Iesu amo Ita Dibaia Gaudia

Ruma Bese Maurina

Headava dekenai, dahaka lalohadai ese ruma bese ia hamoalea?

Headava be helaga. Nega ta ai, haida be Iesu idia nanadaia, headava hadokoa karana be maoro o lasi; to Iesu ia gwau: “Be, Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia, bona ia gwau: Inai dainai tau be iena tamana sinana do ia rakatania, iena adavana dekenai do ia hakapua, vadaeni idia ruaosi be tamona idia noho.’ Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi. . . . Bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” (Mataio 19:4-6, 9) Bema Iesu ena sisiba idia badinaia bona tau bona hahine idia badinaia heheni, ruma bese lalonai idia noho taudia ibounai do idia noho namonamo bona moale.

Dahaka dainai Dirava lalokau henia karana ese ruma bese ia hamoalea?

Iesu ia gwau: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana.” Iharuana be dahaka? Iesu ia gwau: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:37-39) Unai dainai, Dirava idia tura henia ruma besedia idia moale​—badina Dirava lalokau henia karana ese ita ia veria diba ma haida ita lalokau henia totona.

Edena dala ai tau bona hahine be idia moale diba?

Tau ese Iesu ena haheitalai ia tohotohoa neganai ena adavana ia moale. Iesu be kongrigeisen ia  lalokau henia, tau ta ese ena adavana ia lalokau henia hegeregerena. (Efeso 5:25) Iesu ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai.” (Mataio 20:28) Iesu ese taunimanima ia biagua auka lasi o kara auka henidia lasi, to laga-ani ia henidia. (Mataio 11:28) Unai dainai, namona be tatau ese edia kwara dagina idia gaukaralaia namonamo, unai amo ruma bese lalonai idia noho taudia ibounai be namo do idia davaria.

Iesu ena haheitalai ese hahine ia durua danu. Baibel ia gwau: “Keriso ena kwarana be Dirava.” Ma ia gwau, “hahine edia kwarana be edia tau.” (1 Korinto 11:3) Iesu ia gwau Dirava henunai ia noho be anina lasi, a? Lasi, Iesu be ena Tamana ia matauraia bada. Ia gwau: “Iena ura be nega ibounai lau karaia.” (Ioane 8:29) Dirava ia lalokau henia bona matauraia hahinena be ena adavana ena kwara dagina henunai ia noho dainai, ena ruma bese maurina ia namo.

Bema Iesu be maragidia ia laloa bada, vadaeni tama sina be iena haheitalai amo dahaka idia dibaia?

Iesu be nega haida maragidia ida ia herevahereva, bona edia lalohadai bona hemami ia laloa bada. Baibel ia gwau: “Iesu ese ia boiria idia dekenai, ia gwau, ‘Natudia maragidia be lau dekenai do idia mai.’” (Luka 18:15, 16) Nega ta ai, taunimanima idia badu badina memero bona kekeni haida be edia abidadama Iesu dekenai idia herevalaia. To Iesu be unai memero bona kekeni ia hanamodia, bona idia badu taudia dekenai ia gwau: “Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’”​—Mataio 21:15, 16.

Natudia be Iesu amo dahaka idia dibaia?

Iesu be Dirava ena hereva ia laloa bada​—ena haheitalai namona be natudia ese idia tohotohoa diba. Iesu ena mauri lagani be 12 neganai, iena tamana bona sinana ese ia be “dubu Helaga lalonai idia davaria, hadibaia taudia edia huanai ia helai, edia hereva ia kamonai, bona ia henanadaia danu, idia dekenai.” Bena dahaka ia vara? “Iena hereva idia kamonai taudia ibounai be iena diba bona iena haere dekenai idia hoa bada.” (Luka 2:42, 46, 47) Ena be Iesu ena diba be bada, to ia hekokoroku lasi. Ia ese ena tamana bona sinana ia matauraia. Baibel ia gwau: “Ia kamonai henia idia dekenai.”​—Luka 2:51.

Hereva ma haida oi diba totona, Baibel be Dahaka Ia Hadibaia? * bukana ena karoa 14 itaia.

[Futnout]