Jou ki te 4 oktòb 2014 la, te gen 19 000 moun ki te asiste 130^yèm reyinyon ànyèl Watch Tower Bible and Tract Society of Pennsylvania te fè a. Yo te fè pwogram nan nan Sal asanble Temwen Jewova yo nan Jèze Siti, ki nan eta Noujèze, Ozetazini, e yo te pase l pa mwayen videyo plizyè lòt kote.

Se Mark Sanderson, yon manm Kolèj santral Temwen Jewova yo, ki te prezide reyinyon an. Nan entwodiksyon li te fè a, li te montre reyinyon ane sa a se yon evènman istorik, piske sa fè 100 an depi Wayòm Mesi a tabli.

Frè Sanderson te pale konsènan twa gwo bagay Wayòm nan deja reyalize pandan 100 premye ane l yo:

• Yon travay predikasyon k ap fèt sou tout tè a. Grasa benediksyon Jewova, pèp li a travay san rete pou simaye bon nouvèl konsènan Wayòm nan. Nan ane 1914, nou te sèlman kèk milye pwoklamatè, e pandan ane sèvis 2014 la, nou te rive plis pase uit milyon. N ap kontinye preche avèk zèl jiskaske Jewova di travay la fini.

• Moun ki pral viv anba dominasyon Wayòm nan jwenn pwoteksyon antanke gwoup. Gwo potanta nan legliz yo ak otorite nan gouvènman yo opoze anpil ak Temwen Jewova yo, yo menm eseye elimine nou nèt. Men, Jewova pwoteje sèvitè l yo antanke gwoup. Nou ranpòte anpil viktwa nan tribinal, san wete viktwa nou ranpòte devan pi gwo tribinal peyi Etazini e devan Tribinal ewopeyen pou dwa moun nan, sa ki montre Jewova kontinye ap veye sou nou jodi a.

• Li ini tout kalite moun. Wayòm Bondye a ini moun tout kote, moun tout nasyonalite ak lang. Li ede yo rezoud yon pakèt gwo pwoblèm e li ede yo vin tounen yon gwoup moun k ap adore Bondye nan tèt ansanm. Men sa frè Sanderson fè konnen: “Se sèl Jewova Dye ki ka fè yon mirak konsa.” Li fè konnen ki jan tout moun ki nan asistans lan te santi yo onore lefètke yo la nan evènman istorik sa a.

Seri videyo Fè zanmi ak Jewova a.

Sijè ki te vin apre a te baze sou seri videyo sa yo yo fè pou timoun, yon seri videyo nou pran plezi gade depi plis pase dezan. Pou kòmanse sijè a, frè Sanderson te pase yon videyo ki montre kèk entèvyou yo fè ak kèk timoun sou tout tè a. Sa te touche oditwa a anpil lè yo wè fason timoun yo t ap di mèsi ak tout kè yo pou montre ki jan yo apresye sa yo te aprann nan videyo sa yo.

Yo te montre yon nouvo videyo nan seri a ki gen tit: “Jewova ap fè w gen kouraj.” Videyo sa a dire 12 minit, li pale de istwa yon tifi izrayelit nou jwenn nan Bib la, ki te mete kouraj sou li pou l pale de Jewova ak madan Naaman (2 Wa 5:1-14). Yo te mete videyo a sou sit jw.org la jou lendi 6 oktòb 2014 la, e li disponib nan plis pase 20 lang.

JW Language.

Frè Sanderson te anonse yon nouvo aplikasyon pou moun ki gen aparèy elektwonik. Aplikasyon sa a ap ede Temwen Jewova ki vle aprann yon lòt lang yon fason pou yo ka fè plis nan travay predikasyon an. Aplikasyon sa a gen plis pase 4 000 mo ak fraz nan 18 lang. Yo prevwa ajoute lòt mo ak lòt fraz ansanm ak lòt prezantasyon pou predikasyon ak lòt bagay ankò.

Tele JW.

