Sekeda Bup Kudus ngena leka jaku “semengat” kena nyalin leka jaku neʹphesh (ari jaku Hebrew) enggau psy·kheʹ (ari jaku Gerika.) Leka jaku neʹphesh nya mai reti “utai ke enseput,” lalu leka jaku psy·kheʹ mai reti “utai ti idup.” a Nyadi, neʹphesh enggau psy·kheʹ merujuk ngagai sesiku orang tauka jelu ti idup, ukai ngagai utai ke agi mengkang idup (chunto, semengat) pengudah tubuh nya mati. Mayuh salin Bup Kudus ngena leka jaku “nyawa,” “orang,” “utai ke ditempa,” tauka “tubuh” kena nyalin leka jaku neʹphesh enggau psy·kheʹ nitihka konteks. Bandingka sekeda ayat ba baruh tu ke diambi ari beberapa iti salin Bup Kudus:

•   Lebuh Petara nempa mensia ti keterubah, Adam, Bup Kudus madahka, iya “nyadi mensia ti idup.” (Pemungkal 2:7, Salin Dunya Baru) Rambai jaku ke disalin “nyadi mensia ti idup” nya “nyadi neʹphesh ti idup” dalam jaku Hebrew. Adam ukai diberi semengat, tang iya nyadi siku mensia, tauka neʹphesh ti idup.

•   Ba Adat Lewi 5:2; 7:20; 23:30; Ulang Adat 12:20 enggau Rome 13:1 madahka, sesiku orang tau bekereja, inginka pemakai, makai, ngasika adat sereta negu bangkai. Ba tiap iti ayat tu, rambai jaku neʹphesh tauka psy·kheʹ dikena ba dalam jaku asal. Semina orang ke idup ti bisi tubuh enggau runding aja ulih ngereja semua utai tu, ukai semengat ti enda ulih dipeda.

Kati neʹphesh enggau psy·kheʹ nya merejuk ngagai semengat ti enda nemu mati?

 Enda. Neʹphesh enggau psy·kheʹ nemu mati, lalu bisi bepuluh iti ayat Bup Kudus ke nunjukka tu. Peratika sekeda chunto:

•   “Orang [neʹphesh] ke bedosa deka mati.”—Esekiel 18:4, 20.

•   Ba menua Israel jeman kelia, enti orang ngereja jenayah ti pemadu jai, “orang [neʹphesh] nya mesti dibunuh.” (Pemansut 12:15, 19; Adat Lewi 7:20, 21, 27; 19:8, Salin Dunya Baru) Orang nya “enda tau enda dibunuh.”—Pemansut 31:14, Bup Kudus Baru.

•   Sekeda ayat Bup Kudus madah pasal “bangkai” tauka “orang ke udah mati” tang dalam jaku Hebrew, leka jaku asal nya neʹphesh. (Adat Lewi 21:11; Penyampau 6:6, nota kaki, Salin Dunya Baru)

Neʹphesh enggau psy·kheʹ ulih mai reti “nyawa”

 Bup Kudus mega ngena leka jaku neʹphesh enggau psy·kheʹ lebuh bejaku pasal “nyawa.” Sama mega, Bup Kudus nunjukka nyawa (neʹphesh tauka psy·kheʹ ) sesiku orang ulih diperambunka tauka lenyau.—Pemansut 4:19; Pengulu 9:17; Pilipi 2:30.

Ari ni penatai ajar pasal semengat ke enda nemu mati?

 Mayuh gerija ngajar pasal semengat ke enda nemu mati, tang ajar nya ukai datai ari Bup Kudus, tang ari falsafah Gerika kelia. Siti bup pansik madahka, dalam Bup Kudus, neʹphesh enggau psy·kheʹ merujuk ngagai utai ke enseput. Nya ukai siti utai ke enda ulih dipeda ti ulih diseraraka ari tubuh. Ajar pasal semengat ti ulih diseraraka ari tubuh nya diambi gerija ari ajar orang Gerika kelia.

 Petara enda nyagi kitai nyampurka ajar Iya enggau ajar tauka falsafah mensia, nyengkaum ajar pasal semengat ke enda nemu mati. Iya ke amat, Bup Kudus nangkan kitai: “Bejimat meh ngambika nadai orang nangkap kita ngena penemu-dalam dunya sereta jaku ti bula ke nadai reti. Semua nya nitihka adat mensia.”—Kolosi 2:8.