Kesuah iya, orang biak ngembuan tubuh ti bepengerai sereta bisi mayuh pengering. Tang, sekeda orang nembiak bisi penanggul ba pengerai. Kati nuan mega sama? Enti au, nuan ulih diperansang ari tiga iku Saksi-Saksi Jehovah nengah artikel tu. Sida nya V’loria, Justin, enggau Nisa. Peratika baka ni sida napi penanggul ba pengerai ke nyadi ba sida.

•  V’loria

•  Justin

•  Nisa

 Berengkah ari 14 taun, aku bisi penyakit fibromyalgia. (Penyakit ke ngasuh seseiku orang ngasaika pemedis ba semua begian tubuh.) Maya aku beumur 20 taun, aku mega bisi artritis, lupus, enggau penyakit Lyme. Tusah amat ba aku ngereja semua utai, laban aku suah berasai lelak. Kadang-kadang, setengah ari tubuh aku tepenat. Nya alai, aku patut ngena kerusi roda.

 Aku berasai amat tusah ati ketegal napi mayuh macham penyakit. Tang, runding sereta asai ati aku balat agi nekan, lebuh aku enda ulih ngereja pengawa ti senang, baka nulis tauka muka tutup kontena. Maya aku meda anak mit bejalai, aku amat asa laban aku enda ulih baka sida. Tu ngasuh aku ngasaika diri amat enda beguna.

 Taja pia, aku amat beterima kasihka tulung ari diri sebilik, nyengkaum bala kaban aku ba eklisia. Sida selalu ngabas aku, nyentukka aku enda kala berasai sunyi. Sida mai aku ngereja pengawa ninting hari, taja pan sida patut ngatung aku ari kerusi roda maya pansut tama kerita.

 Sida ke tuai ba eklisa mega merindang aku, laban sida amat nemu asai ati orang ke sakit. Sida nulung aku, nerima tatak diri empu, lalu enda nyalahka diri enti enda ulih ngereja mayuh utai baka orang bukai. Lebuh aku datai gempuru sereta nginjil, aku berasai gaga. (Hebrew 10:25) Maya aku ngereja pengawa nya, aku ulih meda, aku mega ulih ngereja mayuh utai taja pan bisi penanggul ba pengerai.

 Aku seruran ingat, Jehovah deka meri sebarang tulung ngambi kitai ulih betan. Ngambika chunto, Bup Kudus bisi madahka, tubuh kitai ulih lemi, tang ati sereta runding kitai majak “nyadi baru tiap hari.” (2 Korint 4:16) Nya meh utai ke diasaika aku!

 Perundingka: Enti nuan bisi sakit raya, nama kebuah nuan patut ngiga tulung ari orang bukai? Enti nuan nadai penanggul ba pengerai, baka ni nuan ulih meri sukung ngagai bala kaban nuan ke sakit?—Jaku Dalam 17:17.

 Aku labuh lalu enda ulih bediri. Dada aku berasai pedis lalu enda ulih engkebut. Aku ditabanka ngagai sepital. Keterubah, lutur enda ulih nemu nama penanggul aku. Tang pengudah utai tu nyadi mayuh kali, sida baru tetemuka aku bisi penyakit Lyme.

 Penyakit tu ngerusak semua saraf tubuh aku. Nyentukka seharitu, tubuh aku agi gegetar. Kadang-kadang, aku enda ulih nagang diri taja pan udah betaun makai ubat. Bisi maya iya, tubuh tauka tunjuk jari aku berasai pedis amat, nyentukka aku enda ulih engkebut. Buku tulang aku asaika udah betegal.

 Suba aku selalu berunding, “Aku kelalu biak bulih penyakit tu.” Tu ngasuh aku ringat. Ninting hari aku nyabak, lalu nanya Petara, “Nama kebuah aku patut napi semua tu?” Aku mega ngasaika Petara enda ibuhka aku. Tang aku ingatka cherita Jop ke dalam Bup Kudus. Jop enda nemu nama kebuah iya patut merinsa, tang iya tetap ati ngagai Petara. Enti Jop ulih betan, aku mega deka neladan iya.

 Tuai gempuru ba eklisia mayuh meransang aku. Sida selalu nanya sereta kiruhka aku. Seiku tuai gempuru madahka, aku ulih talipun ngagai iya barang maya. Aku amat beterima kasihka Jehovah laban bisi kaban ke baka tu!—Isaiah 32:1, 2.

 Maya kitai bisi penyakit ti raya, kitai senang enda ingatka Jehovah ketegal pemedis kitai. Bup Kudus madahka, ‘Serahka penusah nuan ngagai Jehovah, lalu Iya deka nyaga nuan.’ (Masmur 55:22) Nya meh utai ke uji dikereja aku ninting hari.

 Perundingka: Baka ni orang ke sayauka nuan meri bantu kena nulung nuan terus betan?—Jaku Dalam 24:10; 1 Tesalonika 5:11.

 Maya aku agi nembiak, aku sah bisi penyakit sindrom Marfan. Penyakit tu ngasuh semua buku tulang aku lemi. Penyakit tu mega ngachau begian tubuh aku ke bukai, baka jantung enggau mata. Ukai ninting hari aku ngasaika pemedis, tang enti aku udah pedis, nya amat balat.

 Maya aku nemu diri bisi penyakit tu, aku suah nyabak. Aku irau enda ulih ngereja utai kedeka aku agi. Ngambika chunto, aku rindu betanda, tang ila aku enda ulih ngereja nya agi. Laban aku ngasaika diri pedis, indah maya aku bejalai. Tu ngasuh aku amat takutka utai ke jemah ila.

 Aku nerima mayuh sukung ari menyadi tuai aku ke indu. Iya nulung aku enda kelalu kasihka diri empu. Iya ngajar aku, anang kelalu takut laban nya ngelebuka pengidup aja. Iya meransang aku terus besampi laban Jehovah amat nemu utai ke diasaika aku.—1 Peter 5:7.

 Masmur 18:6 siti ari ayat Bup Kudus ke amat meransang aku. Ayat nya madahka, ‘Lebuh aku dituntung penusah, aku ngangauka Jehovah. Aku ngangauka Petara aku. Iya ninga aku dalam rumah Iya. Iya ninga kangau aku.’ Ayat tu ngasuh aku nemu, lebuh aku besampi minta tulung ngagai Jehovah, Iya deka ninga lalu nulung. Iya seruran semak aku.

 Tentu tiap iku orang deka berasai tusah ati sereta asa lebuh nemu diri sakit. Tang aku belajar, anang nejuka diri empu majak dikuasa asai ati ke baka nya, lalu enda nejuka nya ngachau kaul kitai enggau Jehovah. Ukai Jehovah ke ngasuh nya nyadi ba kitai. Seagi kitai ngemeratka Iya ba pengidup, Iya tentu enda kala ninggalka kitai.—James 4:8.

 Perundingka: Kati pemerinsa kitai tu datai ari Petara?—James 1:13.