Ari ke ngatur konvensyen taun 2020 di stadium enggau palan gempuru besai, gerempung Saksi-Saksi Jehovah udah mutuska ngenataika program tu nengah online. Pengari sekeda stadium nya, udah muji gerempung kitai ketegal pemutus tu, ti digaga ngambika nyaga pengerai orang mayuh, tang maya ti sama, tetap neruska program belajarka Bup Kudus. Semua duit deposit ke udah diberi kena nyiwa stadium udah dipulaika baru.

Seiku pengari palan gempuru besai di Seoul madah: “Baka selama, Saksi-Saksi Jehovah ngaga pemutus ti ngayanka penemu-dalam. Kami amat rinduka Saksi-Saksi Jehovah. Kekadang aku berunding sekalika amat bisi gerempung pengarap bukai ti semanah Saksi-Saksi Jehovah pasal ngereja utai ti manah ngagai komuniti sida.” Iya nampung: “Saksi-Saksi Jehovah ngenuluka utai ti diguna orang bukai. Sayau amat konvensyen sida enda dipejalaika ba endur kami taun tu. Kami arapka sida deka ngena endur tu kena konvensyen sida ila.”

Seiku pengari palan gempuru besai di Suwon madah: “Aku seruran beterima kasih ke Saksi-Saksi Jehovah. Pengelama 35 taun sida nyiwa endur tu, sida nyaga sereta bebasaka bengunan tu baka ke iya enggi sida empu. Tang diatu, aku beterima kasih agi ari ke suba, laban sida ngaga pemutus ti manah, ti sejalai enggau iring ari perintah menua kena ngurangka penyakit COVID-19. Pemanah sida ngalitka ati aku. Aku enda sabar nganti betemu Saksi-Saksi Jehovah baru taun dudi.”

Seiku pengari padang bilun ke semak endur konvensyen kitai dipejalaika madah: “Kena taun 2018 enggau 2019, aku meda [Saksi-Saksi Jehovah] amat teratur, lalu jampat ngasika peminta kami. Ati aku ditegu, laban pemutus sida deka nginsil konvensyen ba orang mayuh taun tu, endang digaga laban sida ibuhka orang bukai.” Ku iya nambah: “Kami berasai, manah amat enti sema, semua orang nyadi baka Saksi-Saksi Jehovah.”

Penyembah Jehovah gaga ati laban udah diajar chara ngayanka pengerindu ngagai orang bukai. Pengerindu nya endang nyata, indah ba maya ti tusah tu.—Matthew 22:39.