Taja pan Bup Kudus nadai nyebut pasal nginsap a tauka chara bukai ngena semakau, tang prinsip Bup Kudus nunjukka Petara begedika semua pengawa ti enda tuchi ke ulih ngachau pengerai. Nya alai, Iya ngumbai pengawa nginsap nya pengawa ti bedosa.

•   Bebasaka nyawa. ‘Petara . . . meri pengidup enggau seput . . . ngagai semua mensia.’ (SKR. 17:24, 25) Laban nyawa nya pemeri ari Petara, kitai enda patut ngereja sebarang utai ti ulih ngemandakka nyawa diri, baka nginsap. Ba serata dunya, nginsap nya siti ari pengawa ti ngujungka pemati ke agi ulih diseliahka.

•   Rinduka orang bukai. “Rinduka pangan nuan baka nuan ke rinduka diri empu.” (Matthew 22:39) Nginsap ba mua orang mayuh nadai ngayanka pengerindu. Pengerai orang bukai ke ditepuk asap insap nya deka dikachau.

•   Orang Kristian patut tuchi. ‘Serahka tubuh kita nyadi pemeri ti idup, ti kudus ngagai Petara.’ (Rome 12:1, NW) ‘Aram kitai nuchi diri empu ari semua utai ti ngamahka tubuh enggau roh kitai, lalu nyadi pemadu kudus nangika Petara.’ (2 Korint 7:1) Nginsap nya siti pengawa ti enda biasa sereta enda tuchi, laban orang ke ngena semakau baka ke benung makai toksin lalu sengaja ngerusak tubuh diri empu.

 Bup Kudus enda enggau ngegerang madahka ni bagi dadah tauka utai bukai. Tang Bup Kudus ngembuan prinsip ti terang ke nunjukka kitai enda patut ngena dadah nyadika pemerindang. Kelimpah ari sekeda prinsip ke udah disebut kitai tadi, uji peratika prinsip ke bukai tu mega:

•   Kitai patut nagang runding diri. ‘Rinduka Petara nuan . . . enggau pengabis runding nuan.’ (Matthew 22:37, 38) “Disiplin diri empu.” (1 Peter 1:​13) Lebuh seiku orang salah guna dadah lalu gian, iya enda ulih nagang runding diri empu. Runding sida semina beberatka agi chara ngulihka dadah lalu semina deka ngemuaska gian sida aja, tang ukai utai ti ngemansangka.​—Pilipi 4:8.

•   Ngasika undang-undang perintah. “Nunduk ngagai orang ke megai perintah enggau ngagai orang ke megai kuasa” (Titus 3:1) Ba mayuh menua, bisi undang-undang ti nagang sekeda bagi dadah. Enti kitai deka ngelantangka ati Petara, kitai patut ngasika atur perintah tu.​—Rome 13:1.