1. Ongwaye tje ri ouzeu okutjiwa kutja omundu ma hee tjike indu tja tja we ku isire?

 INDU omundu tje tu raere kutja: “Mbe ku isire,” iho tji tu fulisa nawa, tjinenenene indu tji matu tjiwa kutja twe mu hungire omambo omavi, poo twa tjiti otjiṋa tji tje mu hihamisa. Posi ya, potuingi irira ouzeu okutjiwa kutja omundu ma hee tjike indu tja tja we ku isire. Mape ya omundu ngo ma tja ngunda oweṋe omapanga omawa. Poo ke nokuvanga okuhungirira ku imbi mbya tjitwa, posi ya oupanga weṋu kau ri tjimuna tji wa ri rukuru. Okuisira ku heya oviṋa pekepeke kovandu.

 2. Omuano Jehova me isira wa kahururwa vi mOmatjangwa? (Wina tara komambo wokehi.)

² Omuano Jehova me tu isira wa panguka tjinene komuano mu tu isirasana. Kape nomundu ngu ma yenene okuisira omuano Jehova me isira. Omutjange wEpsalme wa tja ohunga na Jehova: “Pove pe nondjesiro yatjiri, kutja ovandu ve mune kutja oove omuhimise.” a (Eps. 130:​4, NWT) Otjingaperi kutja Jehova u ‘isira’ momuano ‘watjiri.’ Eye ongu tu raisira kutja okuisira tjiri ku heya tjike. Momazeva tjiva wOmatjangwa wOtjiheberi, ovatjange vOmbeibela va kahurura omuano Jehova me isira mokuungurisa embo ndi ve ha rora okuungurisa, indu tji mave hungirire komuano ovandu mu ve isira.

 3. Omuano Jehova me isira wa panguka vi kowetu? (Jesaja 55:​6, 7)

³ Indu Jehova tja isire omundu, ouvi womundu ngo u isapewa oparukaze. Nu omundu ngo u yenena okukara noupanga wopopezu ku na Jehova rukwao. Tjiri tu nondangi tjinene kutja  Jehova u tu isira otjikando atjihe tji twa ningire ondjesiro.—Lesa Jesaja 55:​6, 7.

 4. Jehova u tu vatera vi okuzuva nawa kutja okuisira tjiri ku heya tjike?

⁴ Ndoovazu omuano Jehova me isira wa panguka kowetu, hapo eṱe mbu tu nouvi matu yenene vi okutjiwa kutja okuisira tjiri ku heya tjike? Jehova u ungurisa ovisasanekero oviwa okutuvatera okuzuva omuano mbwe tu isira. Morupa ndwi, matu katara kovisasanekero tjiva mbyo. Ovisasanekero mbyo, mavi tu raisire kutja indu tji twe ritanaura Jehova u isa po ouvi wetu, nu u tu yandjera kutja tu kare noupanga wopopezu ku na ye rukwao. Otja tji matu kahungirira kovisasanekero mbyo, mavi ketu vatera okukurisa orusuvero rwetu nondangi ku Tate wetu ngu nouwa notjari, nu ngu tu isira momiano omingi pekepeke.

JEHOVA U ISA PO OUVI WETU

 5. Hapo pe tjitwa tjike indu Jehova tja isire omauvi wetu?

⁵ MOmbeibela, potuingi omauvi ye sasanekwa nomutwaro omuzeu. Ombara David wa tja nai ohunga nomauvi we: “Ami mba ṱomwine momupupo womauvi wandje; ya karira otja omutwaro omuzeu ku ami okuutjinda.” (Eps. 38:4) Posi ya Jehova u isira omauvi waimba mbe ritanaura. (Eps. 25:18; 32:5) MOtjiheberi embo ndi “isira” momazeva nga, ri heya “okuyera” poo “okutjinda.” Ku nao, indu Jehova tje tu isire komauvi wetu, eye u isa po omuhihamwatima mbu tu na wo. I ri tjimuna omundu ngu nomutwaro omuzeu nu mbwa isapewa.

