LÈ W marye ak yon moun epi moun nan twonpe w, se pa ti mal sa fè mal! Se vre, gen moun ki gendwa rive padone moun yo te marye avè l la lè yo wè moun nan regrèt sa, epi yo travay pou yo retounen gen yon bon relasyon ankò *. Sepandan, kit maryaj la kraze, kit li pa kraze, se sèten, moun ki vin aprann moun li marye avè l la twonpe l la ap soufri anpil anpil. Ki sa moun sa a kapab fè pou l rive jere soufrans sa pote?

Anpil nan moun ki marye yo fè adiltè sou yo rive jwenn konsolasyon nan pawòl ki nan Bib la, malgre sitiyasyon sa a fè yo soufri anpil. Yo vin aprann Bondye wè dlo k ap koule nan je yo e li konprann yo. — Malachi 2:13-16.

“Lè enkyetid te anvayi m, ou te konsole m, ou te soulaje m.” — Sòm 94:19.

Men sa Billy di: “Lè m li vèsè sa a, mwen imajine Jewova k ap konsole m avèk anpil tandrès, menm jan yon papa ki gen sousi pou pitit li t ap fè sa.”

“Ou fidèl ak moun ki fidèl.” — Sòm 18:25.

Men sa Carmen, yon dam mari l te fè plizyè mwa ap twonpe l, te di: “Mari m pa t fidèl, men, mwen te gen konfyans Jewova ap fidèl avè m.”

“Pa enkyete nou pou anyen, men fè Bondye konnen demann nou yo nan tout bagay, pa mwayen lapriyè ak siplikasyon [...]. E lapè Bondye, ki depase tout sa moun ka konprann, ap pwoteje kè nou.” — Filipyen 4:6, 7.

Sara fè konnen: “Mwen li vèsè sa yo plizyè fwa. E lè m priye Bondye, li fè m jwenn lapè.”

Tout moun nou sot pale de yo la a te anvi mouri yon moman nan lavi yo. Men, yo te met konfyans yo nan Jewova Dye e yo te jwenn fòs lè yo te li Bib la. Men sa Billy fè konnen: “Nan moman tout bagay te tèt anba nan lavi m, lafwa m te bay lavi m yon sans. Menm pandan m t ap mache nan ‘vale fènwa pwès la’, Bondye te ansanm avè m.” — Sòm 23:4.