1-2. Poukisa Jewova pèmèt nou vin fè pati fanmi l, e ki jan l te fè sa?

JEWOVA envite nou vin fè pati fanmi l, sa vle di moun k ap adore l yo. Se pa ti bèl envitasyon! Fanmi nou an gen ladan l yon seri moun ki vwe Bondye lavi yo e ki demontre lafwa nan sakrifis ranson Pitit Gason l lan. Fanmi nou an se yon fanmi ki gen kè kontan. Depi kounye a lavi nou gen sans e nou kontan dèske nou gen espwa pou nou viv pou toutan, swa nan syèl la, swa nan Paradi a sou tè a.

² Jewova pèmèt nou vin fè pati fanmi l paske li renmen nou anpil. Men, pou l fè sa, li te oblije fè gwo sakrifis (Jan 3:16). “Yo te peye yon pri pou yo achte nou.” ​(1 Kor. 6:20). Pa mwayen ranson an, Jewova te pèmèt nou vin gen yon relasyon sere avè l. Nou gen privilèj pou nou rele Sila a ki gen pi gwo pozisyon nan linivè a Papa nou. Epi, jan nou te wè sa nan atik ki vin anvan an, Jewova se pi bon Papa ki genyen an.

3. Ki kesyon nou ka poze tèt nou? (Gade kare ki gen tit “ Èske Jewova wè m?”)

³ Menm jan ak youn nan moun ki te patisipe nan ekri Bib la, nou ka mande tèt nou: “Ki sa m ka bay Jewova pou tout byen li fè pou mwen?” ​(Sòm 116:12). An reyalite, nou pap janm ka remèt Papa nou ki nan syèl la sa l fè pou nou. Men, lanmou li gen pou nou pouse n renmen l tou. Men sa apot Jan te ekri: “Nou demontre lanmou, paske li te demontre lanmou pou nou an premye.” ​(1 Jan 4:19). Ki jan nou ka montre Papa nou ki nan syèl la nou renmen l?

4. Selon Jak 4:8, poukisa nou dwe fè efò pou nou pwoche bò kote Jewova?

⁴ Jewova vle pou nou pwoche bò kote l e pou nou pale avè l. (Li Jak 4:8.) Li ankouraje nou pou nou “pèsevere nan lapriyè”, e li toujou pare pou l koute nou (Wom. 12:12). Li pa janm twò okipe oswa twò fatige pou l koute nou. Nou menm, bò kote pa nou, nou koute l lè nou li Labib, Pawòl li a, ak piblikasyon k ap ede nou konprann Pawòl li a. Nou koute l tou lè nou byen suiv nan reyinyon yo. Menm jan bonjan kominikasyon pèmèt yon timoun rete pwòch ak paran l, lè nou kominike regilyèman ak Jewova, sa ede nou rete pwòch avè l.

5. Ki jan nou ka amelyore kalite priyè nou yo?

⁵ Reflechi sou fason w priye Bondye. Jewova vle nou vide kè nou ba li lè n ap priye l (Sòm 62:8). Li ta bon pou nou mande tèt nou: ‘Lè m ap priye èske m toujou ap repete menm bagay yo oubyen èske m di Jewova sa k nan kè m?’ Se sèten ou renmen Jewova anpil e w vle kontinye gen yon relasyon solid avè l. Pou w fè sa, ou dwe pale avè l regilyèman. Ouvri kè w ba li. Di l sa k fè w kontan ak sa k fè w lapenn. Ou mèt gen konfyans ou ka mande l èd li.