 6. Jehova u twara omauvi wetu kokure pu pe ṱa pi?

⁶ Ombeibela i ungurisa otjisasanekero tjarwe okuraisa kutja Jehova u twara omauvi wetu kokure na eṱe. Epsalme 103:​12, ri tu raera kutja: “Otja omukuma wokomuhuka punga au ri kokure na imbwi wokongurova, opunga ama humburura ozongatukiro zetu kokure na eṱe.” Omukuma wokomuhuka u ri kokure tjinene na imbwi wokongurova. Omikuma aviyevari mbi kamaavi yenene okuhakaena. Ihi matji hee kutja Jehova u twara omauvi wetu kokure tjinene na eṱe. Ihi tji tu pa ongamburiro kutja Jehova u tu isira oparukaze.

 7. Hapo Ombeibela i tja vi ohunga na imbi Jehova mbye tjita komauvi wetu? (Mika 7:​18, 19)

⁷ Nandarire kutja Jehova u twara omauvi wetu kokure na eṱe, hapo iho matji hee kutja u ye zemburuka? Kako. Ombara Hiskija wa tjanga ohunga na Jehova kutja, “Ove we ndji isira omauvi wandje aehe,” poo “Ove wa yumba omauvi wandje ayehe kongotwe yoye.” (NWT) (Jes. 38:​9, 17) Ihi matji hee kutja Jehova u imbirahi omauvi wa imba mbe ritanaura nu ke ye zemburuka rukwao. Omambo ngo wina maye yenene okutja: “Ove wa tjita [omauvi wandje] ye munike tjimuna hi ya tjita ouvi.” Ombeibela i kahurura epu tjingero motjisasanekero tjarwe tji tji ri mu Mika 7:​18, 19. (Lesa.) Omazeva ngo maye tja Jehova u yumba omauvi wetu mourekoto wokuvare. Moruveze orukuru, otjiṋa tji tja wire mourekoto wokuvare kaatji yenene okukamunika rukwao.

 8. Twe rihongo tjike?

⁸ Ombeibela i raisa oukahu kutja indu Jehova tje tu isire, eye u isa po ouvi wetu oparukaze kutja atu he rimunu ondjo rukwao. Tjiri, otja David tja tja: “Ovaṋingandu imba mbe ha vererwa ozongatukiro zawo, nu mbe isirwa omauvi wawo. Omuṋingandu ingwi ngu ha varerwa omauvi we i Muhona!” (Rom. 4:​7, 8) Indjo ondjesiro yatjiri.

JEHOVA U ZEMISA OMAUVI WETU

 9. Omomuano uṋe Ombeibela mu i tu vatera okumuna kutja Jehova u isira oparukaze?

⁹ Okupitira motjisuta tjonguturiro, Jehova u yenena okuzemisa omauvi wa imba mbe  ritanaura. Tara komuano Ombeibela mu i kahurura oviṋa eye mbye tjita. Ombeibela i tja Jehova u kohorora omauvi wetu. Nu iho tji tjita kutja omunauvi ma rire omukohoke. (Eps. 51:7; Jes. 4:4; Jer. 33:8) Jehova omuini u tja: “Omauvi weṋu nandi ye ri omaserandu pyu, Ami me ye yepaereke okurira omavapa twee tjimuna ovitutukende; nandi ya seraera otja ombinḓu maye rire omavapa twee tjimuna ohore.” (Jes. 1:18) I rira ouzeu tjinene okukohorora otjifleke otjiserandu kerapi. Posi ya, Jehova u ungurisa otjisasanekero hi okutupa ongamburiro kutja omauvi wetu maye yenene okukohororwa kutja aye ha munika rukwao.

10. Omomuano uṋe Ombeibela mu i kahurura omuano Jehova me tu isira?

¹⁰ Otja tji twa hungirire ko morupa ndwa kapita, ouvi wina wa sasanekwa nozondjo. (Mat. 6:12; Luk. 11:4) Ku nao ozondjo zetu ze ririra ko ozengi tjinene otjikando atjihe tji twa tjiti ouvi. Eṱe tjiri tu nozondjo za Jehova ozengi. Posi ya indu Jehova tje tu isire, i ri tjimuna wa isa po ozondjo nḓu tu na zo. Eye ke tu ṋiṋikiza okusuta ozondjo eye nḓa isire. Tjimuna omundu tje kara nondjoroka indu ozondjo ze tji za isapewa, eṱe wina tu kara nondjoroka indu Jehova tje tu isire.

