Kite Pawòl Bondye a anseye w

Ki jan w ka pwoche bò kote Bondye?

Atik sa a soulve kèk kesyon petèt ou konn ap poze tèt ou e li montre ki kote ou kapab li repons yo nan pwòp bib ou. Temwen Jewova yo ap byen kontan pale sou repons sa yo avè w.

1. Èske se tout priyè Bondye koute?

Jewova envite moun tout nasyon pwoche bò kote l nan lapriyè (Sòm 65:2). Men, li pa koute tout priyè. Pa egzanp, lè Izrayelit yo te pèsiste nan fè sa k pa bon, Bondye te refize koute priyè yo (Ezayi (Izayi) 1:15). Epitou, si yon gason ap maltrete madanm li, priyè l kapab bloke (1 Pyè 3:7). Epoutan, Bondye ap tande priyè menm moun ki konn fè gwo peche si yo repanti. — Li 2 Kwonik 33:9-13.

2. Ki jan nou ta dwe priye?

Lapriyè se yon privilèj e se yon pati nan adorasyon n ap bay Bondye, se sa k fè se Jewova sèlman nou ta dwe priye (Matye 4:10; 6:9). Etandone nou enpafè e nou pa ka pwoche bò kote Bondye poukont nou, nou ta dwe priye nan non Jezi paske se li ki “chemen” Bondye chwazi pou nou pwoche bò kote l (Jan 14:6). Jewova pa vle pou n ap repete priyè pakè oswa pou n ap repete priyè ki ekri, men li vle pou priyè nou yo sot nan kè nou. — Li Matye 6:7; Filipyen 4:6, 7.

Kreyatè nou an ka menm koute priyè moun fè an silans (1 Samyèl 1:12, 13). Li envite nou priye nan tout okazyon, tankou nan kòmansman jounen an, nan aswè, lè n pral manje e lè n gen pwoblèm. — Li Sòm 55:22; Matye 15:36.

3. Poukisa kretyen yo dwe reyini?

Li pa fasil pou nou pwoche bo kote Bondye, paske n ap viv nan mitan moun ki pa gen lafwa nan Bondye e k ap pase pwomès li fè pou gen lapè sou tè a nan rizib (2 Timote 3:1, 4; 2 Pyè 3:3, 13). Se sa k fè nou bezwen reyini ak kwayan parèy nou yo k ap ankouraje nou. — Li Ebre 10:24, 25.

Ou ka pwoche bò kote Bondye si w fè zanmi ak moun ki renmen l. Reyinyon Temwen Jewova yo fè yo ban nou okazyon pou nou jwenn ankourajman nan lafwa lòt moun. — Li Women 1:11, 12.

  4. Ki jan w ka pwoche bò kote Bondye?

Ou ka pwoche bò kote Jewova lè w medite sou sa w aprann nan Pawòl li a. Ou bezwen byen reflechi sou aktivite l yo, direksyon li bay ak pwomès li fè. Lapriyè ak meditasyon ap pèmèt ou montre bonjan apresyasyon pou lanmou Bondye ak sajès li genyen. — Li Jozye 1:8; Sòm 1:1-3.

Ou ka pwoche bò kote Bondye sèlman si w kwè nan li, si w gen lafwa nan li. Men, lafwa tankou yon bagay ki vivan e ki bezwen yo pran swen l pou l ka ret vivan. Ou dwe nouri lafwa w toutan lè w kontinye medite sou sa w te deja aprann yo. — Li 1 Tesalonisyen 5:21; Ebre 11:1, 6.

5. Ki byenfè w ap jwenn lè w pwoche bò kote Bondye?

Jewova pran swen moun ki renmen l. Li pwoteje yo pou anyen mal pa mete ni lafwa yo ni esperans yo genyen pou yo viv pou toutan an an danje (Sòm 91:1, 2, 7-10). Li avèti nou konsènan kèk fason moun viv ki se yon menas pou sante nou e ki ka fè nou pèdi jwa nou. Jewova anseye nou pi bon fason pou nou viv. — Li Sòm 73:27, 28; Jak 4:4, 8.

Pou plis enfòmasyon, gade chapit 17 nan liv Ki sa Labib anseye toutbonvre? a. Se Temwen Jewova ki pibliye l.