2023 թ. հոկտեմբերի 14-ից դեկտեմբերի 16-ը Բարսելոնայի (Իսպանիա) «Լա Մոդելո» թանգարանում և մշակութային կենտրոնում, որը նախկինում բանտ է եղել, «Ազատազրկված՝ հանուն խղճի» վերնագրով մի նոր ցուցահանդես էր գործում։ Ցուցահանդեսի չորս բաժինների նպատակն էր հասարակությանը, այդ թվում՝ պաշտոնյաներին և կրթության ոլորտի մասնագետներին, ներկայացնել այն երիտասարդ Եհովայի վկաների կարկառուն հավատի պատմությունը, ովքեր հրաժարվել են փոխզիջումների գնալ քրիստոնեական չեզոքության հարցում։

Ցուցահանդեսը պատմում էր մեր իսպանաբնակ եղբայրների մասին, ովքեր 1930-ականներից սկսած՝ ազատազրկվում էին պարտադիր զինվորական ծառայությունից հրաժարվելու համար: 1960-1970-ականներին բանտարկված եղբայրների թիվը հասել էր մոտ 1 000-ի։ Նրանցից ավելի քան 40-ը ազատազրկվել էր «Լա Մոդելո» բանտում։

Ցուցանմուշները ներկայացնում էին, թե ինչ է նշանակում համոզմունքի հիմնավորմամբ զինծառայությունից հրաժարվելը, և թե ինչպիսին է եղել այդ երիտասարդ Վկաների կյանքը բանտում։ Տասնամյակներ շարունակ մեր հավատարիմ եղբայրները այսպիսի խիզախ դիրքորոշում են ունեցել, մինչև որ Իսպանիայի կառավարությունը 1984 թ.-ին պաշտոնապես ընդունել է համոզմունքի հիմնավորմամբ զինծառայությունից հրաժարվելու իրավունքը։

Ցուցահանդեսի բացման միջոցառմանը ելույթ ունենալու հրավեր էր ստացել պատմության պրոֆեսոր Միգել Անխել Պլազան: Նա զրուցել էր մի քանի Եհովայի վկաների հետ, որոնք ազատազրկված էին եղել «Լա Մոդելո» բանտում։ Պրոֆեսորը նշեց. «Նրանցից ոչ մեկը քննադատական մեկնաբանություն կամ բացասական բան չասաց այն մասին, թե ինչերի միջով է անցել «Լա Մոդելո» բանտում, նույնիսկ բանտապահների մասին բացասական որևէ բան չնշեց։ Բոլորը ժպիտով էին պատմում իրենց հետ պատահած դեպքերի մասին»։ Միջոցառման ներկաների թվում էր նաև եղբայր Ֆերնանդո Տրեպատը, ով ազատազրկված է եղել «Լա Մոդելո» բանտում։ Նա ասաց. «Նույնիսկ հիմա՝ ավելի քան 50 տարի անց, համոզված եմ, որ աստվածաշնչյան սկզբունքների օգնությամբ ճիշտ որոշում եմ ընդունել։ Այսօր էլ նույն կերպ կվարվեի»։

Եղբայր Դավիդ Բայդեսը, ով այդ միջոցառման պատասխանատուն էր, ասաց. «Թեև ցուցահանդեսը անցյալի մասին է, սակայն շատ ժամանակահարմար է։ Ներկայումս տարբեր երկրներում մոտ 200 Եհովայի վկաներ ազատազրկված են Աստվածաշնչի վրա հիմնված իրենց հավատալիքների համար»։

Շատ ենք գնահատում Իսպանիայի մեր եղբայրների նվիրվածությունը և տասնամյակներ շարունակ դրսևորած դիմացկունությունը։ Մենք կշարունակենք աղոթել ներկայումս բանտում գտնվող մեր հավատակիցների համար (Եբրայեցիներ 13։3)։