Oditwa a te kontan aprann Temwen Jewova yo gen yon televizyon sou Entènèt y ap teste ki kòmanse fonksyone ann anglè sèlman. Televizyon sa a twouve l nan syèj mondyal la nan Bwouklin, Nouyòk, e y ap pase videyo, mizik ak lekti Labib sou fòm dram sou li. Chak mwa, yon manm Kolèj santral la oswa youn nan moun k ap ede komite yo ap prezante emisyon an.

Frè Sanderson te bay yon apèsi sou premye emisyon an. Se frè Stephen Lett, yon manm Kolèj santral la, k ap prezante emisyon sa a, e pwogram nan ap gen yon videyo k ap montre tout preparasyon ki te fèt pou monte televizyon sa a. Tele JW te prezante premye emisyon l nan dat 6 oktòb 2014, e nou ka al sou tv.mt1130.com pou n gade pwogram yo.

“Wayòm nan gen plis pase 100 an depi l ap dirije.”

Se Samuel Herd, yon manm Kolèj santral la, ki naratè nan yon videyo ki esplike ki jan Wayòm Bondye a te ede nou grandi epi ede n vin pi efikas nan travay predikasyon an tikras pa tikras. Nan videyo a, n ap wè kèk evènman istorik, demonstrasyon ak eksperyans kèk Temwen ki te la lontan te fè ki montre fason yo te pwodui Fotodram kreyasyon an ak fason yo te pibliye l, fason yo te konn sèvi ak fonograf yo, kat pou bay temwayaj yo, pankat yo, machin ki gen opalè sou tèt yo ak lekòl yo te òganize pou ban nou fòmasyon pou travay predikasyon an.

Ki byenfè n ap jwenn lè n reflechi sou sa Wayòm Bondye a reyalize pandan 100 premye ane l yo? Lè n fè sa, Wayòm nan ap vin pi reyèl pou nou e n ap vin pi anvi wè bagay li pral reyalize alavni yo.

Kantik pou adore Jewova.

Tout moun nan asistans lan te kontan lè David Splane, yon manm Kolèj santral la, te anonse yo pral revize liv kantik Ann chante pou Jewova a. Po liv kantik la pral menm jan ak po Tradiksyon monn nouvo a e pwent paj li yo pral gen yon koulè ajan menm jan an ak Bib la. Lefètke yo itilize materyo bon kalite konsa, sa montre jis nan ki pwen mizik enpòtan nan adorasyon n ap bay Bondye a.

Epitou, frè Splane te anonse yo pral ajoute kèk kantik nan liv kantik la. Men, li pa nesesè pou n tann yo enprime liv kantik revize a pou n kòmanse chante nouvo kantik yo. Nou ka telechaje yo sou sit jw.org la chak fwa yon nouvo kantik pare.

Nan menm semèn reyinyon ànyèl la, fanmi Betèl la te repete twa nan nouvo kantik yo e yo te chante yo pandan reyinyon ànyèl la. Frè Splane te dirije koral ki te chante kantik yo te prepare espesyalman pou 100 an depi Wayòm nan tabli a ki gen pou tit: “Wayòm nan deja tabli — Fò l vini!” Apre kora la te fin chante, asistans lan te chante kantik la ansanm ak koral la. Pita nan pwogram nan, asistans lan ansanm ak koral la te chante yon lòt nouvo kantik ki gen pou tit: “Fè nou gen kran.”

Entèvyou.

Yo te pase yon entèvyou Gerrit Lösch, yon manm Kolèj santral la te fè, ki te deja anrejistre, ak twa koup ki te pase plizyè dizèn ane ap sèvi nan Betèl. Yo te pale de plizyè chanjman yo te viv pandan ane sa yo ki montre kòman pèp Bondye a ap kontinye vanse pou pi devan. Frè Lösch te di Labib te gentan anonse t ap gen amelyorasyon nan fason yo òganize bagay yo e li te ankouraje tout moun ki nan asistans lan pou yo kontinye mache ak òganizasyon Jewova a. — Ezayi 60:17.

“Lonbray ak reyalite.”

Se frè Splane ki te bay diskou sa a. Li te esplike rezon ki fè depi yon bon ti tan piblikasyon nou yo pa tèlman pale de lonbray ak reyalite jan yo te konn fè sa.

