Hapo ove oo tjiwa?
Ondjuwo yomawongarero wombongo meserewondo etenga: Omatunguriro wondjuwo yomawongarero wombongo i raisa oviṋenge tjiva mbya ri mondjuwo yomawongarero wombongo yeserewondo etenga ndja ri moGamla, ndji ri ozokilometa 10 komanene wokoutjiro wOmuronga wa Galilea. Otjiperendero hi matji tu pe oumune wokutja ondjuwo yomawongarero wombongo yoruveze orukuru aai munika vi
Ozondjuwo zomawongarero wombongo za utira pi?
EMBO ndi “ondjuwo yomawongarero wombongo” ra za kembo rOtjingrike ndi heya “omaworonganeno” poo “okuya pamwe.” Mena rokutja ondjuwo yomawongarero wombongo ya ri oruveze ovandu paave hongerwa, nu wina rukuru rwa ri oruveze Ovajuda paave ke rikotamenena po, kunao ena ndo aari hitasana nawa novitjitwa mbya vi tjitirwa mbo. Omatjangwa wOtjiheberi kaye tamuna oukahu kutja ozondjuwo zomawongarero wombongo okuzari oruveze ndo. Posi yokutja Omatjangwa wOtjingrike ye raisa nawa kutja ozondjuwo zomawongarero wombongo okuzari okuza keserewondo etenga O.Z.
Ovakonḓonone ovengi ve kambura kutja ozondjuwo zomawongarero wombongo za uta moruveze ndwi Ovajuda tji va ri mouhuura moBabilon. Embo ndi Encyclopaedia Judaica ri tja: “Ovajuda kava ri nOndjuwo ondjapuke tji va ri mouhuura, mena rokutja va ri nouhepe wokuyanḓiparisiwa owo povikando mape ya aave ya pamwe okulesa Omatjangwa ngahino mEsabata.” Indu tji va kuturwa kouhuura pemunika tjimuna Ovajuda va kayenda komurungu okuyapamwe, kutja ve kumbe nokulesa Omatjangwa, nu owo wina aave zikamisa ondjuwo yomawongarero wombongo apehe paave tura.
Okuza meserewondo etenga O.Z., ondjuwo yomawongarero wombongo ya rira orupa orunanḓengu rwomerikotameneno wOvajuda, nu oviwaṋa ongondoroka nokuvare kwa Mediterranean, okuza kovirongo vyopokati koutjiro, na moIsrael otjini, aavi worongana pamwe poruveze ndo. Profesa Lee Levine wOuniversity yOtjiheberi moJerusalem wa tja: “Ovandu aave ungurisa [ondjuwo yomawongarero wombongo] okurihongera po, okurira po ovikurya momayuva omananḓengu, noviṋa vyombanguriro, nokuṱizira po ovimariva, nu wina aave kara nozombongarero zotjiwaṋa na inḓa zopolotika.” Komurungu eye wa tja: “Tjinene aave ungurisa oruveze ndwi komerikotameneno wawo.” Katjikumise kutja Jesus aai tjinene kondjuwo yomawongarero wombongo. (Mar. 1:21; 6:2; Luk. 4:16) Ingo aa ka honga, nokuyanḓiparisa imba mba ri mbo. Indu ombongo yOvakriste tji ya zikamisiwa, omuapostele Paulus wa zuvarisa tjinene pondjuwo yomawongarero wombongo wina. Ovandu mbaave vanga okukara noupanga wopopezu kuna Mukuru, aave i kondjuwo yomawongarero wombongo. Paulus aruhe tje ya motjihuro aai ngo rutenga okukazuvarisa.—Oviung. 17:1, 2; 18:4.
