Sante
Labib pa yon liv medsin. Men, li gen bonjan konsèy pou ede moun gen yon bon sante. Ann egzamine kèk prensip Bib la bay ki ka ede w pi byen veye sou sante w.
PRAN SWEN TÈT OU
PRENSIP BIB LA BAY: “Pa gen moun ki janm rayi pwòp kò l. Men, li nouri l e li ancheri l.” — Efezyen 5:29.
SA SA VLE DI: Prensip sa a ki nan Bib la ankouraje n fè sa n kapab pou n pran swen sante nou. Gen yon rechèch yo fè ki montre anpil pwoblèm sante lezòm genyen se konsekans fason yo chwazi viv. Kidonk, si nou byen chwazi, sa ka fè n gen yon pi bon sante.
MEN SA W KA FÈ:
-
Sa w ap manje. Veye pou w manje sa ki bon pou sante w epi bwè ase dlo.
-
Fè aktivite fizik. Kèlkeswa laj ou genyen, menmsi w ta gen yon andikap oswa yon maladi ki pa ka geri, si w fè aktivite fizik, sa ka ede w gen yon pi bon sante. Menmsi yon moun pa w oswa yon moun k ap travay nan domèn medikal ka ba w konsèy ak ankourajman pou w fè egzèsis, ou bezwen fè efò pa w pou w ka ret an sante!
-
Dòmi ase. Lè yon moun manke dòmi pandan anpil tan, sa ka lakòz li fè yon seri maladi grav. Gen moun ki pa dòmi ase paske yo fè lòt bagay nan lè yo ta dwe dòmi an. Sepandan, si w chwazi pran tan pou w dòmi, ou chwazi viv pi byen.
ELIMINE ABITID KI PA BON
PRENSIP BIB LA BAY: “Annou pirifye tèt nou anba tout sa ki ka sal kò a ak lespri a.” — 2 Korentyen 7:1.
SA SA VLE DI: Nou kapab gen yon pi bon sante lè n chwazi pa itilize yon seri bagay ki ka fè nou mal, tankou bagay ki fèt ak tabak, yon seri bagay moun konnen ki se premye koz maladi ak lanmò anpil moun.
MEN SA W KA FÈ: Chwazi yon jou pou w kanpe sou yo. Anvan jou sa a rive, jete sikarèt ou te genyen yo ansanm ak veso w konn mete sann yo, bagay ou te konn sèvi pou w limen yo ak tout lòt bagay ki te gen rapò ak move abitid sa a. Depi se kote lòt moun ap fè pratik sa yo, evite yo. Fè zanmi w ak fanmi w konnen desizyon w pran pou w kite abitid sa yo yon fason pou yo ka ede w.
KÈK LÒT PRENSIP NAN BIB LA
Ou kapab kontakte yon Temwen Jewova nan zòn ou an pou l ka fè w jwenn yon Bib.
PANSE AK SEKIRITE W.
“Si nou fèk bati yon kay, nou dwe fè yon balistrad sou do kay la pou nou menm ak moun lakay nou pa responsab san yon moun ki ta sot sou do kay la e li tonbe anba.” — DETEWONÒM 22:8.
KONTWOLE KÒLÈ W.
“Moun ki pa fè kòlè fasil se moun ki gen anpil bon jijman, men, moun ki pa gen pasyans lan fè wè jan l sòt.” — PWOVÈB 14:29.
PA FÈ EKSÈ NAN MANJE.
“Pinga w vin [...] yon moun ki manje twòp.” — PWOVÈB 23:20.
Lòt sijè ki enteresan
REVEYE N!
Wout k ap ede w jwenn kè kontan an: Sante fizik ak aprann adapte
Lè yon moun pa viv sante, èske l kondane pou l pa gen kè kontan?
