1, 2. (a) Dahaka dainai Israela taudia 24,000 ese edia hahenamo idia haboioa? (b) Dahaka dainai edia sivarai be mai anina bada ita dekenai?

 ISRAELA besena be Gwauhamata Tanona ai idia vareai gwauraia neganai, tatau tausen momo be “Moaba hahine idia sihari henidia.” Unai dainai, Iehova ese Israela taudia 24,000 ia alaia mase. Mani oi laloa, Israela taudia be kahirakahira Gwauhamata Tanona ai idia vareai, to hahetoho dekenai idia moru dainai unai hahenamo idia haboioa.—Num. 25:1-5, 9.

² Baibel ai unai sivarai idia torea, “inai nega oromana ena dokona ai ita noho taudia idia hadibaia totona.” (1 Kor. 10:6-11) Hari ita be “dina gabediai” ita noho bona kara maoromaoro tanobadana be kahirakahira do ia mai. (2 Tim. 3:1; 2 Pet. 3:13) To, Iehova idia tomadiho henia taudia haida be sibona idia gimaia lasi. Matabodaga ena hahetoho lalonai idia moru bona dika bada idia davaria. Unai bamona taudia ese mauri hanaihanai ena hahenamo idia haboioa diba.

3. Dahaka dainai headava taudia be Iehova ese ia hakaudia bona gimaia be namo? (Laulau ginigunana itaia.)

³ Hari matabodaga karadia idia bada idia lao dainai, headava taudia be Iehova ese ia hakaudia bona gimaia be namo. Unai  dala amo edia headava do ia goada. (Salamo 127:1 duahia.) Inai stadi ai headava taudia ese edia kudouna idia gimaia, Dirava kahirakahira idia lao, kara namo be dabua bamona idia hahedokilaia, herevahereva namonamo, bona headava idia hanamoa dalana do ita herevalaia.

4. Dahaka dainai, Keristani taudia haida ese kara dika idia karaia?

⁴ Edena dala ai Keristani tauna be matabodaga ena hahetoho lalonai ia moru diba? Bema iena matana ia naria namonamo lasi matabodaga urana ia vara diba. Iesu ia gwau: “Bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mat. 5:27, 28; 2 Pet. 2:14) Kara dika idia karaia Keristani taudia momo be kara maoromaoro taravatudia idia badinaia lasi, badina ponografi idia itaia, matabodaga bukadia idia duahia, o Intanet ai laulau dikadia ma haida idia itaia. Ma haida be mahuta hebou idia hahedinaraia muvi dikadia, platfom ai idia hahedinaraia drama dikadia, o televisen program dikadia idia itaia. Haida be pati rumadia, platfom ai lebulebu mavarudia idia karaia klab, o tauanina gigia rumadia (massage parlors) dekenai idia lao.

5. Dahaka dainai iseda kudouna ita gimaia be namo?

⁵ Haida be hahetoho lalonai idia moru, badina edia adavana lasi taudia amo heduru idia tahua. Tanobada ai momo be sibona idia biagua diba lasi bona matabodaga karadia idauidau idia ura henia. Unai dainai, bema headava tau o hahine ese ena kudouna ia naria namonamo lasi, ia be tau o hahine ma ta ia ura henia diba. (Ieremia 17:9, 10 duahia.) Iesu ia gwau: “Kudouna amo idia mai gaudia be lalohadai dikadia, ala-ala, heudahanai, matabodaga karadia, henaohenao, hereva koikoi, Dirava ena ladana hadikaia herevadia.”—Mat. 15:19.

6, 7. (a) Ta ena kudouna ai ura dikana ia vara neganai, dahaka ia vara diba? (b) Edena dala ai kara dikadia ita dadaraia diba?

⁶ Headava tau o hahine ena kudouna ai ura dikana ia vara neganai, ia ese ena adavana sibona ida do ia herevalaia gaudia be ia ura henia tau o hahine ma ta dekenai do ia herevalaia. Bena metairametaira ta ta ura henia karana do ia tubu, bona dala do idia karaia idia hebamo loulou totona. Unai ia vara neganai, idia sibona idia biagua be auka bona kara dika idia karaia diba, herevana idia diba unai be kerere.—Aon. 7:21, 22.

