Kako. Tji wa sasaneke kuna omatjangwa omakuru Ombeibela i raisa kutja kai ya rundururwa nandarire kutja ya tjangururwa ozombura ozengi nḓa kapita poviṋa mbi hakahana okukurupa.

 Omatjangwa omengi wOmbeibela omakuru ya munika. Tjiva ye noviṋa mbi ha hitasana, pu mape raisa kutja mwa ri nozondataiziro indu tjaa ye tjangururwa. Ombangu ndji ri po ndji kanene nu kai tanaura omaheero womatjangwa. Posi yokutja, pa munikwa ozondataiziro tjiva nḓaa ze munika aayo za tjitirwa owina ozombura ozengi nḓa kapita okurundurura ombuze yOmbeibela. Tara kovihorera vivari mbi:

1.   Mu 1 Johanes 5:7, Ozombeibela tjiva nḓa torokwa rukuru ze nomambo nga: “meyuru: Ihe, Embo, nOmbepo ondjapuke, nu avetatu mba i vemwe.” Posi yokutja omatjangwa omakuru ya raisa kutja omambo ngo ka mu ya ri momatjangwa omatenga. Owo ya weziwa kombunda. a Kunao, Ozombeibela tjiva ndino za pitisa omambo ngo.

2.   Ena ra Mukuru ri munika povikando ovingi momatjangwa omakuru wOmbeibela. Posi yokutja, omatorokero wOzombeibela ozengi za pingenisa ena ra Mukuru nomaisaneno wondjozikiro tjimuna “Muhona” poo “Mukuru.”

 Omatjangwa omengi ya munika nu ye tjita kutja i rire oupupu okumuna ozondataiziro. b Hapo omasasanekero womatjangwa nga ya raisa tjike ohunga nouatjiri Ombeibela mu ya tjangwa ndino?

•   William H. Green tja hungirira kOmatjangwa wOtjiheberi nge tjiukwa kutja “Etestamente ekuru” wa tja: “Omundu auhe ma yenene okutja kape nomatjangwa warwe omakuru nga yenena okutorokwa momuano omusemba tjimuna ngo.”

•   Ohunga nomatjangwa wOtjigrike poo “Etestamente epe” omukonḓonone F.  F.  Bruce wa tjanga kutja: “Pe notjiraisiro tjokutja omuano Etestamente epe mu ratjangwa wa kapita omatjangwa wovatjange woruveze orukuru, nu kape nomundu ngwa rora okukara nomapuriro ohunga notjiṋa hi.”

•   Omutjange omutjiukwa womatjangwa wOmbeibela Frederic Kenyon, wa tja “omundu auhe ma yenene okuṱiza Ombeibela meke re nu nokuhina ondira poo ongeyangeyero a yenene okutja wa ṱiza Embo ra Mukuru rwouatjiri meke re, nda tja ngwa nokuhina okupandjarisa ombuze onanḓengu okuza komuhoko nga komuhoko.”

•   Ovatjange mba tjangurura Estestamente ekuru nepe kave isamene ozondataiziro ozonene nḓa tjitwa i yovakarere va Mukuru. c (Numeri 20:12; 2 Samuel 11:2-4; Ovagalate 2:11-14) Momuano otjingewo, owo kave isamene omatjangwa nge nakaura ovitjitwa vyomuhoko wOvajuda ovivi nomahongero wovandu. (Hosea 4:2; Maleaki 2:8, 9; Mateus 23:8, 9; 1 Johanes 5:21) Otja tjaave tjangurura omatjangwa ngo momuano omusemba va raisa ouṱakame nondengero onene kEmbo ra Mukuru.

•   Ndovazu Mukuru ongwa hinga ovandu kutja ve tjange Ombeibela, hapo eye kamaa tjevere ombuze ndji ri mOmbeibela kutja ai ha pandjara wina? d (Jesaja 40:8; 1 Petrus 1:24, 25) Kombanda yanao, ondando ya Mukuru kaya ri okuvatera ovandu mba hupire rukuru uriri nungwari ya ri okuvatera eṱe ndino wina. (1 Ovakorinte 10:11) Kunao, “Omambo aehe nga tjangwa mOmatjangwa ya tjangerwa okutuhonga, kokutja tu kare nomaundjiro, nga zikama mouretima na momapanḓiparisiro ngu twa pewa i Omatjangwa.”—Ovaroma 15:4.

•   Jesus novemukongorere aave hungire okuza mOmatjangwa wOtjiheberi nokuhina okuraisa ongendo ohunga noukahu womatjangwa omakuru ngo.—Lukas 4:16-21; Oviungura 17:1-3.