“Hapo Mukuru wa ri pi?”
“ARUHE MBI RIPURA EPURIRO NDI: HAPO MUKURU WA RI PI?”—Inga omambo wOmunane wokereka yOkatolika wena Benedict XVI, indu tja kavarura okamba yovakamburwa poAuschwitz, moPoland.
INDU TJI PA TJITWA OVIWONGA, OVE U RIPURA KUTJA, ‘HAPO MUKURU WA RI PI?’ POO PA TJITWA OTJIṊA OTJIHIHAMISE TJINENE MEHUPO ROYE TJI TJE KU HINGA OKURIPURA KUTJA, ‘HAPO MUKURU TJIRI U NAKONATJA NA OVE?’
Mape ya u noumune tjimuna imbwi owa Sheila, ngu kara mOmahi Omakutasane wa Amerika. Eye we kurira meṱunḓu ndaa ri i kokereka tjinene. Nu wa tja: “Okuza kouṱiṱi wandje, ee vanga okukara popezu na Mukuru mena rokutja eye Omuute wetu. Posi yokutja hee munu kutja me yenene okutumbuka popezu na ye. Ee munu kutja eye u yandja ombango kwami, posiya okuza kokure uriri. Hee munu kutja Mukuru kendji vanga, posi yokutja ami wina hee kambura kutja eye u nakonatja na ami.” Ongwaye Sheila tja ri nomakeyakeyero wokutja Mukuru tjiri we mu suvera? Eye wa kahurura na tja: “Eṱe twa munine omauzeu omengi meṱunḓu retu, nu aape munika tjimuna Mukuru kee tu vatere oparukaze.”
Ove mape ya okara nongamburiro yokutja Mukuru Omunamasaaehe okeri, tjimuna Sheila. Nungwari mape ya oripura kutja, ‘Eye tjiri u nakonatja na ove poo indee?’ Omurumendu omuṱakame wena Job, wa ri nongamburiro momasa nounongo wOmuute, posi yokutja eye wina wa ri nomakeyakeyero. (Job 2:3; 9:4) Job tja za nokuwirwa i omauzeu omengi nga kongorerasana, eye wa pura Mukuru na tja: “Okutjavi tji mo ndji isa po? Okutjavi tji mo ndji zara otja omunavita na Ove?”—Job 13:24.
Hapo Ombeibela i tja vi? Matu sokuyandja ondjo ku Mukuru indu tji matu munu omauzeu poo tji pa tjitwa oviwonga? Pe noviraisiro vyokutja Mukuru tjiri u nakonatja novandu avehe, na wina omundu auhe kourike we? Mape ya atu tja Mukuru tjiri u yandja ombango kweṱe, u tjiwa omauzeu wetu, u tu ṱira ondjenda, poo kutja u tu vatera momauzeu wetu?
Morupa ndu maru kongorere ko, matu katara kutja oviutwa vi tu honga tjike ohunga nonḓero Mukuru ndje na yo mweṱe. (Ovaroma 1:20) Okuzambo matu ka konḓonona imbi Ombeibela mbi i honga ohunga nonḓero Mukuru ndje na yo mweṱe. Otja pu mo “tjiwa” Mukuru okuza koviutwa vye nEmbo re, opu mo kara nongamburiro yokutja eye u ‘ku pa imbi mbi mo hepa [poo “u rikendera kove”, NW].’—1 Johanes 2:3; 1 Petrus 5:7.
