“Ami mba kondja okulesa Ombeibela posi yokutja i ndji urisa mena roure wayo”​—Briana, 15.

 Ove u noumune mbo? Orupa ndwi maru ku vatere

•  Ongwaye tji mo sokulesa Ombeibela?

•  Omomuano uṋe mu mo sokulesa Ombeibela?

•  Ovakweṋu ve tja vi

 Hapo okulesa Ombeibela otjiṋa tji tji ku urisa? Tji pe ri nao, iho otjizuvakwa. Ove ngahino u ripura kutja Ombeibela embo nde ura ozombapira ozengi nu nḓe hi noviperendero tjimuna motivii nouvidio

 Posi yokutja ripura nOmbeibela momuano mbwi: Indu tji wa munu otjikesa otjikuru tjovihuze, hapo ko tjo vanga okutjiwa kutja muna iye moukoto?

 Ombeibela wina embo ndi novihuze. Oyo i noungo mbu mau yenene okukuvatera

•   Okutwa po ozondando ozosemba

•   Okuzuvasana ku novanene voye

•   Okupaha omapanga omasemba

•   Okutjinda ozongendo

 Hapo embo ekuru nao mari yenene vi okutuvatera ndino? Omena rokutja “omatjangwa aehe ya tjangwa nombatero yOmbepo ya Ndjambi.” (2 Timoteus 3:16) Pu mape hee kutja ondunge aihe ndji ri mOmbeibela ya za komundu ngu nounongo tjinene.

 Omuano umwe mu mo sokulesa Ombeibela okuza kembo nga kembo. Iho matji tjiti kutja u tjiwe ombuze ndji ri mOmbeibela. Pe nomiano omingi vyokulesa Ombeibela. Tara kovihorera vivari mbi:

•    Ove mo yenene okulesa omambo 66 wOmbeibela mongongorasaneno okuza ku Genesis nga kOmavandururiro.

•    Mo yenene okulesa Ombeibela otja kongorasaneno yovitjitwa mbi mavi hungire otjiṋa tjimwe.

 Ondunge: Orupa 4 rwOkambo kokukonḓonona Embo raMukuru maru ku pe ongongorasaneno yovitjitwa vya Jesus ovinanḓengu indu tja ri kombanda yehi.

 Omuano outjavari wokulesa Ombeibela okupaha ehungi ndi mari ṱunu kouzeu woye. Otjotjihorera:

•   Hapo ove u vanga okukara nomapanga omawa? Lesa ehungi ra Jonatan na David. (1 Samuel, ekondwa 18-20) Okuzambo ungurisa ombapira ndji nomapuriro ndji “How to Find Loyal Friends” okurihonga omapu omananḓengu okuza kehungi ndo.

•   Hapo mo vanga okutjiwa omuano mbu mau ku vatere okupirukira omarorero? Lesa ehungi ohunga na Josef tja pirukira omarorero. (Genesis, ekondwa 39) Okuzambo ungurisa ombapira ndji nomapuriro ndji “How to Resist Temptation . . . Joseph—Part 1” na indji “Falsely Accused! Joseph​—Part 2” okurihonga omapu omananḓengu okuza kehungi ndo.

•   Hapo mo vanga okutjiwa kutja ongumbiro mai ku vatere vi? Lesa ehungi ra Nehemia. (Nehemia, ekondwa 2) Okuzambo ungurisa ombapira ndji nomapuriro ndji “God Answered His Prayer” okurihonga omapu omananḓengu okuza kehungi ndo.

 Ondunge: Tji mo lese Ombeibela tjita kutja ape ha kara orurokoho ongondoroka na ove kutja u sore okuyandja ombango nawa.

 Omuano outjatatu wokulesa Ombeibela okupaha ehungi poo Epsalme, lesa nu u tare kutja mari ku vatere vi. Tji wa zu nokulesa, ripura omuini omapuriro tjimuna nga:

•    Omena raye Jehova tja tjanga ehungi ndi mOmbeibela?

•    Hapo oro mari ndji hongo ye ohunga novikaṋena vya Jehova nomuano me tjita oviṋa?

•    Hapo me ungurisa vi ondjivisiro ndji mehupo randje?

 Ondunge: Twa po ondando. Tjanga omayuva mu mo vanga okuuta okulesa Ombeibela yoye.