Lagani 10 gunanai, Gregorio bona ena adavana Marilou edia mauri lagani be 30 bamona neganai, Manila dekenai ful-taim moni gaukara idia karaia bona idia painia danu. Ena be idia hekwarahi bada, to painia gaukara idia moalelaia. Bena Marilou be banika ena bosi badana ai idia halaoa. Ia gwau: “Ai be mai emai moni gaukara namodia dainai, mauri namona ai moalelaia.” Edia moni be hegeregere dainai, abia hidi idia karaia Manila ena gabu hairaina ta dekenai ruma badana ta do idia haginia. Kampani ta ida kontraka idia karaia bona idia gwauhamata lagani 10 lalonai, hua ta ta ai davana do idia henia.

Marilou ia gwau: “Moni gaukara matamatana dekenai egu nega bona goada bada lau haorea dainai, haroro bona hebou lau reaia momo. Lau mamia lau be Iehova lau koia bamona. Ena be lau gwauhamata egu nega bona goada do lau gaukaralaia Iehova do lau hesiai henia totona, to unai lau karaia lasi.”  Gregorio bona Marilou idia moale lasi badina idia itaia idia be dala kererena idia badinaia noho. Unai dainai, dina ta idia ruaosi idia helai bona unai idia herevalaia. Gregorio ia gwau: “Ai ura emai mauri ai haidaua, to ai diba lasi dahaka do ai karaia. Bona ai be natudia lasi dainai, emai hesiai gaukara habadaia daladia ai herevalaia. Danu, Iehova ena heduru totona ai guriguri.”

Unai negai, hebou ai idia kamonai tok haida ese pablisa taudia idia hagoadaia pablisa be momo lasi gabudia idia lao totona. Gregorio ia gwau: “Ai mamia unai tok amo Iehova ese emai guriguri ia haerelaidia.” Iehova idia noia edia abidadama do ia hagoadaia, unai amo abia hidi maorodia do idia karaia. To, edia koua gauna badana be edia ruma matamata ia do ore lasi, bona lagani toi ena davana idia henia vadaeni. Dahaka do idia karaia? Marilou ia gwau: “Bema unai kontraka ai koua, ai be moni bada herea do ai halusia. Ai itaia emai vairanai abia hidi rua idia noho, Iehova ena ura eiava ai sibona emai ura do ai atoa guna.” Idia be aposetolo Paulo ena hereva idia badinaia bona ‘gau ibounai idia rakatania.’ Hegeregere, edia ruma ena kontraka idia koua, edia moni gaukara idia rakatania, edia kohu momo idia hoihoilaia, bona Palawan motumotu ena gunika hanuana ta dekenai idia lao. Ia be Manila ena saut kahanai ia noho bona ena daudau be kilomita 480 bamona.​—⁠Fili. 3:8.

Gregorio bona Marilou be unai hanua idia do lao lasi lalonai, kohu momo lasi maurina idia manadalaia toho. To, unai hanua idia lao neganai, idia itaia mauri be idau. Marilou ia gwau: “Mauri be ia auka. Paoa bona ranu be lasi. Ai ura raisi ai nadua neganai rice cooker ai gaukaralaia lasi, to au ai siria bona lahi ai karaia. Siti ena stoa badadia ai loaloa bona aniani gabudiai aniani karana lau reaia.” To, idia ese ta ta idia hagoadaia unuseniai idia lao ena badina be Dirava idia hesiai henia totona. Daudau lasi murinai hanua maurina idia manadalaia. Marilou ia gwau: “Hari, lau be Dirava ese ia havaraia gaudia, hegeregere hanuaboi ai hisiu edia hairai lau moalelaia. To lau ura henia bada gauna be, lau itaia ai haroro henia taudia be idia moale. Unai hanua dekenai ai painia neganai, kohu momo lasi mauri dalana ai ‘dibaia.’”​—⁠Fili. 4:12.

Gregorio ia gwau: “Unai hanua dekenai ai ginidae neganai Witnes taudia be foa sibona. Wiki ta ta pablik tok lau henia bona Basileia anedia abia totona egu gita lau gadaralaia neganai, idia moale bada.” Lagani ta lalonai, idia itaia unai grup maragina be kongrigeisen ai ia lao bona ena pablisa ibounai be 24. Gregorio ia gwau: “Unai tadikaka taihu edia lalokau karadia ese emai kudouna ia hamarerea.” Gregorio bona Marilou be unai hanua dekenai idia painia lagani siks idia herevalaia neganai, idia gwau: “Ai itaia kongrigeisen lalonai momo idia vareai neganai  ai moale. Ai mamia emai mauri be mai anina bada dalanai ai gaukaralaia.”

Philippines ai tadikaka taihu 3,000 bamona be pablisa momo lasi gabudia dekenai idia lao. Idia 500 bamona be singul taihudia. Mani Karen ena sivarai ita itaia.

Karen ena mauri lagani be 25 bamona, bona ia be Baggao, Cagayan dekenai ia bada. Ia do maragi neganai ena haroro gaukara habadaia daladia ia lalohadailaia. Ia gwau: “Lau diba nega be kwadogi bona taunimanima ibounai ese Basileia ena sivarai idia kamonai be namo, unai dainai lau ura pablisa be momo lasi gabudia dekenai do lau lao.” Ena famili ese idia doria edukeisen badana do ia abia, to gunika gabudia dekenai haroro gaukara totona do ia lao lasi. Unai dainai, Karen be Iehova ena heduru totona ia guriguri. Bona gunika gabudia dekenai idia painia pablisa ida ia herevahereva. Karen ena mauri lagani be 18 neganai, gunika gabuna ta dekenai ia lao. Iena hanua amo unai gabu ena daudau be kilomita 64 bamona.

