Աստվածաշունչը խոստանում է. «Աստծու կամքը կատարողը մնում է հավիտյան» (1 Հովհաննես 2։17)։ Ի՞նչ է Աստված ակնկալում մեզնից։

•   Իմանալ Աստծու և նրա Որդու՝ Հիսուսի մասին։ Աստծուն ուղղած իր աղոթքում Հիսուսն ասաց. «Սա է հավիտենական կյանքը, որ ճանաչեն քեզ՝ միակ ճշմարիտ Աստծուդ, և Հիսուս Քրիստոսին, որին դու ուղարկեցիր» (Հովհաննես 17։3)։ Ինչպե՞ս կարող ենք «ճանաչել» Աստծուն և Հիսուսին։ Մենք կարող ենք ճանաչել նրանց՝ ուսումնասիրելով Աստվածաշունչը և կյանքում կիրառելով մեր սովորածը։ a Աստվածաշունչը բացահայտում է կյանք պարգևող մեր Արարչի՝ Եհովա Աստծու մտածելակերպը (Գործեր 17:24, 25)։ Սուրբ Գիրքը նաև պատմում է նրա Որդու՝ Հիսուսի մասին, որը սովորեցնում էր «հավիտենական կյանքի տանող խոսքերը» (Հովհաննես 6։67–69)։

•   Հավատ դրսևորել Հիսուսի քավիչ զոհի նկատմամբ։ Հիսուսը երկիր եկավ, որ «ծառայի և իր կյանքը փրկանք տա շատերի փոխարեն» (Մատթեոս 20։28)։ Նրա քավիչ զոհը մարդկանց համար երկրային դրախտում հավիտյան ապրելու ճանապարհ բացեց (Սաղմոս 37:29)։ b Հիսուսն ասաց. «Աստված այնքան շատ սիրեց աշխարհը, որ իր միածին Որդուն տվեց, որպեսզի ամեն ոք, ով հավատ է դրսևորում նրա հանդեպ, չկործանվի, այլ հավիտենական կյանք ունենա» (Հովհաննես 3։16)։ Ուշադրություն դարձրեք, որ Հիսուսին հավատալուց ավելին է հարկավոր անել։ Մենք պետք է «հավատ դրսևորենք նրա հանդեպ»՝ ապրելով նրա սովորեցրածներին և նրա Հոր կամքին ներդաշնակ (Մատթեոս 7:21; Հակոբոս 2:17)։

•   Դառնալ Աստծու ընկերը՝ ամուր փոխհարաբերություններ զարգացնելով նրա հետ։ Աստված ցանկանում է, որ մոտենանք իրեն ու դառնանք իր ընկերը (Հակոբոս 2։23; 4։8)։ Աստված հավիտենական է։ Մահը իշխանություն չունի նրա վրա, և նա ցանկանում է, որ իր ընկերները նույնպես ապրեն հավիտյան։ Իր Խոսքի միջոցով Աստված հայտնում է, թե ինչ է ցանկանում իրեն փնտրող բոլոր մարդկանց. «Թող ձեր սրտերը ապրեն հավիտյան» (Սաղմոս 22։26)։

 Սխալ կարծիք։ Հավիտենական կյանքը ձանձրալի կլինի։

 Փաստ։ Հավիտենական կյանքի առաջարկը Աստված է անում, նա, ով սիրում է մեզ և ցանկանում է, որ երջանիկ լինենք (Հակոբոս 1:17; 1 Հովհաննես 4:8)։ Նա գիտի, որ երջանիկ լինելու համար մենք իմաստալից աշխատանքի կարիք ունենք (Ժողովող 3:12)։ Աստված խոստանում է, որ երկրի վրա հավիտյան ապրող մարդիկ բավարարվածություն պատճառող, իմաստալից աշխատանք կունենան, որը օգտակար կլինի իրենց և իրենց սիրելիների համար (Եսայիա 65:22, 23)։

 Բացի այդ, նրանք, ովքեր կապրեն հավիտյան, նոր բաներ կսովորեն իրենց Արարչի և նրա անթիվ-անհամար ստեղծագործությունների մասին։ Աստված մարդկանց մեջ հավիտյան ապրելու և իր մասին սովորելու ցանկություն է դրել, թեև «նրանք երբեք չեն կարողանա սկզբից մինչև վերջ ըմբռնել այն գործը, որ ճշմարիտ Աստված անում է» (Ժողովող 3։10, 11)։ Հետևաբար հավիտենական կյանք ունեցողները միշտ սովորելու և հետաքրքիր բաներ անելու հնարավորություն կունենան։