⁷ Iehova ena taravatu goevadia idia laloaboio bona edia ura dikadia bona hereva ese edia lalona ia veria dainai, headava taudia sibona ese idia karaia karadia do idia karaia. Hegeregere, imana idia dogoatao, idia kisi, rosia heheni, ta ta edia kopina idia dogoatao, bona unai bamona kara dikadia ma haida. Dokonai, idia be “sibona ena ura ese ia tohoa, unai ura ese ena lalona ia veria bona ia koia. Bona unai ura ia rogorogo bamona neganai kara dika ia havaraia,” anina be idia ese matabodaga karana idia karaia. (Iam. 1:14, 15) Unai be dika bada herea! To unai bamona kara dikadia idia dadaraia totona, Iehova idia badinaia bona headava idia matauraia be namo. Edena dala ai ta ese unai ia karaia diba?

8. Dahaka dainai Iehova ita tura henia be mai anina bada?

⁸ Salamo 97:10 duahia. Iseda kara namodia ita gimaia totona, Iehova ita tura henia be mai anina bada. Dirava ena kara namodia ita dibaia bona ita hekwarahi ‘Dirava ita  tohotohoa, badina ita be iena lalokau natudia. Bona lalokau ai do ita raka noho’ neganai, ‘matabodaga karadia, bona kara miro idauidau’ ita dadaraia diba. (Efe. 5:1-4) Headava taudia haida idia diba “Dirava ese matabodaga taudia bona heudahanai taudia do ia hahemaoro henidia,” unai dainai idia gaukara goada headava idia matauraia bona hamiroa lasi totona.—Heb. 13:4.

9. (a) Edena dala ai Iosepa ese matabodaga ena hedibagani ia dadaraia? (b) Iosepa ena haheitalai amo dahaka ita dibaia?

⁹ Dirava ena hesiai taudia haida be kara maoromaoro taravatudia idia badinaia lasi, badina moni gaukara gabunai witnes lasi taudia idia bamoa. Haida be gaukara lalonai hahetoho idia davaria. Hairai merona Iosepa be gaukara gabunai ia noho neganai, ia laloparara iena biaguna ena adavana be ia ia hegahusi henia. Dina ta ta ai unai hahine ese Iosepa ia hauraia. Vadaeni, “hahine ese Iosepa ena dabua dekenai ia dogoatao, ia veria, ia gwau, ‘Oi mai, gabu tamona dekenai ita mahuta.’” To, Iosepa ia ura lasi bona ia heau. Dahaka ese Iosepa ia durua Dirava ia badinaia noho totona? Iosepa ia ura lasi ena hetura karana Dirava ida do ia hadikaia, unai ese ia durua mahuta hebou lalohadaina ia dadaraia bona ena abidadama ia gimaia. Ena be unai bamona ia karaia dainai ena gaukara ia haboioa bona dibura dekenai idia atoa, to Iehova ese ia hanamoa. (Gen. 39:1-12; 41:38-43) Herevana Keristani headava tau o hahine be gaukara gabunai o edeseni ai ia noho, namona be matabodaga karana ena hedibagani ia dadaraia.

10. Kara matamata ese edena dala ai ta ia durua diba?

¹⁰ Unai kara matamata be “Dirava ena ura hegeregerena ia vara, ia be maoromaoro momokani” dainai, headava taudia ia durua diba Dirava ena taravatu idia badinaia totona. (Efe. 4:24) Unai kara matamata idia atoa taudia ese edia tauanina ena kahadia idauidau idia “hamasea,” badina “idia havaraia gaudia be inai, matabodaga karadia, kara mirodia, matabodaga urana, ura dikadia, bona mataganigani.” (Kolose 3:5, 6 duahia.) Inai hereva “hamasea” ese ia hahedinaraia, namona be ita gaukara goada tauanina ena ura dikadia ita tuari henia totona. Unai ena anina be ura dikadia idia havaraia gaudia ita dadaraia be namo. (Iobu 31:1) Iseda mauri lalonai Dirava ena ura ita badinaia neganai, “kara dika do [ita] inai henia, bona kara namo do [ita] dogoatao auka.”—Roma 12:2, 9.