Karen ia lao henia kongrigeisen ena teritori be Pacific Coast ena ororo gabudia. Karen ia gwau: “Baggao amo unai kongrigeisen matamata ai lao totona dina toi ai raka, ororo ai daekau bona diho, bona nega 30 bamona sinavai ai hanaia.” Ma ia gwau: “Baibel stadi haida karaia totona, hora siks lau raka bona hanuaboi ai stadi ta ena ruma dekenai lau mahuta. Daba ai egu ruma dekenai lau giroa totona, hora ma siks lau raka.” Ena hekwarahi dainai dahaka namo ia davaria? Mai kiri ida ia gwau: “Nega haida egu aena idia hisihisi, to lau be Baibel stadi ibounai 18 lau karaia vadaeni. Lau ‘mamia bona lau diba, Iehova be namo!’”​—⁠Sal. 34:8.

Dahaka dainai United States ai, Sukhi, ena mauri lagani be 40 bamona singul taihu ta, be Philippines dekenai ia lao? Lagani 2011 ai, sekit hebouhebou ta dekenai, tadikaka ta bona ena adavana edia intaviu ia kamonai. Idia gwau edia kohu momo idia hoihoilaia, unai amo Mexico dekenai idia lao idia painia totona. Sukhi ia gwau: “Unai intaviu ese lau ia durua dainai, tahua gaudia haida lau lalohadailaia matamaia.” Sukhi be India hahinena, unai dainai ia kamonai Philippines dekenai Punjabi taudia haroro henia totona heduru idia tahua neganai, ena lalona ia hadaia unai gaukara durua totona do ia lao. Koua gaudia haida ia davaria, a?

Sukhi ia gwau: “Edena kohu do lau dogoatao bona edena do lau hoihoilaia lau abia hidi be auka. Danu, lagani 13 lalodiai lau be sibona egu ruma dekenai lau noho, to gabeai lau be egu famili ida lau noho bona egu mauri be guna bamona lasi. Momokani, unai lau karaia be auka, to unai ese lau ia durua kohu momo lasi maurina lau manadalaia totona.”  Philippines dekenai dahaka hekwakwanai haida ia davaria? Ia gwau: “Lau be spaida bona unai bamona gaudia ma haida dekenai lau gari, bona egu famili lau laloa momo. To, lau be hanaihanai Iehova dekenai lau tabekau!” Unai ese dahaka namo ia havaraia? Sukhi be mai kiri ida ia gwau: “Iehova ia gwau, ‘Lau do umui tohoa. Lau ese guba ena uindo do lau kehoa, bona gau namodia momo herea umui dekenai do lau bubua diho.’ Lau dekenai unai siri ena hereva ia momokani, badina haroro ai lau davaria taudia momo be lau idia nanadaia: ‘Edena negai do oi giroa mai? Badina lau be mai egu henanadai momo.’ Dirava ena hereva idia ura dibaia taudia lau durua dainai lau moale!” (Mal. 3:10) Sukhi ma ia gwau: “Philippines dekenai do lau lao ena abia hidi lau karaia be auka momokani. To lau karaia murinai, hoa gauna be, Iehova ese lau karaia gaudia ibounai ia hanamoa.”

Headava tadikaka ta ladana Sime, ena mauri lagani be 30 bamona. Ia be Philippines ia rakatania bona moni gaukara totona Middle East dekenai ia lao. Unuseniai, sekit naria tauna ta ena hagoadaia hereva bona Hakaua Oreana ena memba ta ena tok, ese Sime ena lalona ia veria ena mauri lalonai Iehova ia atoa guna totona. Sime ia gwau: “Egu moni gaukara do lau rakatania lau laloa neganai, lau lalohekwarahi bada.” To, Sime ese ena lalona ia hadaia, ena moni gaukara ia rakatania bona Philippines dekenai ia giroa lou. Hari, ia bona ena adavana Haidee, be Davao del Sur, Philippines ena saut kahana ai ia noho siti ta dekenai idia painia noho. Unai gabu ena teritori be bada herea bona pablisa be momo lasi. Sime ia gwau: “Ena be matamanai egu moni gaukara do lau rakatania dainai lau lalohekwarahi, to lau moale badina unai lau hanaia bona Iehova lau atoa guna. Mai iseda goada ibounai ida Iehova ita hesiai henia karana ese moale korikorina ia mailaia!”

Headava taudia Ramilo bona Juliet be painia taudia bona edia mauri lagani be 30 bamona. Idia kamonai kilomita 30 ia noho kongrigeisen ta be heduru ia ura neganai, unuseniai idia lao. Wiki ta ta ai, ena be dina ia siahu eiava medu ia diho, Ramilo bona Juliet be edia motabaik amo hebou bona haroro totona idia lao. Ena be dala ia dika bona biridi haida idia hanaia be mai ena hekwarahi, to edia haroro gaukara idia habadaia dainai idia moale. Ramilo ia gwau: “Lau bona egu adavana emai Baibel stadi ibounai be 11! Ena be pablisa be momo lasi gabunai ai haroro totona gau momo ai rakatania, to moale korikorina ai davaria!”​—⁠1 Kor. 15:58.

Oi ura emu tano o tano ma ta ai pablisa be momo lasi gabudia dekenai oi lao, a? Bema oi ura, emu sekit naria tauna oi hamaoroa, bona August 2011 ena Iseda Basileia Gaukara ena hereva ladana “‘Makedonia Dekenai Oi Lao’ Diba, A?” oi duahia.