“Lebuh ba sekula suba, enti bisi orang madahka diri udah ngereja pengawa seks, iya ke bukai pan ngasaika sida patut nunda, laban takut dikumbai nyelai.”—Elaine, 21.

 Kala nuan ngasaika diri pan patut ngereja pengawa seks, laban semua orang udah?

 Kala nuan ngasaika diri ditekan ngereja pengawa seks, laban orang ke disayau nuan ngumbuk nuan ngereja nya?

 Enti au, artikel tu ulih nulung nuan nulak umbuk ari orang bukai, sereta pengingin nuan empu, ngambi nuan ulih milih utai ti betul.

•  Cherita ngapa enggau fakta

•  Baka ni ngelaban umbuk ngereja pengawa seks

•  Nama ku nembiak serambau nuan

 CHERITA NGAPA: Semua orang ngereja pengawa seks (kelimpah ari aku).

 FAKTA: Nitihka pansik, dua per tiga nembiak ke beumur 18 taun madahka diri ngereja pengawa seks. Reti iya, bisi 30 peratus nembiak ke bukai bedau ngereja nya. Nyadi, ukai “semua orang” ngereja pengawa seks.

 CHERITA NGAPA: Seks neguhka kaul kami.

 FAKTA: Taja pan sekeda orang lelaki ngena jaku tu ngumbuk orang indu ngereja pengawa seks, tang nya bula. Kesuah iya, orang lelaki mutuska kaul pengudah tinduk enggau indu nya. Lalu, indu ke ditinggalka nya sigi tekenyit sereta tusah ati, laban iya nyangka lelaki nya sayauka iya, sereta tetap ati ngagai iya. a

 CHERITA NGAPA: Bup Kudus ngajar, pengawa seks nya salah.

 FAKTA: Ajar Bup Kudus enda ngumbai pengawa seks nya salah. Tang, pengawa tu patut diasaika laki bini ti udah sah.—Pemungkal 1:28; 1 Korint 7:3.

 CHERITA NGAPA: Ajar Bup Kudus, nagang aku lantang ati.

 FAKTA: Enti nuan ngereja pengawa seks pengudah kawin, nuan tentu lantang ati. Laban nuan ulih nyeliahka asai ati ti irau, nesal, tauka takut ngereja pengawa seks enti bedau kawin.

 Nyadika simpul: Nadai ati deka telih enti nganti pengudah kawin, baru meh ngereja pengawa seks. Tang, bisi orang balat tusah ati ketegal ngereja pengawa seks sebedau kawin.

•   Bediri tegap ba utai ke dikearapka nuan. Bekaul enggau orang ke nemu berunding, Bup Kudus madahka: Sida “udah matihka diri ngelala bida entara utai ti badas enggau utai ti jai.” (Hebrew 5:14) Laban pengarap sida tegap, sida enda senang alah maya ditekan kelebih agi enti sida nemu nya salah.

   “Aku enggau naka ulih ngereja utai ti betul sereta ngembuan nama ti manah. Nyadi, aku enggai ngereja sebarang pengawa ke ulih ngenyaika nama diri.”—Alicia, 16.

   Perundingka: Kati nuan deka ngenyaika nama diri? Ni ke beguna agi, nama ti manah tauka nama ti jai ketegal deka diterima orang?

•   Pikirka empas iya. Ku Bup Kudus: “Kita deka ngetau utai ti ditanam kita empu.” (Galatia 6:7) Gambarka, nama penyadi ngagai pengidup nuan sereta orang nya, enti nuan alah ditekan lalu ngereja pengawa seks ti salah. b

   “Orang ke ngereja pengawa seks sebedau kawin suah iya sigi nesal, ngukum diri, enggau berasai enda dikesayau. Kelimpah ari nya, sida engka nyangka diri ngandung tauka napi penyakit kelamin.”—Sienna, 16.

   Perundingka: Nitihka bup Sex Smart: “Enti kaban nuan, mejal nuan ngereja utai ke ngasuh nuan tusah, kati nuan patut begulai sereta nitihka jaku sida?”

•   Ngembuan runding ti betul. Seks ukai munsuh tauka dosa. Iya ke amat, dalam Bup Kudus nunjukka pengawa seks ti betul nya patut ba entara laki bini ke udah sah.—Jaku Dalam 5:18, 19.

   “Pengawa seks sebagi ari pemeri Petara ti ulih ngagaka ati. Petara deka kitai ngasaika nya, tang nitihka atur ti udah ditetapka Iya. Iya nya, tikah ti sah.”—Jeremy, 17.

   Perundingka: Enti nuan udah kawin, nuan ulih ngereja pengawa seks tu enggau kaling pengidup nuan. Maya nya, nuan tentu ulih ngasaika pengaga iya, tang ukai penusah baka ke disebut tadi.