Sexting nya pengawa nganjung sms, gambar, tauka video ulah seks ti kamah nengah perengkah eletronik. “Nyauka semua orang ngereja nya,” ku seiku lelaki. “Keterubah, nuan bekirimka mesej ngagai pangan diri. Nyau kelama, nuan bekirimka gambar ti seksi sereta mandangka ulah ti kamah.”

 Nama kebuah mayuh orang ngereja nya? Nitihka surat kabar The New York Times, seiku luyar ti landik madahka, “ba sekeda nembiak, gambar pangan lelaki tauka indu ke telanjai nyadika bukti, pengidup seks sida nya biasa aja. Indah seiku nembiak mega madah pasal sexting nya, “pengawa seks ti selamat,” laban “nuan enda ngandung tauka bisi penyakit ba organ seks.”

 Kebuah bukai bala nembiak rindu nganjung sexting:

•   Kena nguntik orang ke diminat.

•   Kena “malas” gambar ulah seks ti kamah orang bukai.

 Berengkah meh nuan nganjung gambar ulah seks ti kamah, gambar nuan nya ukai enggi nuan agi. Nuan mega enda ulih ngereja nama-nama utai, enti gambar nya dikena orang bejai nuan. Nitihka riput ti udah digaga Amanda Lenhart, iya nya seiku penulis ari Pusat Penyelidikan Pew pasal sexting madah, “Kemayaharitu, amat senang deka nganjung pengawa seks ti kamah ke dikereja nuan nengah perengka elektronik, lalu senang mega ba orang bukai nyimpan tauka mandangka nya ngagai orang mayuh.”

 Utai ke kala nyadi:

•    Orang ke nerima gambar orang ke telanjai mega nganjung gambar nya ngagai bala kaban sida.

•    Pangan lelaki ke ringat nganjung gambar pangan indu iya kena malas dendam.

 NEMU NUAN? Pengawa bekunsika gambar telanjai ulih dikumbai ngerembaika pornografi ke anak mit. Kes tu dikumbai kes ti sama berat enggau kes nyamah anak mit ba sekeda menua. Sekeda nembiak ke bedau chukup umur ke enggau pengawa sexting, ulih didawa pesalah seks.

 Bup Kudus madah, pengawa seks dalam tikah nya enda salah. (Jaku Dalam 5:18) Tang, Bup Kudus begedika pengawa seks ti enda sah. Perundingka sekeda ayat tu:

•   ‘Tang pengawa bambai, enggau semua ulah ti kamah, tauka pengamu enda patut nyadi ba bala kita, . . . Anang bejaku kamah, tauka bejaku beli, tauka enda senunuh bejaku laban utai nya enda patut.’—Epesus 5:3, 4.

•   ‘Bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu.’—Kolosi 3:5.

 Ayat nya ukai semina nyebut pengawa kamah (ke enda sah dalam tikah) tang mega semua pengawa ti kamah ke bukai (nuju semua pengawa kamah ba moral), enggau semua pengawa kamah ke enda ulih ditagang (nuju ngagai pengingin ti kamah ke deka ngereja utai ti enda menuku, ukai asai ati ke patut bisi ba tikah).

 Tanya diri empu:

•   Nama kebuah nganjung gambar telanjai mega dikumbai “pengawa ti kamah”?

•   Baka ni pengawa sexting ulih ngemansangka pengingin seks ti kamah?

•   Nama kebuah pengingin deka meda tauka bekirimka gambar telanjai nya ulih dikumbai pengingin ti salah?

 Ayat Bup Kudus ba baruh deka meri kitai kebuah ti betul pasal patut nyeliahka sexting:

•   ‘Enggau naka ulih serahka diri empu ngagai Petara, laban Iya udah ngemendarka nuan, ke enda malu ke pengawa diri, ngajar pesan ti bendar ngena jalai ti betul.’—2 Timoti 2:15.

