Jesus wa yama ovandu ovaṱakame indu tja yandja omuinyo we otjotjisuta tjonguturiro. (Mateus 20:28) Ku nao, Ombeibela opu i zokuisana Jesus kutja “Omukuture wouye.” (1 Johanes 4:14) Oyo wina i tja: “Ondjamo i za mu Jesus porwe, nu kape na ena rarwe nda yandjewa kovandu kombanda yehi arihe Ndjambi me vanga kutja a rire mu twa kuturwa.”—Oviungura 4:12.

 Jesus wa ‘ṱira ovandu avehe,’ imba mbe nongamburiro mu ye. (Ovaheberi 2:9; Johanes 3:16) Okuzambo, “Ndjambi we Mu pendura movakoke,” nu Jesus wa yaruka keyuru otjotjiutwa tjombepo. (Oviungura 3:15) Ingo, Jesus u yenena “okuyama imba mbe ya ku Ndjambi mena re, Eye tjinga e nomuinyo nga aruhe okuveyarikaṋena ku Ndjambi.”—Ovaheberi 7:25.

Omena raye tji tu hepa Jesus okutuyarikaṋena po?

 Eṱe atuhe twa tura ondjo. (Ovaroma 3:23) Ouvi wa tjita kutja tu humburuke kokure na Mukuru, nu u yeta onḓiro. (Ovaroma 6:23) Posi ya, Jesus ‘omuhungirire po’ waimba mbe nongamburiro motjisuta tje tjonguturiro. (1 Johanes 2:1) Eye u riyarikaṋena wo mokuningira Mukuru okuzuvira ozongumbiro zawo, nokuveisira omauvi wawo okupitira motjisuta tjonguturiro tja Jesus. (Mateus 1:21; Ovaroma 8:34) Mukuru u puratena omaningiriro wa Jesus ngo, mena rokutja ye ri otja kombango ye. Mukuru wa hinda Jesus kombanda yehi kokutja “ouye u yamwe i Ye.”—Johanes 3:17.

Hapo okukara nongamburiro mu Jesus ootjiṋa atjiyerike tji matu hepa kutja tu yamwe?

 Kako. Eṱe matu hepa okutjita ovingi pendje nokukara nongamburiro mu Jesus uriri. (Oviungura 16:30, 31) Ombeibela i tja: “Notja orutu nokuhinomasuvaneno tjinga arwa koka, ongamburiro nokuhinoviungura wina otjinga aya koka.” (Jakobus 2:26) Kutja tu yamwe, eṱe matu sokutjita oviṋa mbi:

•   Okurihonga ohunga na Jesus na Ihe, Jehova.—Johanes 17:3.

•   Okukurisa ongamburiro yetu mu wo.—Johanes 12:44; 14:1.

•   Okuraisa ongamburiro yetu mokuṱakamisa omarakiza wawo. (Lukas 6:46; 1 Johanes 2:17) Jesus wa honga kutja kaauhe ngu me mu isana kutja: “Muhona” ngu ma yamwa, posi ya owomba aveyerike mbu mave “yenenisa ombango ya [Ihe] ngu ri meyuru.”—Mateus 7:21.

•   Kayende komurungu okuraisa ongamburiro yoye nandarire kutja mo munu omauzeu. Jesus wa raisa oukahu indu tja tja: “Ingwi ngu ma panḓere po nga komaandero, ma yamwa.”—Mateus 24:13.