11. Edena dala ai kara matamata atoa karana ese headava ia hagoadaia?

¹¹ Unai kara matamata ita atoa neganai, ita be Iehova ena kara ita tohotohoa noho. (Kol. 3:10) Tau bona hahine ese “hebogahisi mai lalokauna, hariharibada, lalomanau, manau, bona boga-auka” be dabua bamona idia hahedokilaia neganai, Dirava ese edia headava do ia hanamoa! (Kol. 3:12) Danu edia headava do idia moalelaia bema “Keriso ena maino ese [edia] kudouna ia biagua.” (Kol. 3:15) Headava taudia ese ta ta idia “hebogahisi henia bona lalokau henia” be namo! Unai ese edia lalona ia veria ‘ta ta dekenai hemataurai idia hahedinaraia.’—Roma 12:10.

12. Headava oi moalelaia totona, edena kara be mai anina bada?

¹² Sid idia nanadaia dahaka kara ese idia ia durua edia headava idia moalelaia neganai, ia gwau: “Ai be hanaihanai ai gaukara goada lalokau ai hahedinaraia totona. Bona ai itaia manau karana be mai anina bada danu.” Iena adavana Sonja be unai hereva ia abia dae bona ia gwau: “Hariharibada karana be mai anina bada.  Bona ai hekwarahi lalomanau ai hahedinaraia, ena be nega haida unai ai karaia be auka.”

13. Dahaka ese headava ia hagoadaia diba, bona dahaka dainai?

¹³ Hereva namodia gwauraia karana ese headava ia hagoadaia. To, headava taudia haida be idau taudia o idia ubua animal dekenai mai hemataurai ida idia hereva, to edia adavana dekenai unai bamona idia karaia diba lasi! Bema tau bona hahine ese headava lalonai ‘inai heheni karana, badu, badu dikadika, boiboi badabada, bona hadikaia herevadia’ idia hahedinaraia, edia headava be do ia goada lasi. (Efe. 4:31) Hadikaia herevadia, o ma ta kirikirilaia hereva dikadia ese headava ia hadikaia diba. Unai dainai headava taudia ese edia headava idia hagoadaia totona, namona be mai edia kara namo, lalokau, bona hebogahisi ida ta ta do idia hereva henia.—Efe. 4:32.

14. Dahaka kara ita dadaraia be namo?

¹⁴ Baibel ia gwau: “Regerege lasi dekenai ita noho be mai ena nega.” (Had. 3:7) To namo lasi ita laloa unai ena anina be eda adavana ida do ita herevahereva lasi. Germany ai hahine ta ia gwau: “Herevahereva lasi karana ese headava ia hadikaia diba.” Ma ia gwau: “Ena be ita lalohisihisi neganai badu karana ita koua be auka, to namo lasi ita badu. Unai bamona ita karaia neganai, do ita laloa namonamo lasi bena eda hereva o kara ta amo eda adavana do ita hahisia, bona unai ese hekwakwanai do ia habadaia.” Bema headava taudia be ta ta dekenai mai badu ida idia boiboi badabada o idia herevahereva lasi, edia hekwakwanai do idia hamaoromaoroa lasi. To edia headava ia goada totona, namona be hepapahuahu karana idia hadokoa.