Anvan sa, yo te fè konnen anpil gason ak fi fidèl Bib la pale de yo reprezante gwoup kretyen fidèl nan epòk pa nou an. Se konsa tou, nou te panse kèk istwa nan Bib la se modèl ak reyalizasyon pwofesi ki gen rapò ak epòk n ap viv kounye a. Se vre, li ka vrèman enteresan pou n etidye konparezon sa yo. Men, poukisa piblikasyon nou yo pa tèlman pale de lonbray ak reyalite ankò?

Labib pale de kèk pèsonaj oswa kèk evènman ki reprezante yon moun oswa yon bagay ki gen plis enpòtans. Lè Bib la montre aklè rapò ki genyen ant yon lonbray ak yon reyalite, nou dakò ak sa. Frè Splane te di: “Men, kote Bib la fè silans, nou dwe fè silans tou.” Nou pa dwe ale twò lwen lè n ap li yon istwa, kòmkwa n ap chèche jwenn lonbray ak reyalite nan istwa yo. Nou kapab pèdi leson pratik vèsè yo aprann nou, kit nou gen esperans pou n al viv nan syèl la, kit nou gen esperans pou n viv sou tè a. — Women 15:4. *

“Eske w ap ‘kontinye veye’?”

Nan diskou sa a, frè Lett te ede nou konprann parabòl Jezi te bay konsènan dis fi vyèj yo (Matye 25:1-13). Men ki jan nou konprann parabòl la kounye a: Lemarye a se Jezi, fi vyèj yo se disip Jezi Bondye chwazi pa mwayen lespri sen l pou y al nan syèl la (Lik 5:34, 35; 2 Korentyen 11:2). Parabòl sa a gen rapò ak dènye jou yo, men dènye faz parabòl la ap reyalize pandan gwo tribilasyon an. Lè Jezi t ap pale konsènan senk fi vyèj ki sòt yo, li pa t vle di t ap gen moun Bondye chwazi pou al nan syèl la ki t ap vin enfidèl pou yo ta bezwen ranplase yo. Se te pito yon pinga li te bay. Menm jan ak senk fi vyèj ki te montre yo pare ansanm ak senk fi vyèj ki te montre yo sòt yo, se chak kretyen Bondye chwazi pou al nan syèl la ki gen posiblite pou yo deside si y ap prepare e y ap veye, oswa si y ap kite yo vin pa fidèl.

Avèk prensip sa a ki fè konnen, lè n ap li nou pa dwe fè twòp analiz ak yon vèsè nan Bib la, nou vin konprann li pa nesesè pou n ap analize egzanp sa a pou n ap chèche fè konparezon pwofetik ak chak detay. Olye de sa, nou dwe chèche leson pratik ki gen ladan l yo. Menmsi nou se kretyen Bondye chwazi pou al nan syèl la, menmsi nou se “lòt mouton”, nou chak gen responsablite pou nou kite limyè nou briye e pou nou “kontinye veye”. (Jan 10:16; Mak 13:37; Matye 5:16.) Pa gen okenn moun ki ka rete fidèl pou nou. Se nou chak ki “dwe chwazi lavi”, lè nou rete veyatif nan domèn espirityèl ak lè nou aktif nan travay predikasyon an. — Detewonòm 30:19.

“Parabòl talan yo.”

Se Anthony Morris, yon manm Kolèj santral la, ki te pran lapawòl apre sa. Li te ede asistans lan konprann egzanp talan an pi byen (Matye 25:14-30). Kounye a, nou vin konprann mèt la, anpalan de Jezi, ap rekonpanse esklav li yo, anpalan de disip fidèl li yo Bondye chwazi pou al nan syèl la ki sou tè a, alavni lè li vini, l ap resisite yo pou l ba yo lavi nan syèl la. Lè Jezi te pale konsènan sa ki t ap rive “esklav mechan e ki parese a”, Jezi pa t fè konnen t ap gen yon kantite disip ki t ap vin enfidèl. Olye de sa, li te montre kretyen ki gen esperans pou y al viv nan syèl yo enpòtans pou yo aji avèk dilijans e pou yo pa aji menm jan ak yon esklav ki mechan.

