Roma karoa 12 lalonai ia hahedinaraia Dirava ia ura ita be boubou gaudia do ita henia danu. Mani ita itaia edena bamona unai do ita karaia.

Iseda Tauanina be Boubou Gauna Bamona

2. Ita Keristani taudia be edena bamona mauri dalana do ita badinaia, bona edena bamona unai ita karaia diba?

² Roma 12:​1, 2 duahia. Paulo ena revareva matamanai, ia hahedinaraia Dirava ese horoa Keristani taudia iboudiai, Iuda taudia o Idau Bese taudia, be edia Taravatu badinaia karana dainai lasi, to edia abidadama dainai ia gwauraidia maoro. (Roma 1:​16; 3:​20-​24) Karoa 12 ai, Paulo ia gwau Keristani taudia be Dirava dekenai edia tanikiu karana idia hahedinaraia totona, sibona edia ura idia dadaraia be namo. Unai ita karaia totona, namona be iseda lalohadai do ita haidaua. Ita be Adamu ena natudia dainai, “kara dika bona mase edia taravatu” ena siahu henunai ita noho. (Roma 8:⁠2) Unai dainai, namona be ‘iseda laloa bona kudouna do ita hamatamataia, be gau badana.’ (Efe. 4:23) Dirava bona ena lauma helaga edia heduru sibona amo unai ita karaia diba. Unai dainai, namona be ita gaukara goadagoada. Ita hekwarahi “inai tanobada taudia edia kara bamona do [ita] karaia lasi,” anina be edia matabodaga karadia, moale karadia bona lalohadai kereredia do ita dadaraia.​​—⁠Efe. 2:​1-3.

3. Dahaka dainai Keristani hesiai gaukara idauidau ita karaia?

³ Paulo ia ura do ita laloa maoromaoro, unai amo do ita “diba edena kara be namo, edena kara Dirava ia ura henia, bona edena kara be goeva momokani.” Dahaka dainai dina ta ta ai Baibel ita duahia, ita laloa dobu, ita guriguri, Keristani hebou ita lao bona Basileia ena sivarai namona ita harorolaia? Elda taudia ese ita idia oda henia dainai ita karaia, a? Momokani, elda taudia ese ita idia hadibaia lou lou dainai, ita tanikiu henidia be namo. To, Keristani hesiai gaukara idauidau ita karaia ena badina korikorina be, Dirava ena lauma helaga ese ita ia hasiahua bona Iehova ita lalokau henia. Bona danu, ita laloparara momokani Dirava ena ura be ita ese Iena hesiai gaukara do ita karaia. (Sek. 4:6; Efe. 5:​10) Keristani mauri dalana ita badinaia dainai ita moale, badina ita laloparara Iehova ese ita do ia abia dae.

Dirava ese Ia Henia Diba Idauidau

4, 5. Edena dala ai elda taudia ese edia diba idauidau idia gaukaralaia be namo?

⁴ Roma 12:​6-8, 11 duahia. Paulo ia gwau: “Dirava ese ita ia henia hegeregerena, inai diba ita gaukaralaia be namo.” Elda taudia ese idia abia diba be taunimanima idia hagoadaia bona kongrigeisen idia naria. Unai dainai, namona be elda taudia be “mai goada danu” unai gaukara do idia karaia.

⁵ Paulo ma ia gwau elda taudia be hadibaia  taudia bamona mai goada ida “taunimanima durua” gaukarana do idia karaia. Ia hahedinaraia unai gaukara be “tauanina tamona” o kongrigeisen lalonai do idia karaia. (Roma 12:​4, 5) Unai “taunimanima durua” gaukara be Paulo ese Kara 6:​4, (NW ) ai ia herevalaia gaukarana hegeregerena: “Ai be guriguri bona Dirava ena hereva ena hadibaia gaukarana do ai goadalaia.” Unai gaukara lalonai elda taudia be edia diba idia gaukaralaia namonamo kongrigeisen taudia idia hagoadaia totona. Namona be elda taudia ese kongrigeisen dekenai hakaua herevadia idia henia. Unai gaukara idia karaia namonamo totona, Baibel bona buka ma haida edia hereva idia tahua, kongrigeisen dekenai tok idia henia bona mamoe vadivadi gaukara idia karaia. Elda taudia ese unai gaukara ibounai idia karaia neganai, idia hamomokania idia be “taunimanima durua” gaukara idia karaia namonamo. Namona be elda taudia ese edia diba idia gaukaralaia namonamo bona mai moale ida mamoe idia naria.​​—⁠Roma 12:​7, 8; 1 Pet. 5:​1-3.

