Ba artikel tu

•  Nama kebuah bejaku betunga mua?

•  Chara ngepunka randau

•  Nama ku nembiak serambau nuan

 Sekeda orang madah, bejaku betunga mua tusah agi sereta stress, enti dibandingka enggau bemesej.

 “Berasai tetekan lebuh bejaku betunga mua laban nuan enda ulih ngubah tauka muai jaku ke udah disebut.”—Anna.

 “Mesej nya baka program ke udah dirikut, tang bejaku betunga mua baka ba siaran langsung. Lebuh aku bejaku enggau orang aku selalu madahka diri, ‘bejimat ngambika enda salah sebut!’”—Jean.

 Enda ngira diatu tauka dudi hari, nuan patut nemu chara bejaku betunga mua. Ngambika chunto, nuan patut nemu chara bejaku enti nuan deka bulih kaban baru, ngulihka kereja, tauka kena nuan belabuh ngepunka hubungan romantik enggau orang kedeka nuan enti nuan udah sedia.

 Nuan enda ibuh takut bejaku betunga mua enggau orang bukai. Nuan ulih belajarka chara ngereja nya, taja pan nuan siku orang ke pemalu.

 “Kekadang semua kitai nyebut utai ti salah lalu berasai malu. Anang meh kelalu serius enggau diri empu.”—Neal.

•   Kena meh tanya. Perundingka topik ke dikerinduka orang, udah nya punka randau enggau topik nya. Chunto iya:

   “Bisi kini-kini cuti tu tadi?”

   “Manah laman web tu. Kala nuan meda?”

   “Bisi nuan ninga . . . ?”

   Enti deka nyemetak agi, perundingka utai ti sama ba entara nuan sereta orang ke enggau nuan berandau. Ngambika chunto, kati seduai sama sekula tauka sama kereja? Udah nya, nuan ulih nanya pasal utai ti sama ba seduai.

   “Perundingka tanya ke diminat nuan enggau saut ke deka ditemu nuan.”—Maritza.

   Bejimat: Anang baka penasat ke enda badu-badu nanya. Pia mega, anang nanya tanya ke kelalu peribadi ba sida. Chunto iya, “Nama utai ti pemadu disenakutka nuan?” tauka “Nama kebuah nuan selalu ngena warna biru?” Tanya ke baka tu engka ngasuh sida enda berasai selesa. Tanya kedua nya baka nuan benung ngakim sida.

   Enti nuan bekunsika runding nuan sebedau tauka pengudah orang nya nyaut, nuan ulih nyeliahka diri bejaku baka penasat. Pandakka jaku, gaga meh randau nya baka biasa, ukai baka ke diinterbiu.

   Prinsip Bup Kudus: “Runding mensia baka ai ti ba telaga ti dalam, tang orang ke ngembuan runding ti dalam, ulih ngauk ai nya.”—Jaku-Dalam 20:5.

•   Nyadi peninga ti manah. Ngambika randau nya mujur, penting agi nuan nyadi peninga it manah ari ke pandai bejaku.

   “Aku nguji belajarka siti utai ti baru pasal orang ke enggau aku berandau. Udah nya, aku nguji ingatka utai ke dipadah iya ngambika aku ulih berundingka tanya ti manah maya kami berandau baru.”—Tamara.

   Bejimat: Anang irau nama utai ke deka dikerandauka nuan pengudah nya. Enti nuan ninga enggau manah, nuan tentu ulih nyaut lebuh orang nya bejaku.

   Prinsip Bup Kudus: “Jampat ninga, tang lubah bejaku.”—James 1:19.

•    Ayanka pengibuh. Nuan rindu agi berandau enti nuan ibuhka orang ke enggau nuan berandau.

   “Lebuh orang bukai ulih ngasaika nuan amat ibuhka utai ke dipadah sida, randau nya tentu ngelantangka, taja pan bisi maya randau nya bisi teketu enda lama.”—Marie.

   Bejimat: Anang nanya tanya ti kelalu peribadi. Jaku puji ke madah, “Lawa amat baju nuan. Berapa rega nya?” engka ngasuh iya berasai enda nyamai.

   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

 Baka ni chara nuan ngetuka randau? Siku nembiak lelaki ke benama Jordan madah, “Uji ketuka randau nya enggau nyebut utai ti positif. Nuan ulih nyebut, ‘Rindu amat berandau enggau nuan’ tauka ‘Arapka pengawa nuan mujur saritu’ ulih muka jalai berandau enggau orang nya maya seduai betemu baru.”