11. Ombeibela i heya tjike indu tji mai tja omauvi wetu ya zemisiwa? (Oviungura 3:19)

¹¹ Jehova ka isire ozondjo zetu poo omauvi wetu uriri, eye u tjita ovingi okukapita imbyo. Meraka rOtjigrike embo Paulus nda ungurisa mba ri heya okuzemisa. (Lesa Oviungura 3:19.) Otjotjihorera, ngatu tje omundu wa nana omukoka kombanda yotjivarero tjovimariva tji mo sokusuta. Posi ya, omundu auhe ma yenene okumuna otjivarero tji tjiri kehi yomukoka mbo. Nungwari okuzemisa otjiṋa kwa panguka. Kutja tu zuve nawa otjisasanekero hi, eṱe matu hepa okuzemburuka kutja moruveze orukuru oinga ovandu ndjaave ungurisa aai yenene okuzemisiwa nomeva. Omundu a yenene okuungurisa okasponsa okatarazu okuzemisa imbi mbya tja ngwa. Ku nao, indu ondjo tji ya zemisiwa oyo i zenga oparukaze nu ovandu kave yenene okumuna imbi mbya ri vya tjangwa, i ri tjimuna kapa ri nondjo. Eṱe tjiri tu nondangi okutjiwa kutja indu Jehova tja isire omauvi wetu i ri tjimuna katu ya tjita ouvi.—Eps. 51:9.

12. Matu rihongo tjike okuza kotjisasanekero tjombundu?

¹² Jehova u ungurisa otjisasanekero tjingetjo okukahurura omuano me isira omauvi wetu. Eye u tja: “Ami [me] zemisa ozongatukiro zoye tjimuna otjikamba, nomauvi woye tjimuna ombundu.” (Jes. 44:22) Indu Jehova tja isire, i ri tjimuna ma ungurisa ombundu okuhoreka omauvi wetu kutja e he ye munu, na eṱe wina.

13. Hapo tu kara noumune uṋe indu Jehova tje tu isire komauvi wetu?

¹³ Hapo ovisasanekero mbyo vi tu honga tjike? Indu Jehova tje tu isire komauvi wetu, eṱe katu sokukayenda komurungu oure womuinyo wetu okurimuna ondjo ohunga nouvi mbu twa tjita. Okupitira mombinḓu ya Jesus Kristus, ozondjo zetu za zemisiwa oparukaze. Indu Jehova tje tu isire kouvi mbu twa tjiti, i ri tjimuna katu ya rora okutjita ouvi mbwo. Jehova u tu isira momuano mbwo indu tji twe ritanaura komauvi wetu.

JEHOVA U TU YAKURA OTJOMAPANGA WE WOPOPEZU RUKWAO

14. Ongwaye tji matu yenene okukambura mu Jehova indu tja tja we tu isire? (Wina tara koviperendero.)

¹⁴ Indu Jehova tje tu isire, eṱe matu yenene okukara nongamburiro kutja eye epanga retu rukwao. Iho tji tu vatera kutja atu ha kayenda komurungu okurimuna ondjo. Eṱe katu nokuhepa  okutira kutja Jehova wa pindika ku na eṱe ngamba, nu u paha omuano okutuvera. Eye kamaa roro okutjita nao. Ongwaye tji matu yenene okukambura mu Jehova indu tja tja we tu isire? Jehova wa raera omuprofete Jeremia kutja: “Me ve isire omauvi wawo, nu hi nokuuhara ame rizemburuka nozongatukiro zawo.” (Jer. 31:34) Omuapostele Paulus wa ungurisa omambo yemwe, indu tja tja: “Hi nokuuhara ame rizemburuka nozongatukiro zawo.” (Hebr. 8:12) Hapo tjiri omambo ngo maye hee tjike?