6. Edena dala ai Roma 12:⁠11 ena sisiba ita badinaia diba?

⁶ Paulo ma ia gwau: “Gaukara goada. Gaukara lalonai do umui lahedo lasi. Lohiabada ena gaukara do umui karaia, mai emui lalona ibounai.” Bema ita mamia iseda haroro gaukara dekenai ita lahedo, namona be sibona eda stadi karana do ita hanamoa bona hanaihanai Iehova ena lauma helaga ena heduru totona do ita noinoi. Unai ese ita ia durua lahedo karana ita rakatania bona ita haroro goadagoada lou totona. (Luka 11:⁠9, 13; Apok. 2:4; 3:​14, 15, 19) Oibe, lauma helaga ese Keristani ginigunadia ia hasiahudia “Dirava ena hoa gaudia idia herevalaia” totona. (Kara 2:​4, 11) Unai hegeregerena, ita ia hasiahua diba ‘mai iseda lalona ibounai ida’ iseda haroro gaukara ita karaia totona.

Manau Karana

7. Dahaka dainai mai manau ida Iehova ita hesiai henia be namo?

⁷ Roma 12:​3, 16 duahia. Iehova ena “hariharibada” dainai, ita dekenai diba idauidau ia henia. Siri ma ta dekenai Paulo ia gwau: “Dirava sibona ese aonega ai dekenai ia henia, vadaeni inai gaukara ai karaia diba.” (2 Kor. 3:⁠5) Unai dainai ita sibona eda ladana do ita abia isi lasi. Namona be ita laloatao, ita sibona eda goada o diba dainai lasi, to Iehova ese iseda gaukara ia hanamoa dainai anina namona ita havaraia. (1 Kor. 3:⁠6, 7) Unai hegeregerena, Paulo ia gwau: “Umui ta ta ibounai dekenai lau hamaoroa inai: Oi hekokoroku lasi.” Oibe, namona be lalohadai maorona ita abia bona mai moale ida Iehova ena hesiai gaukara ita karaia. Bema ita manau bona iseda goada hegeregerena Dirava ita hesiai henia, ma haida edia gaukara do ita maumauraia lasi. Ita “laloa maoromaoro” be gau badana.

8. Edena dala ai ‘sibona iseda aonega do ita hekokorokulaia lasi’?

⁸ Ita sibona ese ita karaia gaudia ita hekokorokulaia be maoro lasi. Namo lasi ita laloa iseda hesiai gaukara ese ma haida edia ia hereaia. Badina  “Dirava sibona ese hadoa gauna ia hatubua.” (1 Kor. 3:⁠7) Danu, Paulo ia gwau: “Dirava ese umui ta ta dekenai abidadama ia henia hegeregerena.” Namona be ita abia dae idia be edia abidadama hegeregerena edia gaukara idia karaia noho. Paulo ma ia gwau: “Do umui noho hebou mai moale bona lalona tamona danu.” Paulo ena revareva ma ta lalonai, ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ ” (Fili. 2:⁠3) Bema ita be manau taudia, do ita abia dae iseda tadikaka bona taihu ta ta edia gaukara ese iseda gaukara ia hereaia. Ita manau dainai, ‘ita sibona iseda aonega do ita hekokorokulaia lasi.’ Nega haida, tadikaka ta be kongrigeisen lalonai maduna ia abia neganai, haida ese ena ladana do idia abia isi, to namona be ia manau bona taunimanima ese idia laloa bada lasi gaukara ia karaia, unai amo ena hesiai gaukara do ia moalelaia.​​—⁠1 Pet. 5:⁠5.

Kongrigeisen ai Ia Noho Lalotamona

9. Dahaka dainai Paulo ia gwau horoa Keristani taudia be tauanina ena kahana idauidau bamona?

⁹ Roma 12:​4, 5, 9, 10 duahia. Paulo ia gwau horoa Keristani taudia be tauanina ta ena kahana idauidau bamona mai lalotamona ida edia Kwarana, Keriso henunai idia gaukara hebou. (Kol. 1:​18) Horoa Keristani taudia ia hamaorodia tau ta ena tauanina ena kahana be momo bona kahana ta ta be mai edia gaukara idauidau, bona idia be “taunimanima momo, to Keriso lalonai [idia] be tauanina tamona.” Unai hegeregerena, Paulo ese Efeso ena horoa Keristani taudia ia sisiba henidia ia gwau: “Ita ese taunimanima do ita lalokau henia, bona inai lalokau dekena amo, hereva momokani do ita gwauraia. Vadaeni Keriso ena mauri dala lalonai do ita tubu daekau momokani, bona Keriso be iseda orea ena kwarana. Keriso be kwarana dainai, tauanina ena kahana ibounai be ia dainai idia noho hebou bona idia gaukara hebou, bona kara ibounai be laloa tamona dekena amo idia karaia. Ta ta edia gaukara, edia gaukara korikori idia karaia noho. Unai dala dekenai tauanina be lalokau dekena amo ia tubu daekau noho.”​​—⁠Efe. 4:​15, 16.

