MOmbeibela mu nomahungi wovarumendu novakazendu mba ri nomauzeu omengi pekepeke. Otja tji matu lese ovihorera mOmbeibela, matu yenene okumuna otjihorera tjOmbeibela tjomundu ngwa ri mongaro tjimuna oyetu.

Eṱe atuhe tu hepa okutjiwa kutja varwe ve zuva nawa omuano mu tu fula. Nu ihi ouatjiri, tjinenenene indu tji tu kondja nouveruke mouripura. Indu tji matu lese Ombeibela, tu rihonga ohunga na varwe mbe ripura nokufula tjimuna eṱe tji tu fula. Ku nao, eṱe tu muna kutja varwe va muna omauzeu eṱe ngu tu muna nu kave rimunu ourike.

• MOmbeibela mu nomahungi omengi waimba mbaave rimunu kutja kave nombatero. Hapo wa rora okukara noumune wokutja, ‘Ami hi nokuyenena okukayenda komurungu okuhupa momuano mbwi’? Moses, Elia na David wina va ri noumune mbwo.—Numeri 11:14; 1 Ozombara 19:4; Epsalme 55:4.

• Ombeibela i tu raera ohunga nomukazendu wena Hana ngwa “hihamwa omutima,” mena rokutja kaa yenene okumuna ovanatje nu aa tokwa i yomukazendu omunasupa Penina.—1 Samuel 1:6, 10.

• Ombeibela i tu raera ohunga nomurumendu wena Job ngu mape ya atu rihongere ko. Nandarire kutja eye wa ri nongamburiro yomasa mu Jehova, eye wa ri nouzeu ounene nu wa tja: “Ami me rihahiza; mba urwa okukara nomuinyo.”—Job 7:16.

Tji twe rihongo ohunga nomuano ovandu mbe ri mOmbeibela mu va kara nondoṋeno indu tji va ri nomeripura omavi, eṱe wina matu yenene okumuna omasa ngu matu hepa okutuurunga omauzeu ngu tu na wo.