Mukuru ke nombangu nu u vanga okusera ovandu avehe ondaya.

Mukuru wa kwizikira omuprofete Abraham kutja, “move omihoko avihe, mbi ri kombanda yehi, mavi serwa ondaya.”—Genesis 12:3.

Matu rihongo tjike? Mukuru we tu suvera tjinene nu u vanga okusera ovandu avehe mbe nonḓuviro ku ye ondaya.

Mukuru u notjari nu u sera ondaya ku imba mbe kondja okumutjiwa.

Mukuru Omunamasaaehe wa yandja omasa komuprofete Moses okutjita ovihimise ovinene. Posi yokutja, Moses wa kumba na tja: “Ndji tjivisa ombango yoye, mbi tjiwe tjiri kutja mba munu ondjingonekero mOve.” (Eksodus 33:13) Mukuru wa ri nonyuṋe mongumbiro ya Moses ne mu sere ondaya mokumupa ozondunge nounongo, kutja ma tjiwe ozondjira ze novikaṋena vye. Otjotjihorera, Moses we rihonga kutja Omuute o “Ndjambi ngu ri omunaunyaṋutima nomunatjari.”—Eksodus 34:6, 7.

Matu rihongo tjike? Mukuru u vanga okutusera atuhe ondaya, indu tji matu kondjo okumutjiwa nawa. Eye wa raisa mOmatjangwa omuano mu matu yenene okurikotamena ku ye nu u vanga okutusera ondaya.

Eṱe matu yenene okuyorokera ozondaya za Mukuru nga aruhe, indu tji twe rihongo ohunga na Jesus na imbi mbya tjita nokuhonga.

Eṱe matu yenene okurihonga oviṋa ovingi okuza mOmbeibela ohunga nehupo ra Jesus nomahongero we. Mukuru wa yandja omasa ku Jesus okutjita ovihimise ovingi, tjimuna okuverukisa ovapoṱu, ozomboro novaremane. Eye wina wa pendura ovaṱi. Kunao, Jesus wa raisa oviṋa avihe Mukuru mbi ma katjitira ovandu avehe moruyaveze. Eye wa kahurura omuano auhe wetu mu ma yenene okuyorokera ozondaya nḓo, indu tja tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.”—Johanes 17:3.

Jesus aa ṱondjenda novandu nu wa ri notjari. Jesus wa tja: ‘Rihongereye ku Ami, tjinga ambi ri ongozu nomurisusuparise momutima, neṋe mamu mwine omiinyo vyeṋu orusuvo.’ Nu iho tja tjita kutja ovarumendu novakazendu, ovaṱiṱi novanene ve ye ku ye. (Mateus 11:29) Ovandu varwe moruveze rwa Jesus aave tatumisa ovakazendu, nungwari eye aa tjindi ovakazendu nondengero nokuveṱira otjari.

Matu rihongo tjike? Jesus wa raisa orusuvero rwatjiri kovandu nu we tu raisira omuano omuwa mu matu yenene okutjindasana.

Ombeibela i honga kutja “tu na Ndjambi umwe uriri” nokutja Jesus Kristus wa ri omuhindwa wa Mukuru. (1 Ovakorinte 8:6) Jesus wa raisa oukahu kutja Mukuru omunene pu ye nokutja ongwe mu hinda kouye.—Johanes 11:41, 42; 14:28. *