15. Edena dala ai herevahereva namonamo karana ese headava ia hagoadaia diba?

¹⁵ Bema headava taudia be ta ta ena hemami bona lalohadai idia laloa bada, edia headava do ia goada. Ita gwauraia herevadia bona ita gwauraia dalana be mai anina bada. Unai dainai ena be hekwakwanai badadia  idia vara, to namona be oi hekwarahi emu hereva bona oi gwauraia dalana amo hemataurai oi hahedinaraia. Unai dala amo, emu adavana ese oi do ia kamonai henia. (Kolose 4:6 duahia.) Headava taudia ese edia headava idia hagoadaia totona, namona be edia herevahereva lalonai ‘hereva namodia idia gwauraia, unai amo edia hereva idia kamonai taudia do idia hagoadaia.’—Efe. 4:29.

16, 17. Dahaka dainai headava taudia be ta ta ena hemami bona mahuta hebou urana idia laloa be namo?

¹⁶ Tau bona hahine ese edia headava idia hagoadaia dalana ta be edia adavana ena namo idia atoa guna. (Fili. 2:3, 4) Headava taudia be ta ta ena hemami bona mahuta hebou urana do idia laloa.—1 Korinto 7:3, 4 duahia.

¹⁷ To madi, headava taudia haida be edia adavana dekenai lalokau idia hahedinaraia lasi o idia ura lasi edia adavana ida idia mahuta hebou. Bona tatau haida idia laloa manau karana idia hahedinaraia neganai idia be tatau goadadia lasi. To Baibel ia gwau: “Tatau e, emui adavadia ida umui noho hebou negadiai, mai laloa namonamo ida idia do umui kara henia.” (1 Pet. 3:7) Namona be tau ia laloa namonamo, headava be ena hahine ida do idia noho hebou karana sibona lasi. Hahine ese headava do ia moalelaia bema tau ese lalokau bona kara namo ia hahedinaraia. Bema tau bona hahine idia lalokau heheni, vadaeni edia hemami do ia namo bona edia ura gaudia idia hagugurua diba.

18. Edena dala ai tau bona hahine ese edia headava idia hagoadaia?

¹⁸ Ena be headava taudia idia heudahanai be maoro lasi, to bema idia be ta ta ena hemami idia laloa bada lasi, unai ese idia ia doria diba edia adavana lasi tauna ta idia ura henia bona idia heudahanai diba. (Aon. 5:18; Had. 9:9) Unai dainai Baibel ese headava taudia ia sisiba henia, ia gwau: “Umui headava taudia ese ta ta dekenai mahuta hebou karana umui koua lasi. To bema umui ruaosi umui lalotamona unai umui koua, . . . namona be nega sisina sibona lalonai unai bamona umui karaia.” Dahaka dainai? Badina “dika umui ese tauanina ena ura umui biagua lasi bona Satani ese umui ia tohoa.” (1 Kor. 7:5) Bema Satani ia itaia headava taudia ese edia “tauanina ena ura [idia] biagua lasi,” idia ia dibagania diba heudahanai karana idia karaia totona! To, bema tau o hahine be “sibona ena namo ia tahua lasi, to ena dekena tauna ena namo ia tahua,” bona ia laloa namonamo ia headava be lalokau dainai, to maduna ta dainai lasi, vadaeni iena headava be do ia goada.—1 Kor. 10:24, BHḡ.

19. Namona be eda lalona ita hadaia dahaka ita karaia totona, bona dahaka dainai?

¹⁹ Ita naria noho kara maoromaoro tanobadana be kahirakahira do ia mai. Unai dainai, tauanina ena ura dikadia ita badinaia neganai dika bada do ita davaria, Moaba ena Palaka Gabuna ai idia mase Israela taudia 24,000 bamona. Baibel ese unai sivarai ia herevalaia murinai, ia gwau: “Bema tau ta ia laloa ia gini goada noho, namona be ia naria namonamo, dika ia moru.” (1 Kor. 10:12) Unai dainai headava ita hagoadaia totona, iseda guba Tamana bona eda adavana ita badinaia be mai anina bada. (Mat. 19:5, 6) Hari, namona be ‘do ita gaukara goada bona Dirava vairanai do ita miro lasi, kerere lasi, bona mai maino ida ita noho.’—2 Pet. 3:13, 14.