10. “Mamoe idaudia” ese daika ena kwara dagina idia matauraia be namo?

¹⁰ Ena be “mamoe idaudia” be unai orea lalonai idia noho lasi, to unai haheitalai amo gau momo idia dibaia. (Ioa. 10:16) Paulo ia gwau Iehova “ese gau ibounai Keriso ena aena henunai ia atoa, bona ia ese ekalesia ena kwarana momokani Keriso ia halaoa.” (Efe. 1:​22) Hari inai negai, mamoe idaudia be Iehova ese iena Natuna henunai ia atoa “gau ibounai” lalonai idia noho. Bona, idia be Keriso ese iena “hesiai tauna mai ena kamonai, bona mai ena kara maoromaoro” dekenai ia henia “kohu ibounai” lalonai idia noho danu. (Mat. 24:​45-​47) Unai dainai, tanobada helarona idia abia taudia ese edia Kwarana, Keriso do idia matauraia, bona hesiai tauna mai ena kamonai bona mai ena kara maoromaoro bona ena Hakaua Oreana bona kongrigeisen elda taudia do idia kamonai henia. (Heb. 13:​7, 17) Unai ese Keristani lalotamona ia havaraia.

11. Dahaka dainai mai lalotamona ida ita noho hebou diba? Paulo be dahaka sisiba ma haida ia henia?

¹¹ Lalokau dainai ita “noho hebou namo herea, mai laloa tamona danu.” (Kol. 3:​14) Roma karoa 12 ai, Paulo ese unai hereva ia hamomokania danu, ia gwau: “Taunimanima umui lalokau henia koikoi lasi, to umui lalokau henia momokani. . . . Umui ta ta do umui lalokau henia, tadikaka edia lalokau ta ta dekenai bamona.” Unai ese ta ta matauraia karana ia havaraia. Paulo ia gwau: “Umui ta ta dekenai danu do umui matauraia.” Momokani, iseda tadikaka ita lalokau henia be maoro, to bema ia kerere, namo lasi iena kerere ita hunia. Namona be ita hekwarahi kongrigeisen ia goeva noho totona. Paulo be lalokau ia herevalaia neganai, ia gwau: “Dika do umui negea momokani, to namo do umui dogoatao momokani.”

Heduru Bona Heabidae Karana

12. Makedonia tadikaka edia haheitalai amo dahaka ita dibaia?

¹² Roma 12:​13 duahia. Iseda tadikaka ita lalokau henidia dainai, iseda imana ena goada hegeregerena, ‘Dirava ena taudia be mai edia gau  lasi neganai, ita durudia.’ Herevana, ita ogogami, ita dekenai ia noho gaudia be ma haida dekenai ita hariharilaia diba. Paulo be Makedonia Keristani tadikaka ia herevalaidia, ia gwau: “Hisihisi bada idia davaria gaudia ese edia haheauka idia tohoa, to edia moale be ia bada herea noho. Momokani edia ogogami be ia bada, to edia durua idia henia bada herea. Lau gwauraia hedinarai momokani, idia edia goada hegeregerena idia henia, ma edia goada ia hanaia gauna danu. Bona idia sibona edia ura dainai, ai dekenai idia noinoi, edia moni haida do ai abia lao, Dirava ena taudia Iudea dekenai durua totona.” (2 Kor. 8:​2-4) Oibe, Makedonia Keristani tadikaka be idia ogogami momokani, to idia ese ma haida dekenai heduru bada idia henia. Idia laloa edia tadikaka Iudea dekenai idia dabu dainai, do idia durudia be hahenamo badana ta.

13. Inai hereva “emui ruma dekenai do umui abidia dae” ena anina be dahaka?

¹³ Inai hereva “emui ruma dekenai do umui abidia dae” be Greek gado herevana ta amo idia hahanaia bona ena anina be ita ese heabidae karana do ita hahedinaraia guna. The New Jerusalem Bible ia gwau: “Heabidae daladia do umui tahua.” Nega haida heabidae karana ita hahedinaraia bema ta be iseda ruma dekenai ita boiria bona ia ida ita aniani hebou. Bema mai lalokau korikori ida unai ita karaia, unai be kara namo hereana. To, bema ita ura ma haida dekenai heabidae karana ita hahedinaraia guna, dala idauidau ai unai ita karaia diba. Oibe, ita haida be moni lasi o ita gorere dainai, iseda ruma dekenai haida ita boiria lasi ita aniani hebou totona, to idia ita boiria diba kofi o ti kavakava sibona ita inua hebou be hegeregere. Unai be heabidae kara namona ta.

