Jewova te kreye plizyè milyon zanj byen lontan anvan l te kreye lèzòm (Jòb 38:4, 7). Zanj yo se yon seri kreyati ki pisan k ap sèvi Bondye. Pafwa, Bondye voye yo pou yo gide sèvitè l gen sou tè a e pou yo pwoteje yo (Sòm 91:10, 11). Jodi a, zanj yo ap ede moun yo jwenn byenfè grasa bon nouvèl disip Jezi yo ap preche a. — Li Revelasyon 14:6, 7.

Èske nou dwe priye zanj yo pou yo ka ede nou? Non. Lapriyè se yon jès adorasyon, e se sèl Bondye nou dwe adore (Revelasyon 19:10). Etandone zanj yo se sèvitè Bondye, se enstriksyon Bondye ba yo yo obeyi, se pa enstriksyon lèzòm. Kidonk, se Bondye nou dwe toujou priye nan non Jezi. — Li Sòm 103:20, 21; Matye 26:53.

Bondye te kreye zanj yo avèk libète pou yo deside, yo ka chwazi fè sa ki byen oswa fè sa ki mal menm jan ak lèzòm. Malerezman, gen anpil zanj ki rebele kont Bondye (2 Pyè 2:4). Premye zanj ki te rebele a se Satan. Apre sa, gen lòt zanj ki suiv li nan rebelyon sa a e yo vin tounen demon. Pa gen twò lontan, yo te mete Satan ak demon yo deyò nan syèl la e yo te pimpe yo nan vwazinaj tè a. — Li Revelasyon 12:7-9.

Pil mechanste ak vyolans k ap ogmante sou tè a depi 1914, se prèv ki montre, talè konsa, Bondye pral mete Satan ak demon yo nan yon eta kote yo pap ka fè anyen ankò. Apre sa, Bondye pral fè tè a tounen jan l te ye okòmansman an. — Li Revelasyon 12:12; 21:3, 4.