6. Ki sa nou dwe fè pou nou rete pwòch ak Papa nou ki nan syèl la?

⁶ Pou nou rete pwòch ak Papa nou ki nan syèl la, nou dwe toujou gen rekonesans. Nou dakò ak youn nan moun ki te patisipe nan ekri sòm yo ki te di: “Ou fè anpil bagay, o Jewova, Bondye m nan. Ou fè bèl aksyon pou nou e w gen bèl objektif pou nou. Pa gen tankou w. Si m ta eseye rakonte yo, si m ta eseye pale de yo, mwen pa t ap kapab, tèlman yo anpil!” ​(Sòm 40:5). Nou pa annik santi nou gen rekonesans, men nou montre Jewova nou gen rekonesans nan pawòl nou ak nan aksyon nou. Sa fè nou diferan ak anpil moun jodi a. N ap viv nan yon monn kote moun pa gen rekonesans pou tout sa Bondye fè pou yo. Anfèt, youn nan bagay ki montre n ap viv nan “dènye jou yo” sèke moun yo engra (2 Tim. 3:1, 2). Pinga nou janm aji konsa!

7. Ki sa Jewova vle nou fè e poukisa?

⁷ Paran yo pa vle pou pitit yo ap goumen youn ak lòt, men yo vle pou yo zanmi. Menm jan an tou, Jewova vle pou tout pitit li yo byen boule youn ak lòt. Anfèt, lanmou nou genyen youn pou lòt montre nou se vrè kretyen (Jan 13:35). Nou dakò ak youn nan moun ki te patisipe nan ekri sòm yo ki di: “Ala bon sa bon e ala sa bay kè kontan lè frè abite ansanm e yo gen tèt ansanm!” ​(Sòm 133:1). Lè nou renmen frè n ak sè n yo, nou montre Jewova nou renmen l (1 Jan 4:20). Se pa ti kontan nou kontan fè pati yon fanmi frè ak sè ki “aji byen youn ak lòt”, ki gen “kè sansib ak tandrès”! — Efe. 4:32.

8. Selon 1 Jan 5:3, ki pi gwo rezon nou genyen pou nou obeyi Jewova?

⁸ Jewova vle pou timoun yo obeyi paran yo, e li vle nou obeyi l tou (Efe. 6:1). Jewova merite pou nou obeyi l paske li se Kreyatè nou, se li ki ban nou sa nou bezwen pou nou viv, e li gen plis sajès pase tout papa ki genyen. Men, pi gwo rezon nou genyen pou nou obeyi Jewova se paske nou renmen l. (Li 1 Jan 5:3.) Byenke gen anpil rezon ki fè nou dwe obeyi Jewova, li pa fòse nou fè sa.  Jewova ban nou libète pou nou deside, se sa k fè li kontan lè nou chwazi obeyi l paske nou renmen l.

9-10. Sa k fè l enpòtan pou nou konn prensip Bondye yo e pou nou suiv yo?

⁹ Paran yo vle pou pitit yo an sekirite. Se sa k fè yo fikse prensip sou fason pou yo konpòte yo, e sa pwoteje pitit yo. Lè timoun yo obeyi prensip sa yo, yo montre yo fè paran yo konfyans e yo respekte yo. Donk, se pa ti enpòtan li enpòtan pou nou konnen prensip Papa nou an ki nan syèl la ban nou e pou nou respekte yo. Lè nou fè sa, nou montre Jewova nou renmen l, nou respekte l, e se pou byen nou sa ye (Eza. 48:17, 18). Men, moun ki rejte Jewova e ki pa respekte prensip li yo ap tonbe nan pwoblèm. — Gal. 6:7, 8.

¹⁰ Lè nou viv yon fason ki fè Jewova plezi, nou jwenn pwoteksyon nan domèn fizik ak nan domèn afektif, e nou pwoteje relasyon nou gen avè l. Jewova konn sa k pi bon pou nou. Men sa Aurora, k ap viv Ozetazini di: “Mwen konnen lè nou obeyi Jewova sa toujou pi bon pou nou.” Nou toujou wè sa. Ki byenfè w jwenn lè w obeyi direksyon Jewova bay avèk lanmou?