•    ‘Nya alai laban semua utai deka dirusak magang ngena chara nya, baka ni ku gaya kita patut idup? Kita patut diau kudus sereta nangika Petara,’—2 Peter 3:11.

 Ayat nya nerangka penguntung ke diulih orang ke beresi ba moral. Enti nuan nadai ngembuan ulah ti kamah, nuan enda dikachau asai ati ti besalah.—Galatia 6:7.

 Tanya diri empu:

•    Aku orang ke baka ni?

•    Kati aku peduli pasal orang bukai?

•    Kati aku rinduka utai ti ulih ngemediska ati orang bukai?

•    Baka ni pengawa sexting ulih bejai nama aku?

•    Enti aku nganjung sexting, kati apai indai agi ulih pechayaka aku?

 CHERITA AMAT “Kaban aku belalaika diri bisi pangan lelaki. Udah nya, iya nganjung gambar telanjai ngagai pangan iya, lalu pangan iya pan nganjung gambar telanjai iya ngagai kaban aku. Dua hari udah nya, apai kaban aku meresa handphone iya, lalu tepedaka semua gambar nya. Apai iya amat tusah ati lalu minta iya nerangka utai ke nyadi. Iya pan nerangka semua utai ngagai apai indai iya. Taja pan iya nesal, tang apai indai iya enda pechayaka iya agi.”

 Fakta pengidup: Sexting ngerusak nama orang ke nganjung enggau orang ke nerima mesej nya. “Aku ngasaika diri amat kamah sereta asa ati enggau diri empu,” ku seiku nembiak ke dipejal pangan lelaki iya nganjung sexting.

 Sexting ulih ngerusak ulah ti menyana, enda bemoral, enggau salah ba undang-undang. Nya kebuah nuan patut ningaka lalau Bup Kudus tu:

•   “Seliahka semua pengingin nembiak.”—2 Timoti 2:22.

•   “Anang ngasuh mata aku merening ngagai utai ti [nadai guna, NWT].”—Masmur 119:37.

 Titihka lalau Bup Kudus ba pengidup nuan. Bacha meh utai ke dipadahka Janet, lalu gaga meh pemutus enggau betul.

 “Aku kala betemu enggau seiku nembiak lelaki, lalu kami betukar lumur talipun. Enda datai seminggu, iya udah minta aku nganjung gambar maya aku ngena bikini.”—Janet.

 Nama patut digaga Janet? Nama deka digaga nuan?

•  CHARA A Nuan engka berunding, “Utai ke dipinta iya enda salah. Ukai enda kami sama bela deka nyemerai, legi iya tetap meh meda aku ngena bikini.”

•  CHARA B Nuan engka berunding, “Enda nemu nama kedeka iya. Tang engka aku nganjung gambar ke enda kelalu seksi dulu, udah nya meda nama nyadi.”

•  CHARA C Nuan engka berunding, “Aku udah nemu nama kedeka iya. Aku deka muai semua mesej ari iya.”

 Chara C nya meh pemutus ke betul, enda pia? Bup Kudus pan madah, “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah.”—Jaku Dalam 22:3.

 Ari cherita Janet kitai nemu, sapa ke enggau nuan begulai nya meh ke ngepunka pengawa sexting nyadi. Pia mega ulah ke enda menuku ti bukai. (Jaku Dalam 13:20) “Begulai meh enggau orang ke begedika utai ti enda manah,” ku seiku nembiak indu ke benama Sarah. Seiku nembiak indu ke benama Delia pan setuju enggau Sarah. “Sekeda ‘kaban’ enda nulung nuan beresi ba moral. Tang sida ke ngumpan nuan ngereja utai ti salah.” Iya nambahka, “Enti pengawa sida enda sejalai enggau adat Petara, sida pan ulih ngelimpangka nuan ari tetap ati ngagai Petara. Kati nuan dekaka kaban ti baka nya?”