Ki leson pratik nou aprann nan parabòl sa a? Mèt la te konfye esklav la yon bagay ki gen anpil valè. Menm jan an tou, Jezi konfye disip li yo yon bagay ki gen anpil valè, anpalan de misyon yo genyen pou yo preche e pou yo fè disip la. Li atann pou nou fè tout sa nou kapab, selon mwayen nou, pou nou chofe nan travay predikasyon an. Frè Morris te felisite moun ki te la yo lefètke yo chofe nan travay Wayòm nan.

“Kiyès ki pral atake pèp Bondye a talè konsa?”

Se tèm sa a, ki te enteresan anpil, frè Geoffrey Jackson, yon manm Kolèj santral la, te devlope nan dènye diskou a. Frè Jackson te pale konsènan atak Gòg ki soti nan peyi Magòg la pral fè kont pèp Bondye a. — Ezekyèl 38:14-23.

Anvan sa, nou te panse Gòg se te yon non yo te bay Satan apre yo te fin chase l nan syèl la. Sepandan, frè Jackson te montre esplikasyon sa a bay kèk pwoblèm. Pa egzanp, Jewova te fè konnen lè Gòg detwi, Jewova ta dwe livre Gòg kòm “manje pou tout kalite zwazo ki konn chase e pou bèt sovaj ki nan savann nan”. (Ezekyèl 39:4.) Jewova te fè konnen tou “Gòg ansanm ak tout moun ki avè l yo” pral jwenn yon tonm sou tè a (Ezekyèl 39:11). Kòman l t ap fè posib pou yon kreyati espirityèl sibi chatiman sa yo? Yo pral jete Satan nan twou san fon an pou 1 000 an, men se pa manje y ap manje l oswa antere y ap antere l (Revelasyon 20:1, 2). Anplis de sa, nan fen 1 000 an, yo pral libere Satan nan twou san fon an e “l ap soti pou l al twonpe nasyon yo nan kat kwen tè a, Gòg ak Magòg”. (Revelasyon 20:7, 8.) Li klè, li pa posib pou Satan twonpe Gòg si se li menm ki Gòg la.

Frè Jackson te esplike Gòg ki soti nan peyi Magòg la ki nan pwofesi Ezekyèl la pa fè referans ak Satan, men li fè referans ak nasyon ki rasanble ki pral atake pèp Bondye a. Sandout, atak Gòg la ap menm ak atak “wa nò a” ansanm ak atak “wa latè yo”. — Dànyèl 11:40, 44, 45; Revelasyon 17:12-14; 19:19.

Ak ki sa “wa nò a” fè referans? N ap ret tann pou n wè. Antouka fason nou konprann evènman ki pral rive yo toutpandan y ap dewoule kontinye fòtifye lafwa nou pi plis toujou. Nou pap pè atak yo pral fè kont pèp Bondye a, paske nou konnen yo pral atake Gòg ki soti nan peyi Magòg la, y ap detwi l nèt, men pèp Jewova a ap rete pou toutan.  *

Konklizyon.

Frè Sanderson te anonse tou gen yon ti fòma Bib Tradiksyon monn nouvo a ki disponib. Anplis de sa, y ap prepare yon anrejistreman odyo pou Bib la, kote nou pral tande vwa plizyè moun k ap li pawòl pèsonaj biblik yo. Y ap mete anrejistreman sa yo sou sit la ofiramezi, y ap kòmanse ak liv Matye a anvan.

Frè Sanderson te anonse tèks pou ane 2015 la ki soti nan Sòm 106:1 ki di: “Di Jewova mèsi paske li bon.” Li te ankouraje tout moun pou yo chèche rezon pou yo di Jewova mèsi chak jou.

Nan fen asanble a, yo te chante twazyèm nouvo kantik la ki gen pou tit: “Non ou se Jewova”. Tout sèt manm Kolèj santral la te vin chante ak koral la sou estrad la, e tout moun nan asistans lan, te chante bèl nouvo kantik sa a tou. Se te yon bon fason pou yo mete fen ak reyinyon sa a ki te vrèman istorik!