Taja pan seseiku orang engka ngasaika diri bisi hak malas dendam, tang utai nya ngelanggar prinsip Bup Kudus ke madah: “Anang nyebut, Aku deka ngereja ngagai orang utai ti udah dikereja sida ngagai aku!” (Jaku Dalam 24:29) Bup Kudus ngembuan lalau ke udah nulung mayuh orang, ti bisi pengeran deka badu ari ulah bebalas dendam.

Ba artikel tu

•  Nama kebuah kitai enda tau bedendam?

•  Baka ni Petara ngukum ulah ke baka tu?

•  Baka ni aku ulih mutarka pengingin deka malas dendam?

•  Runding ti salah pasal dendam

 Nuan tentu ka meda orang ke ngemediska ati tauka ngasuh nuan bakal diukum, ketegal nuan ringat ngagai iya. Taja pia, malas dendam enda sejalai enggau ajar Bup Kudus. Nama kebuah?

 Petara enda rinduka pengawa bebalas dendam. Ba Bup Kudus, Petara Jehovah a madahka: “Aku ke malas, Aku deka mayar.” (Rome 12:19) Bup Kudus meransang sida ke napi utai ti enda lurus ngena chara ti bisi pemaik, kena mutarka penanggul ari ke malas dendam. (Rome 12:18) Tang nama utai ke ulih digaga enti iya nadai chara mutarka penanggul nya enggau manah, tauka iya udah naka ulih mutarka penanggul nya enggau pemaik? Bup Kudus ngelalau kitai, andalka Jehovah ngemetulka utai ti enda lurus.—Masmur 42:10, 11.

 Ke diatu, Petara ngemendarka perintah mensia ngukum orang ke bisi ngereja penyalah. (Rome 13:1-4) Enda lama da agi, Petara deka ngukum orang ke kala ngereja penyai, lalu nentuka nadai orang deka napi pemerinsa agi.—Isaiah 11:4.

•   Anang ngereja utai enggau enda berunding. (Jaku Dalam 17:27) Orang ke jampat ringat, selalu ngereja utai ke ngasuh iya nesal. Tang orang ke berunding dulu sebedau ngereja sesiti utai, suah iya ngaga pemutus ti manah.—Jaku Dalam 29:11.

•   Pansik dulu sesiti fakta. (Jaku Dalam 18:13) Orang ke dikemediska ati ulih nanya diri empu, ‘Kati bisi fakta ti enda ditemu aku, ke nerangka kebuah iya baka nya? Kati iya benung stres? Tauka kati iya sedarka pengawa diri? Kekadang, kitai engka ngumbai seseiku orang sengaja ngemediska ati kitai. Tang ke bendar iya, iya enda sengaja ngaga penyalah nya.

 Runding ti salah: Ketegal Bup Kudus enda meransang kitai malas dendam, kitai enda ulih ngelindung diri lebuh diserang.

 Fakta: Enti diserang, seseiku orang bisi hak ngelindung diri empu tauka ngiga tulung ari piak ti bekuasa. Taja pia, Bup Kudus madahka kitai patut nyeliahka laya ti ngujungka penusah.—Jaku Dalam 17:14.