Nama Ajar Bup Kudus Pasal Bibas Milih? Kati Nasit Kitai Udah Ditentuka?

TEBAH

Saut ari Bup Kudus

Petara meri kitai basa enggau meri kitai pengelepas bibas milih, iya nya ngaga pemutus kediri empu. Petara enda netap tauka nentuka nasit kitai. Peratika ajar Bup Kudus tu.

Petara ngaga mensia nitihka gamal Iya. (Pemungkal 1:26) Kitai ukai baka jelu ke semina nitihka utai ti diasaika aja. Tang, kitai ulih ngayanka kualiti Penempa kitai baka pengerindu enggau pengelurus. Kitai mega bibas milih, baka Petara.
Kitai ulih nentuka utai kedeka diri pasal pengidup kitai empu jemah ila. Bup Kudus meransang kitai ‘milih pengidup’ sereta ngasika pesan Petara, iya nya milih deka ningaka pesan Petara. (Ulang Adat 30:19, 20) Lalau tu ukai reti iya kitai enda ulih milih, laban nya baka ke nuduh Petara nya bangat jai laban ngasuh kitai ngereja utai ke enda ulih kitai. Nambahka nya, Petara enda kala mejal kitai tetap ati ngagai Iya. Tang, ketegal pengasih, Petara ngingatka kitai, “Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang.”—Isaiah 48:18.
Mujur tauka enda ukai utai ti udah ditentuka. Enti kitai deka mujur, kitai empu patut bendar agi ngulihka nya. Bup Kudus ngelalau kitai, “Kereja enggau bebendar sebarang pengawa ti dikereja nuan.” (Pengajar 9:10) Nambahka nya mega, Bup Kudus bisi madah, “Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.

Pengelepas bibas milih nya pemeri ari Petara. Ketegal pemeri tu, kitai ulih rinduka Iya enggau “pengabis ati”, laban kitai empu deka ngereja nya, ukai ketegal dipejal.—Matthew 22:37.

Kati Petara ke nentuka semua utai?

Endang amat Bup Kudus ngumbai Petara nya meh ke pemadu bekuasa ba semua utai. Tu reti iya, nadai sapa-sapa ulih natak kuasa Iya, kelimpah ari Iya empu. (Jop 37:23; Isaiah 40:26) Taja pia, Petara enda ngena kuasa diri kena nentuka semua utai. Ngambika chunto, Bup Kudus madah, Petara “lama udah enda bemunyi” tauka nagang diri ngagai Babilon kelia. Iya nya munsuh nembiak Iya. (Isaiah 42:14) Sama mega, ba maya tu, Petara milih ngemendarka orang terus salah guna pengelepas sida ke bibas milih, nyentukka orang nya merinsa. Tang, jemah ila Petara deka mutarka semua penanggul tu.—Masmur 37:10, 11.