Gen yon dam ki pa t ka kwè Jewova ta ka janm gen rezon pou l enterese avè l. Men sa l te di: “Yon santiman m ap eseye goumen avè l se santiman kòmkwa m pa vo anyen, e se te pi gwo obstak ki anpeche m pwoche bò kote Bondye.” Èske w konn santi w menm jan ak dam sa a? Si se sa ou ka ap mande tèt ou: Èske Bondye gen sousi pou chak grenn sèvitè l yo toutbonvre? Repons lan se wi! Nou ka jwenn bonjan prèv ki montre Jewova gen sousi pou nou lè nou egzamine pawòl Jezi te di yo. — Li Jan 6:44.

Jezi se moun ki pi byen konnen pèsonalite Jewova ak volonte Jewova pase nenpòt lòt moun. Ki sa l te di (Lik 10:22)? Men sa Jezi esplike: “Pèsonn pa ka vin jwenn mwen si Papa m ki voye m nan pa rale l vini.” Donk, nou pa ka vin disip Jezi e yon sèvitè Jewova, Papa nou ki nan syèl la, san se pa Jewova li menm ki rale nou vin jwenn li (2 Tesalonisyen 2:13). Si nou byen konprann sa pawòl Jezi yo vle di, ebyen n ap wè pawòl li di yo montre jan Bondye gen sousi pou nou.

Sa sa vle di Jewova rale nou vin jwenn li? Yo konn itilize vèb grek “rale” a tou lè y ap pale de pechè pwason k ap rale yon filè ki plen pwason (Jan 21:6, 11). Èske Jewova rale nou pou nou sèvi l san nou pa menm vle sa? Non. Jewova ban nou libète pou nou deside. Donk, li pa fè presyon sou nou pou nou ouvri kè nou (Detewonòm 30:19, 20). Gen yon biblis ki ale nan menm sans lan. Men sa l di: ‘Kè lòm pa tankou yon pòt ki gen yon manch pa deyò pou moun ouvri l. Men, se pa anndan sèlman li ka ouvri.’ Jewova ap chèche nan kè plizyè milya moun ki sou tè a pou l wè kiyès nan yo ki vle konnen l (1 Kwonik 28:9). Lè li jwenn moun konsa, li aji yon fason ki touche kè yo. Kòman l fè sa?

Avèk jantiyès, Jewova atire “moun ki [...] nan bon dispozisyon” yo oswa li rale yo (Travay 13:48). Gen de fason Jewova fè sa. Premyèman, li fè sa pa mwayen mesaj bon nouvèl la nou jwenn nan Bib la, mesaj ki touche kè nou chak. Dezyèmman, li fè sa pa mwayen lespri sen l. Lè Jewova wè gen yon moun ki aksepte mesaj ki nan Bib la, li itilize lespri sen l pou l ede moun sa a konprann epi aplike verite sa a nan lavi l (1 Korentyen 2:11, 12). San èd Bondye, nou pa t ap janm ka byen suiv eganp Jezi e konsa nou pa t ap janm ka vin bonjan sèvitè Jewova.

Men, ki sa pawòl Jezi te di nou jwenn nan Jan 6:44 la aprann nou sou Jewova? Jewova rale moun vin jwenn li paske li wè sa k bon nan kè yo e li gen sousi pou chak moun sa yo. Dam nou te pale nan kòmansman atik sa a te santi l soulaje lè l te aprann bonjan verite sa a. Men sa l di: “Lè yon moun ap sèvi Jewova, se pi gwo privilèj moun sa a ka genyen. E si Jewova chwazi m pou m sèvi l, ebyen mwen dwe gen anpil valè nan je l.” E ou menm? Lefètke w konnen Jewova gen sousi pou chak grenn sèvitè l yo, èske sa pa pouse w ouvri kè w ba li?