15. Omomuano uṋe Jehova me ha zemburuka omauvi wetu rukwao?

¹⁵ MOmbeibela embo ndi “zemburuka” kaaruhe tji ri hungira ohunga nomundu ngu me rizemburuka poo okuripura notjiṋa tji tja tjitwa morukapitaveze. Nungwari, mape ya ari hee omundu ngu ma ungura otjiṋa. Omurunde ngwa twirikirwe komuti meṋe ya Jesus we mu ningira kutja: “Muhona, arikana, ndji zemburuka tji wa hiti mouhona woye!” (Luk. 23:​42, 43) Eye aa ningire Jesus okumutjitira otjiṋa oruveze ndwo. Jesus wa raera omurumendu ngo kutja me kemupendura. Ku nao, indu Jehova tja tja ke nokuzemburuka omauvi wetu rukwao, eye u heya kutja we tu isire nu ke nokuketuverera omauvi wetu moruyaveze.

16. Hapo Ombeibela i tu sasaneka ku na tjike?

¹⁶ Indu Jehova tje tu isire, eṱe tu kutuka momuinyo. Ombeibela i ungurisa otjisasanekero tjarwe okutuvatera okuzuva nawa ongutukiro ndji za mondjesiro yatjiri. Oyo i tja mena rokutja tu nouvi, eṱe tu sasanekwa ‘kovakarere vouvi.’ Posi ya, indu Jehova tje tu isire tu kara tjimuna ovakarere mba “kuturwa kouvi.” (Rom. 6:​17, 18; Omavan. 1:5) Indu tji twa tjiwa kutja Jehova we tu isire, tu kara nondjoroka tjimuna omukarere ngwa kuturwa.

17. Omomuano uṋe okuisirwa mu ku eta omberukiro? (Jesaja 53:5)

¹⁷ Lesa Jesaja 53:5. Ombeibela i tja mena rokutja oweṱe ovanauvi tu ri tjimuna ovandu mbe nomutjise omuzepe. Mena rotjisuta  tjonguturiro Jehova tje tu pa okupitira mOmuna we, Jehova we tu verura. (1 Petr. 2:24) Indu tji twa tjiti ouvi, eṱe tu zunḓa oupanga wetu ku na Jehova. Posi ya mena rotjisuta tjonguturiro, eye u yenena okutuisira nu tu kara noupanga wopopezu ku na ye rukwao. Tjimuna omundu ngwa verurwa komutjise omuzeu tje kara nondjoroka tjinene, eṱe wina tu kara nondjoroka tjinene indu tji matu yenene okukara noupanga ouwa ku na Jehova nokuyakurwa i ye rukwao.

OMUANO ONDJESIRO YA JEHOVA MU I ṰUNA KEHUPO RETU

18. Twe rihongo tjike okuza kovisasanekero mbi ri mOmbeibela ohunga nondjesiro ya Jehova? (Wina tara kokawongo nga “Omuano Jehova me tu isira.”)

¹⁸ Twe rihongo tjike okuza kovisasanekero mbi ri mOmbeibela ohunga nondjesiro ya Jehova? Indu tje tu isire, eye u tu isira oparukaze nu ke tu verere omauvi ngo moruyaveze. Ihi tji tjita kutja tu kare noupanga ouwa ku na Tate wetu womeyuru. Nungwari, eṱe tu tjiwa kutja okuisirwa i Jehova otjiyandjewa eye tje tu pa mena rokutja we tu suvera nu kamena rokutja twa pwira okuisirwa.—Rom. 3:24.

19. (a) Hapo eṱe matu sokukara nondangi ku ye? (Ovaroma 4:8) (b) Morupa ndu maru kongorere ko matu kahungirira ku ye?

¹⁹ Lesa Ovaroma 4:8. Eṱe tjiri tu nondangi kutja Jehova oMukuru ngu ‘isira’ momuano ‘watjiri.’ (Eps. 130:​4, NWT) Posi ya indu tji matu vanga kutja Jehova me tu isire, eṱe matu sokutjita otjiṋa tjimwe otjinanḓengu. Jesus wa tja: “Tji mu hi nokuisira ovakweṋu, indino Iho kemee mu isire ko ouvi mbu mwa tjita.” (Mat. 6:​14, 15) Ku nao, eṱe matu sokuhorera ku Jehova natu isire varwe. Orupa ndu maru kongorere ko maru ketu raisira kutja omomuano uṋe mu matu yenene okutjita nao.