14. (a) Greek gado herevana idia hahanaia “heabidae” ena kahana rua edia anina be dahaka? (b) Iseda haroro gaukara lalonai, edena dala ai idau tano taudia dekenai heabidae karana ita hahedinaraia diba?

¹⁴ Heabidae karana ese ia hahedinaraia ita be edena bamona taudia. Greek gado herevana idia hahanaia “heabidae” be mai ena kahana rua; ta ena anina be “lalokau” bona ma ena ta anina be “idau tauna.” Iseda lalohadai be dahaka idau tano taudia dekenai? Keristani taudia haida be edia tano dekenai idia mai idau tano taudia edia gado idia dibaia, unai amo edia gado korikorina ai sivarai namona idia harorolaia diba​—⁠unai be heabidae karana ta. Momokani, ita ibounai be gado ta ita dibaia diba lasi. To, ita ibounai ese Good News for People of All Nations buklet amo idau tano taudia ita haroro henia diba. Ia lalonai Baibel ena sivarai namona be gado idauidau ai idia torea. Inai buklet oi gaukaralaia dainai, ekspiriens namodia haida oi davaria, a?

 Ma Haida Edia Hemami Laloa

15. Edena dala ai Iesu ena kara be Roma 12:⁠15 ena sisiba hegeregerena?

¹⁵ Roma 12:15 duahia. Paulo ena hereva anina be ma haida edia hemami do ita laloa. Ma ta ia moale neganai ita danu ita moale, bona ia lalohisihisi neganai ena hisihisi ita mamia be namo. Bema ita be mai iseda lalona ibounai ida Lohiabada ena gaukara ita karaia, iseda tadikaka ese idia moalelaia o lalohisihisilaia gaudia do ita mamia diba. Keriso ena hahediba taudia 70 be haroro gaukara amo idia giroa lou, bona edia gaukara namona be Iesu dekenai mai moale ida idia gwauraia neganai, Iesu “ia moale bada” danu. (Luka 10:​17-​21) Oibe, idia moale dainai, ia danu ia moale. To, ma nega ta ai, Iesu ena turana Lasaro ia mase neganai, ‘idia taitai taudia danu ia tai.’​​—⁠Ioa. 11:​32-​35.

16. Edena dala ai ma haida edia hemami ita laloa bada diba, bona daidia ese unai idia badinaia be gau badana?

¹⁶ Namona be Iesu ena haheitalai do ita tohotohoa. Iseda Keristani tadikaka o taihu ta be gau ta dainai ia moale neganai, ia danu ita moale be namo. Unai hegeregerena, iseda tadikaka o taihu idia lalohisihisi neganai, idia danu ita lalohisihisi hebou be namo. Iseda tadikaka o taihu ta be gau ta dainai ia lalohisihisi neganai, ia ita hagoadaia diba bema mai hebogahisi ida ena lalohisihisi herevadia ita kamonai. Nega haida edia sivarai ita kamonai neganai, edia lalohisihisi ita mamia dainai ita tai danu. (1 Pet. 1:​22) Elda taudia ese Paulo ena sisiba, ma haida edia hemami laloa bada karana dekenai idia badinaia be gau badana.

17. Roma karoa 12 amo dahaka ita dibaia bona vaira pura ai dahaka do ita stadilaia?

¹⁷ Hari ita stadilaia Roma karoa 12 ena siri haida ese ita idia durua ita ta ta eda mauri ita hanamoa bona iseda tadikaka taihu ita kara namo henidia totona. Vaira pura ena stadi dekenai, Roma karoa 12 ena siri ma haida do ita tahua. Dala maorona ai Keristani kongrigeisen murimurinai idia noho taudia bona ita idia dagedage henia taudia ita kara henia daladia do ita stadilaia.

Riviu

• Edena dala ai ita hahedinaraia ita be ‘mai iseda lalona ibounai’ ida Dirava ita hesiai henia bona ita lahedo lasi?

• Dahaka dainai mai manau ida Dirava ita hesiai henia be namo?

• Edena dala ai ita hahedinaraia iseda tadikaka taihu edia hemami ita laloa bada?

[Study Questions]

[Pictures on page 4]

Dahaka dainai Keristani hesiai gaukara ita karaia?

[Picture on page 6]

Edena dala ai ita ta ta ese idau tano taudia ita durua diba Basileia idia diba totona?