KERISTANI taudia edia guriguri amo taunimanima be inai guriguri herevana idia gwauraia momo. Herevana unai be momokani eiava lasi, to momo ese Iesu ena guriguri​—nega haida idia gwauraia Lohiabada Ena Guriguri o Aiemai Tamana​—idia lalopararalaia lasi. Taunimanima milioni momo be unai guriguri herevana idia laloatao bona dina ta ta ai idia gwauraia loulou. To, Iesu ia gwau lasi taunimanima ese unai guriguri be unai bamona dala ai idia gwauraia. Edena bamona unai ita diba?

Iesu be Lohiabada Ena Guriguri ia do herevalaia lasi neganai, ia gwau: “Umui guriguri neganai, hereva kava momo do umui gwauraia lou, gwauraia lou lasi.” (Mataio 6:7) Oi laloa Iesu be unai hereva amo taunimanima ese idia laloatao bona gwauraia momo gurigurina ia gwauraia dika, a? Lasi! To, Iesu ese ita ia hadibaia dahaka gaudia do ita gurigurilaia, bona ita guriguri neganai do ita laloa bada gaudia ia herevalaia. Vadaeni, Iesu ese ia herevalaia gaudia mani ita laloa namonamo. Unai guriguri be Mataio 6:9-13 ai ia noho.

Iesu be iena murinai idia raka taudia ia hadibaia iena Tamana, Iehova idia guriguri henia be namo. To, dahaka dainai Dirava ena ladana be mai anina bada bona ita hahelagaia?

Adamu bona Heva edia nega amo ema bona hari, Dirava ena ladana helagana idia hadikaia. Dirava ena inai tauna, Satani, ia gwau Iehova be ia koikoi, sibona ena namo ia laloa bada bona Ia havaraia gaudia ia biagua be maoro lasi. (Genese 3:1-6) Momo be Satani ena kahanai idia gini, bona taunimanima idia hadibaia Dirava be ita ia laloa lasi, ita ia hadikaia bona idia abia dae lasi Ia be Havaraia Tauna. Ma haida be edia Baibel amo inai ladana, Iehova, idia kokia bona taravatu idia atoa unai ladana idia gaukaralaia lasi totona.

Baibel ese ia hahedinaraia, Dirava ese unai kara kereredia do ia hamaoromaoroa. (Esekiela 39:7) Unai bamona ia karaia neganai, Ia ese emui ura gaudia ibounai do ia henia bona emui hekwakwanai do ia haorea. Edena dala ai? Iesu ena guriguri herevana ma ta ese unai ia haerelaia.

Hari inai negai, tomadiho hadibaia taudia be Dirava ena Basileia dekenai idia daradara. To, Iesu ena kamonai taudia idia diba, Dirava ena peroveta taudia be idaunegai Mesia idia perovetalaia, ia be Dirava ese ia abia hidi Hamauria Tauna, bona Basileia ta do ia lohiaia  bona unai Basileia amo inai tanobada do ia haidaua. (Isaia 9:6, 7; Daniela 2:44) Unai Basileia ese Satani ena koikoi karadia do ia hahedinaraia, bona Satani bona ena gaukara ibounai do ia haorea, unai amo Dirava ena ladana do ia hahelagaia. Dirava ena Basileia ese tuari, gorere, hitolo bona mase do ia haorea. (Salamo 46:9; 72:12-16; Isaia 25:8; 33:24) Dirava ena Basileia totona oi guriguri neganai, oi be unai gwauhamata ibounai do idia guguru totona oi guriguri.

Iesu ena hereva bamona Dirava ena ura tanobada totona be do ia guguru, guba dekenai idia karaia bamona. Guba dekenai Dirava ena ura be ta ese do ia koua lasi; unuseniai Dirava ena Natuna ese Satani mai ena aneru ia tuari henidia bona tanobada ai ia negea diho. (Apokalupo 12:9-12) Unai guriguri ena kahana ihatoina ese ita ia durua mai anina bada gaudia ita laloa​—iseda ura lasi, to Dirava ena ura ita karaia. Iena ura be nega ibounai ia havaraia gaudia ibounai dekenai namo ia mailaia. Unai dainai, goevadae tauna Iesu be ena Tamana dekenai ia gwau: “Lauegu ura lasi, oiemu ura sibona.”​—Luka 22:42.

Iesu ese ia hahedinaraia iseda ura gaudia ita gurigurilaia danu. Dina ta ta ai iseda mauri durua gaudia abia totona Dirava ita guriguri henia be kerere lasi. Momokani, unai bamona ita karaia neganai, ita diba momokani Iehova be “mauri bona laga bona gau ibounai ia henia noho taunimanima dekenai.” (Kara 17:25) Baibel ese ia hahedinaraia Iehova be tama lalokauna ta bamona, mai moale ida ena natuna edia ura gaudia ia henia. Danu, tama namona ta bamona, Ia be ena natuna dekenai dika havaraia gaudia ia henia lasi.

Dirava dekenai oi be mai emu abitorehai, a? Oi ura Ia ese emu dika ia gwauatao, a? Hari inai negai, momo be kara dika ena anina idia lalopararalaia lasi. To, Baibel ese ita ia hadibaia, kara dika dainai hekwakwanai momo idia vara bona mase ia havaraia. Ita be kara dika ai ita vara dainai nega momo kerere ita karaia, bona mauri hanaihanai ita abia dalana tamona be Dirava ese iseda dika do ia gwauatao. (Roma 3:23; 5:12; 6:23) Baibel ena hereva ita dibaia neganai ita moale, ia gwau: “Lohiabada e, oi be mai oiemu bogahisihisi, bona kara dika oi gwauatao noho.”​—Salamo 86:5.

Oi ura dikadika Dirava ese oi ia gimaia, a? Momo idia ura lasi idia abia dae Satani ia mauri noho. To, Iesu ia gwau Satani be ia noho bona ia be “inai tanobada ena lohia.” (Ioane 12:31; 16:11) Satani be inai tanobada ia hadikaia bona ia ura dikadika oiemu hetura karana Iehova ida ia hadikaia. (1 Petero 5:8) To, Iehova ena goada ese Satani ena goada ia hereaia bona Ia ura dikadika ia idia lalokau henia taudia ia gimaia.

Iesu ese ia gwauraia gurigurina ena hereva badadia lalonai do ita gurigurilaia gaudia ibounai ia herevalaia lasi. Laloatao, 1 Ioane 5:14 ese ita dekenai Dirava ia herevalaia: “Gau ta iena ura hegeregerena ita noia neganai, ia ese ita dekenai do ia kamonai.” Unai dainai, Dirava dekenai emu hekwakwanai oi gurigurilaia be namo.​—1 Petero 5:7.

To, guriguri negana bona gabuna be edena bamona? Edena gabu bona nega ai ita guriguri be mai anina bada?