Ba San Luis Argentina, bala menyadi kitai ngatur gempuru sereta belajarka Bup Kudus nengah video call enggau orang tangkap dalam jil. Atur nginjil nengah video call nya, keterubah iya dipejalaika ba Argentina.

Pengelama betaun-taun, menyadi kitai ba San Luis suah ngelawa rumah jil ngambika ulih ngatur gempuru sereta ngajar Bup Kudus. Tang, kenyau ari Mac 2020, lebuh perintah menua meri sekat ketegal COVID-19, atur nya diketuka. Tang, pegawai jil ngemendarka bala menyadi kitai neruska pengawa nginjil sida ba rumah jil nengah video call.

Tuai pegawai jil amat rindu enggau utai ke diajar bala menyadi kitai ngagai bala orang jil. Nyadi, iya enggau bini iya diatu sama bela enggau gempuru. Ku iya madah: “Gempuru tu amat beguna ke orang tangkap, ngambika sida berasai lantang sereta semak enggau Petara ba maya ti tusah tu, laban nadai orang ulih datai ngabas sida. Indah lebuh sida datai begempuru, sida pan diau bebaik agi enggau pangan diri. Endang amat, ajar Bup Kudus tu nulung kami nyapai juluk ati kami, iya nya, nulung orang tangkap nyadi orang ke menyana agi.”

Seiku orang ke dijil nya nulis surat ngagai bala menyadi ti ngatur pengawa nginjil ba rumah jil. Iya nerangka: “Seraya aku mupuk ari sil, lalu mansang ngagai gempuru, aku nadai agi berasai lelak, stres, tusah ati tauka enda nyamai ati ketegal dikurung, tang aku amat gaga ati. Terima kasih.”

Taja pan penanggul COVID-19 terus nyadi di serata dunya, kitai diperansang laban nemu, bala menyadi kitai benung nulung orang bukai bulih penguntung ari pesan Bup Kudus.—Isaiah 48:17, 18.