11. Ki jan lapriyè ka ede nou?

¹¹ Lapriyè ede nou pou n obeyisan, menm lè sa pa fasil. Pafwa, n ap oblije lite pou nou obeyi Jewova, men nou dwe toujou goumen ak tandans nou genyen pou nou peche a. Men sa youn nan moun  ki te patisipe nan ekri sòm yo te sipliye Bondye pou l fè pou li: “Fè m anvi obeyi w.” ​(Sòm 51:12). Men sa yon pyonye pèmanan ki rele Denise di: “Si m wè l difisil pou m obeyi youn nan kòmandman Jewova yo, mwen priye l pou l ban m fòs pou m fè sa ki dwat.” Nou mèt sèten Jewova ap toujou reponn yon priyè konsa. — Lik 11:9-13.

12. Selon Efezyen 5:1, ki sa nou dwe fè?

¹² Li Efezyen 5:1. Antanke “pitit [Jewova] renmen”, nou fè tout sa nou kapab pou nou imite l. Nou imite kalite l yo lè nou gen lanmou, lè nou gen bonte ak lè nou padone lòt moun. Lè moun ki pa konn Bondye yo wè bèl konduit nou genyen, sa ka fè yo anvi aprann konn plis bagay sou li (1 Pyè 2:12). Paran ki kretyen yo gen bonjan rezon pou yo imite Jewova nan fason yo aji ak pitit yo. Lè yo fè sa, pitit yo ka vin anvi zanmi Papa nou an ki plen lanmou.

13. Ki sa nou dwe fè pou nou ka vin gen kran?

¹³ Byen souvan yon timoun piti fyè de papa l e li kontan pale de li. Menm jan an tou, nou fyè de Jewova, Papa nou ki nan syèl la, e nou vle lòt moun vin konnen l. Nan kè nou, nou santi nou menm jan ak wa David ki te ekri: “Se nan Jewova m ap vante tèt mwen.” ​(Sòm 34:2). Men, e si nou timid? Ki jan nou ka vin gen kran?  Nou ka vin gen kran lè nou reflechi sou jan sa ka fè kè Jewova kontan ak jan sa ap ede lòt moun jwenn byenfè lè yo aprann konnen l. Jewova ap ban nou kouraj nou bezwen an. Li te ede frè yo nan premye syèk la pou yo vin gen kran, e l ap ede nou tou. — 1 Tes. 2:2.

14. Bay kèk rezon ki fè li enpòtan pou nou patisipe nan travay fè disip la.

¹⁴ Jewova pa gen patipri, e li kontan lè l wè nou montre lòt moun nou renmen yo kèlkeswa kote yo soti (Tra. 10:34, 35). Youn nan pi bon fason nou ka montre lòt moun nou renmen yo se lè nou pataje bon nouvèl la avèk yo (Mat. 28:19, 20). Ki byenfè y ap jwenn? Moun ki koute nou ka amelyore fason y ap viv depi kounye a e y ap gen posiblite pou yo viv pou toutan alavni. — 1 Tim. 4:16.

15-16. Ki rezon nou genyen pou nou gen kè kontan?

¹⁵ Jewova se yon Papa ki gen lanmou, se sa k fè li vle fanmi l gen kè kontan (Eza. 65:14). Gen anpil rezon pou nou gen kè kontan depi kounye a, menm lè nou jwenn difikilte. Pa egzanp, nou sèten Papa nou ki nan syèl la renmen nou anpil. Nou gen yon konesans egzak sou Pawòl Bondye a, Labib (Jer. 15:16). E nou fè pati yon fanmi ki san parèy, moun ki ladan l yo renmen Jewova, yo renmen prensip moral wo nivo l yo e youn renmen lòt. — Sòm 106:4, 5.

¹⁶ Nou ka kontinye gen kè kontan paske nou gen asirans lavi a ap pi bèl alavni. Nou konnen talè konsa Jewova pral detwi tout mechan yo e tè a pral tounen yon paradi anba dominasyon Wayòm li an. Mete sou sa, nou gen bèl espwa moun ki mouri yo pral resisite pou yo viv ak moun pa yo (Jan 5:28, 29). Ala bèl sa pral bèl! Sa k pi enpòtan an, nou gen asirans talè konsa, ni nan syèl la ni sou tè a, tout moun pral bay Papa nou ki gen lanmou an onè, louwanj ak atachman li merite a.