Ena ra Mukuru otjikwaye? Mukuru omuini u tja: “Owami Jehova. Indo eena randje.” (Jesaja 42:8, NW) Ena ra Mukuru ri munika ovikando 7 000 mozOmbeibela zarwe ozonguru. Posi yokutja, ovatoroke ovengi vOmbeibela va pingenisa ena re nomana wondjozikiro tjimuna “Muhona.” Mena rokutja Mukuru u vanga kutja u rire epanga re, eye u ku ṋanga kutja u ‘riheke kena re.’—Epsalme 105:1, EEP.

Omaisaneno wa Jehova wondjozikiro. Omaisaneno wa Jehova wondjozikiro mOmbeibela “oMukuru,” “Omunamasaaehe,” “Omuute,” “Tate,” na “Muhona.” Ozongumbiro ozengi mOmbeibela za ungurisa omaisaneno wondjozikiro nge raisa ondengero ku Jehova.—Daniel 9:4.

 Ombunikiro ya Mukuru. Mukuru ombepo. (Johanes 4:24) Ombeibela i raisa oukahu kutja “kape nomundu ngwa rorere okumuna Ndjambi.” (Johanes 1:18) Ombeibela i raisa oumune we. Ovandu ve yenena okumuhihamisa omutima poo ve yenena ‘okuyorokisa omutima’ we.—Omiano 27:11; Epsalme 78:40, 41.

Ovikaṋena vya Mukuru oviwa. Mukuru u yakura ovandu avehe mba za moviwaṋa nozongaro pekepeke. (Oviungura 10:34, 35) Eye wina “omunaunyaṋutima nomunatjari, ngu nomuretima, nu ngwa tumba otjari nouṱakame.” (Eksodus 34:6, 7) Posi yokutja, pe novikaṋena vine vya Mukuru mbi ri oviwa tjinene.

Omasa. Mena rokutja eye ‘oNdjambi Omunamasaaehe,’ eye u nomasa okuyenenisa atjihe tja kwizikwa.—Genesis 17:1.

Ounongo. Kape nomundu ngu nounongo tjimuna owa Mukuru. Mena ranao Ombeibela i tja Eye ‘erike ongu nounongo.’—Ovaroma 16:27.

Ousemba. Mukuru aruhe u tjita ousemba. Oviungura “vye vya pwa,” nu eye ‘omunausemba.’—Deuteronomium 32:4.

Orusuvero. Ombeibela i tja “Ndjambi . . . orusuvero.” (1 Johanes 4:8) Mukuru ka raisa orusuvero uriri nungwari eye orusuvero. Orusuvero rwe ru ṱuna ku avihe mbye tjita nu ru tu etera ouwa momiano omingi.

Mukuru u vanga kutja tu rire omapanga we. Mukuru oTate wetu worusuvero. (Mateus 6:9) Tji twa ṱakama mu ye matu yenene okurira omapanga we. (Epsalme 25:14) Mukuru u tu ṋanga kutja tu tumbuke popezu na ye, nu tu yumbe ‘omerikendero wetu aehe . . . kombanda Ye, Eye tjinga metu pe imbi mbi matu hepa.’—1 Petrus 5:7; Jakobus 4:8.

Jesus Omuna wa Mukuru. Jesus ke ri tjimuna ovaengeli poo ovitwa varwe mbya memwa i Mukuru mena rokutja eye wa memwa i Mukuru nokuhinombatero yomundu warwe. Kunao Ombeibela i tja eye Omuna wa Mukuru. (Johanes 1:14) Jehova tja za nokumumema, Jesus wa vatera Mukuru ‘otjomuungure onongo’ okumema oviutwa avihe novandu avehe.—Omiano 8:30, 31; Ovakolose 1:15, 16.

 Jesus Kristus kena pa tja eye oMukuru. Posi yokutja eye wa kahurura, na tja: “Tjinga amba za ku Ye, nEye tjinga e ri ngwe Ndji hinda.” (Johanes 7:29) Indu Jesus tja hungira kuna umwe wovahongewa ve, eye wa tja Jehova ‘oTate, wina ngu ri Iho yeṋu’ nu ‘oNdjambi wandje, wina ngu ri Ndjambi weṋu.’ (Johanes 20:17) Kombunda yonḓiro ye, Jehova we mu pendura okukakara kokunene kwe nu we mu pa ouyara ouingi.—Mateus 28:18; Oviungura 2:32, 33.

Jesus Kristus ma yenene okukuvatera okutumbuka popezu na Mukuru

Jesus weya kombanda ehi okuyekutuhonga ohunga na Ihe. Jehova omuini wa tja nai ohunga na Jesus: “Ingwi Eye Omuna wandje omusuverwa tjinene, Purateneye ku Ye!” (Markus 9:7) Jesus u tjiwa ovingi ohunga na Mukuru okukapita avehe. Eye wa tja: “Kape na ngu ma tjiwa kutja Ihe owaṋi posi yOmuna na imba ingwi Omuna omuini mba vanga okutjiukisa.”—Lukas 10:22.

Jesus u novikaṋena vya Mukuru. Jesus wa raisa ovikaṋena vya Ihe nu mena ranao eye aa yenene okutja: “Auhe ngwa munu Ami wa munu Tate.” (Johanes 14:9) Jesus wa vatera ovandu okutumbuka popezu na Mukuru, mokuraisa orusuvero tjimuna rwa Ihe momuano ma hungire noviṋa mbyaa tjiti. Eye wa tja: “OwAmi ondjira nouatjiri nomuinyo; kape nomundu ngu ma i ku Tate nokuhinaami.” (Johanes 14:6) Eye wina wa tja: ‘Ovakumbe vatjiri mave rikotamene ku Tate mOmbepo na mouatjiri, Tate tjinga katereetere e vanga kutja ovandu mbu mave rikotamene ku Ye ve tjite nao.’ (Johanes 4:23) Hapo katjiṋa otjiwa kutja Jehova, u paha ovandu tjimuna ove, okurihonga ouatjiri ohunga na Ye?