Omomuano uṋe ombunguhiro ya Jesus mu i ri “onguturiro yovengi”?

NYANDA MO

Eziriro okuza mOmbeibela

Okupitira mombunguhiro ya Jesus, Mukuru u kutura poo u yama ovandu kouvi nonḓiro. Ombeibela i tja ombinḓu ya Jesus ndja tika otjisuta tjonguturiro. (Ovaefese 1:7; 1 Petrus 1:18, 19) Ku nao, Jesus wa tja eye we era ‘okuyandja omuinyo we u rire onguturiro yovengi.’—Mateus 20:28.

Omena raye ovandu ovengi tjaave hepa “onguturiro?”

Omurumendu omutenga Adam wa ri ohomonena nu kaari nouvi. Eye aa yenene okuhupa nga aruhe, posi ya wa toorora okuhinokukara nonḓuviro ku Mukuru. (Genesis 3:17-19) Indu tja kakara novanatje, owo va rumata ouvi okuza ku ye. (Ovaroma 5:12) Mena ranao, Ombeibela i tja Adam we ‘rirandisa’ omuini novanatje ve otjovakarere kouvi nonḓiro. (Ovaroma 7:14) Mena rokutja kava ri ohomonena, owo kaave yenene okusuta imbi Adam mbya pandjara.—Epsalme 49:7, 8.

Mukuru wa ṱotjari nozondekurona za Adam mena rokutja kava ri nomaundjiro. (Johanes 3:16) Nungwari, mena rokutja eye oMukuru wousemba kaa yenene okuisira ouvi wawo nokuhinepu esemba rokutjita nao. (Epsalme 89:14; Ovaroma 3:23-26) Mukuru wa suvera ovandu, ku nao eye wa yandja ihi tjaatji heperwa po kutja omauvi wawo aye ha isirwa uriri nungwari wina ye isapewe oparukaze. (Ovaroma 5:6-8) Otjisuta tjonguturiro o tjaatji heperwa po.

Otjisuta tjonguturiro tji ungura vi?

MOmbeibela, embo ndi “onguturiro” ri kamburira mo oviṋa vitatu mbi:

Otjisuta.—Numeri 3:46, 47.
Tji eta onguturiro poo ondjamo.—Eksodus 21:30.
Otjo tji yarura po onḓengu yotjiṋa tji tja nyonoka. a

Ripurira komuano oviṋa mbi mu mavi ṱunu kotjisuta tjonguturiro tja Jesus Kristus.

Otjisuta. Ombeibela i tja Ovakriste va “randwa.” (1 Ovakorinte 6:20; 7:23) Otjisuta ho, ombinḓu ya Jesus ndja “randera Ndjambi ovandu momihoko avihe na momaraka aehe na moviwaṋa avihe na movanavisenginina avehe.”—Omavandururiro 5:8, 9.
Onguturiro. Otjisuta tjonguturiro tja Jesus tji tu pa “onguturiro” kouvi.—1 Ovakorinte 1:30; Ovakolose 1:14; Ovaheberi 9:15.
Tji yarura po onḓengu. Otjisuta tjonguturiro tja Jesus tji yarura po onḓengu yaimbi Adam mbya pandjara mbu ri omuinyo ohomonena. (1 Ovakorinte 15:21, 22, 45, 46) Ombeibela i tja: “Ovandu avehe otja punga ava rira ovanauvi motjimbe tjokuhazuva kwomundu umwe [Adam], owo avehe wina opunga amave varwa otja ovasemba komurungu waNdjambi motjimbe tjonḓuviro yOmundu umwe ngwi [Jesus Kristus].” (Ovaroma 5:19) Ihi tji kahurura omuano onḓiro yomundu umwe mu mai yenene okurira onguturiro yovengi kouvi. Ouatjiri kutja, ombunguhiro ya Jesus otjisuta tjonguturiro tji tja ‘kutura ovandu avehe’ imba mbe toora omikambo mbi mavi heperwa po okumuna ouwa okuza ku tjo.—1 Timoteus 2:5, 6.

a MOmbeibela embo ndi “onguturiro” orini ri heya ondjambi poo onḓengu yotjiṋa tji tja sutwa. Otjotjihorera, embo rOtjiheberi ndi ka·pharʹ ri heya ‘okuromba’ poo okuvandeka. (Genesis 6:14) Oro potuingi ri heya okuvandeka ouvi. (Epsalme 65:3) Embo tjingero ndi koʹpher ri heya ondjambi ndji sutwa okuisa po ouvi mbwa vandekwa mbo, poo okuyama omiinyo. (Eksodus 21:30) Momuano tjingewo, embo rOtjigrike ndi lyʹtron nda torokwa otja “onguturiro,” wina mari yenene okuheya “ondjambi ndja sutwa okuyama omiinyo.” (Mateus 20:28; The New Testament in Modern Speech, R. F. Weymouth) Ovatjange vOtjigrike va ungurisa embo ndo okuheya otjisuta tji tji yandjwa okukutura omurwe wovita ngwa kamburwa poo okukutura omukarere.